喂喂喂，充滿住童年回憶嘅乳酪雪糕店返嚟喇！除咗舊有嘅原味乳酪之外，仲新加入埋抹茶味，而選加配料亦都多咗好多抹茶嘢揀啊！
乳酪有3款味揀：原味、北海道抹茶同雙拼扭紋。全部都好軟滑，原味微酸；抹茶乳酪雖然未至於話有茶甘香，但都有淡淡嘅抹茶味再夾雜住乳酪嘅酸味，唔太甜。
至於toppings，就有超過廿款嘅選擇，包括招牌嘅house crumbs同糯米糍，生果類嘅士多啤梨、香印青提、巨峰提等等，而糕餅類就有女生最愛嘅馬卡龍、Oreo……如果抹茶控想砌到成杯都係抹茶都冇問題：抹茶糯米糍、抹茶蛋糕、日本大福餅、抹茶朱古力同抹茶百力滋。
糯米糍細細粒，係軟身少少嗰隻口感，大福就煙韌啲，不過隻抹茶朱古力就唔夠抹茶味，得個甜字。仲有要提一提大家，house crumbs即係佢哋自家製嘅肉桂曲奇餅碎，幾脆㗎，店員仲會分開幾層落，令到佢分佈平均啲，成杯yogurt都食到好香嘅肉桂味，但唔食玉桂味嘅朋友仔就唔好揀喇。
除咗yogurt，舖頭仲有麵包同冬甩賣，冬甩主要有4種口味：士多啤梨、黑朱古力、紅莓同吉士。而臨近新年，仲有賀年版嘅金裝朱古力香蕉蛋糕配藍莓及檸檬macaron添！
Crumbs
地址：銅鑼灣謝斐道508號地舖
文、相、片：Kar
其他新店介紹：
尖咀新開御好燒專門店 可自己親手燒大阪燒
屯門新開足料丼飯小店 開飯仔放蛇實試 (有片)
100%日本原產人氣蛋糕店登陸太古 Tea Time生日蛋糕有著落（有片）
隨時接收最新資訊
讚好OpenRice專頁！