上環除咗上環市政大廈熟食中心之外，其實仲有個皇后街熟食市場。由港鐵西營盤站行過嚟係有少少遠，但唔好以為咁就代表無人，相反有唔少街坊甚至遊客嚟幫襯㗎！皆因呢度有唔少睇落無乜特別，但食落就知真功夫嘅美食，由港式到潮式，從小食到小炒呢度都滿足到你。
臥虎藏龍西班牙菜 ABC Kitchen
最切合禾稈冚珍珠呢條題嘅，絕對要數到呢間西班牙菜館，睇門面好似平平無奇，實則呢間餐廳係由以前中環M at the Fringe班底同廚師朋友一齊經營，水準絕對有保證。招牌西班牙乳豬皮脆惹味，煙三文魚賓尼迪流心程度啱啱好，連甜品巴伐洛娃蛋白餅同法式焦糖燉蛋都有水準，名副其實係A Better Cooking Kitchen。
人氣印度+尼泊爾料理 Chautari Restaurant
如果想食非一般嘅咖喱嘅話，嚟呢間就啱哂喇。佢地由店員到大廚都係印度人（不過放心，Menu有相同中文名嘅），煮出嚟嘅咖喱味道亦比較濃郁，食得到香料味道但又唔會過分突出。最啱用外煙韌內鬆軟嘅烤餅嚟點咖喱汁食！另外仲有尼泊爾炒飯、印度式串燒等選擇，邊個話熟食中心得普通碟頭飯食？
家庭式北方手製餃子 老北方餃子館
圖：Kan Lee
想食中菜？無問題，呢間小店由一家三口經營，嚟自北京嘅媽媽負責搓皮同包餃子，爸爸同個仔就幫手招呼客人，嗌餃子就會先送上一碗暖笠笠嘅蛋花番茄湯。開完胃就可以食餃子，粒粒都漲卜卜，而皮跟返北方咁比較厚實同煙韌。餡料方面想試老北京滋味嘅可以揀京蔥羊肉，另外仲有韮菜三鮮同白菜豬肉等口味，無論煎餃定水餃都同樣好食。
更多【熟食中心尋寶】： |
傳統潮州粿品+小食 曾記粿品
圖：drink7up
以前上環有條非常出名嘅「潮洲巷」，入面有唔少檔仔專賣潮州特色食物。之後部分搬咗入嚟，當中包括曾記呢間香港碩果僅存嘅地道潮州粿品小店。佢地賣嘅韭菜粿、筍粿同炒粿都係正宗傳統風味。另外仲有蠔烙，即係廣東人叫開嘅煎蠔餅，同埋芋泥白果同清心丸綠豆爽白果等潮式甜品，風味獨一無二。
馳名豬紅豬雜湯 陳春記
圖：pandamen
另一間傳統潮州美食，招牌菜就係一道豬紅豬雜湯。可以放心嘅係佢地用料新鮮而且洗得夠乾淨，所以豬肺、豬肚、豬粉腸等食落絕對唔會有怪味或者雪味。而且連湯底都係同豬肉同豬骨熬製，天然奶白色飲落鮮甜而帶少少胡椒辣味。不過老闆娘出名服務態度麻麻，介意嘅朋友仔不如都係轉第二間潮州菜館啦。
有鑊氣足料小炒 陳財記
圖：mandymanlovefoodie，Marine kiddo
幾時都話，每個熟食中心都總有間鑊氣小炒，而皇后街熟食市場嘅代表就要數到佢。其實陳財記都早市午市都有茶餐供應，但始終都係晚市嘅小菜最見真章。蠔仔粥分量十足，有鮮味蠔仔又夠大粒。酥炸大腸香脆而唔油膩，豉椒炒蟶子亦夠惹味。就算係自己一個人嚟，都可以嗌返碟炒粉麵飯，加多支冰凍啤酒無得輸。
文：Cathy
開飯編輯推介：
2. 1月份好評餐廳十強
熱門文章推介：
隨時接收最新資訊
讚好OpenRice專頁！