成日話馬鞍山係美食沙漠，要搵嘢食仲難過中獎…..就快過年，咁咪仲難搵地方食團年同食開年飯？唔怕！開飯仔喺馬鞍山廣場搵咗6間唔同風格嘅餐廳，新年攪攪新意，同朋友開飯過年就更有fun啦！
進擊的餃子：大阪王將
開飯仔去親大阪都會去呢間餃子店一轉，新年外遊唔到，大阪王將可能係你杯茶！一入餐廳已經好日系！店裡面仲有唔同嘅主題牆，feel到陣陣東洋味。
雖然大阪王將主打喺元祖級餃子，之不過出名嘅仲有拉麵同埋大阪名物「天津飯」，一班人食飯開心share無難度！
元祖手製煎餃子：餃子個皮好薄，咬落仲好爆汁。
吉列豬扒天津飯：揀咗你想要咩飯，再揀要乜嘢蛋，配埋個醬汁同埋topping。新年有得揀，咁至係老闆！
Info
地址：馬鞍山廣場2樓273-275號舖
電話：2885 6916
學做Chef Lé Mon：Pepper Lunch
如果你想玩多少少，Pepper Lunch嘅DIY鐵板飯都幾啱feel！呢度出名當然係玩「鐵板」，五個系列包括原創黑椒飯、芝士奄列、至尊牛扒到經典日式及鐵板意大利飯都有，先揀你嘅飛佛，再將啲餸好似Chef Lé Mon咁用熟練嘅手勢撈埋一碟。團年飯聚有得「撈起」，新年一定掂啦！
用鐵板上嘅signature dish，夠晒份量！
<至尊牛扒>一口牛扒粒拼漢堡扒
咖喱黑椒芝士牛肉飯
Info
地址：馬鞍山廣場二樓2111-2111A號舖
電話： 2871 1255
新年加啲「元氣」：元気寿司
新年講意頭，我諗如果新年去到「元気」，可以有個元氣嘅好開始！喺馬鞍山廣場都有分店嘅元気寿司，俘虜咗唔少「壽司控」嘅心。無論係唔係坐喺迴轉位都好，通常開飯仔都會嗌到成枱都係壽司，食完一碟再挑戰「層層碟」，幾有fun。
由壽司到刺身再去到烏冬卷物，邊款你至like？
迴轉壽司一碟過一碟，「貨如輪轉」啊喂！
脆口炸軟殼蟹，有種「黃金滿屋」嘅感覺。
Info
地址：馬鞍山廣場2樓2136-2137號舖
電話：2631 5953
「IG-able」咖啡店：荳子Beans
去到人氣高企嘅新派café「荳子Beans」，佢嘅甜品同埋立體拉花咖啡都好「IG-able」。而嚟緊會喺馬鞍山廣場開業（開業日期有待更新），馬鞍山友要團年開飯，去呢度就一定可以畀你嘅相機食先啦！
黃金蟹肉意大利粉：呢款新品將於新年前推出，店員話夠晒好意頭！
黑松露焗釀燒雞：想rich少少可以叫埋隻燒雞，都係新出架！
Cozy (BEANS DESSERT COMBO)：由香滑芝士忌廉加胡麻mousse拼柚子蘋果，再加埋用吉士打出來的小盆栽，好吸引！
Info
Beans （馬鞍山分店）
地址：馬鞍山廣場3樓337號舖
電話：(TBC，有待更新)
開業日期：(TBC，有待更新)
同玉桂狗「涮」餐勁嘅！Mou Mou Club牛涮鍋
同樣係就快喺馬鞍山廣場同大家見面嘅，仲有「牛涮鍋Mou Mou Club」。（開業日期有待更新）最近就襯返狗年，同Cinnamoroll玉桂狗有個聯乘15週年嘅慶祝活動。推出兩款同玉桂狗有關嘅創意期間限定湯底，仲有限量禮品換領添！
玉桂蘋果湯：玉桂蘋果湯以雞湯作湯底，加入玉桂粉、蘋果片及雪耳。潤一潤，爽啊！
牛乳湯：另一款係色澤奶白嘅牛乳湯。
揀以上其中一款湯底，仲可以每位獲贈 MouMouClub X Cinnamoroll postcard 一張，不過留意返，係數量有限架！
Info
牛涮鍋Mou Mou Club（馬鞍山）
地址：馬鞍山廣場3樓364A號舖
電話：2194 6028
開業日期：暫定二月
上海姥姥春節限定「六福」臨門
如果中菜始終係你嘅首選，新派上海菜系嘅「上海姥姥」都係個唔錯嘅選擇。
臨近新年，佢哋推出一系列嘅「六福」臨門菜式，其中四款主打菜包括有松子桂魚、紅燒黄金獅子頭、蟹肉豆苗小籠包同古法八寶飯，每款有寓意得嚟味道細緻，夠晒有「福」咁話！
年年有「魚 」－松子桂魚
粒粒皆是寶－古法八寶飯
黃金小錢包－蟹肉豆苗小籠包
Info
地址：馬鞍山廣場2樓269-271B號舖
電話：2362 3204
特約分享：馬鞍山廣場 (港鐵馬鞍山站A出口)