大家期待已久嘅美食博覽返嚟啦！當中尊貴美食區一連四日（8月15至18日）會向公眾開放，今年仲新設「咖啡·醇香」主題，唔少本地精品咖啡店都特別推出新款式。另外仲有多款坊間少見嘅手工啤、小食、甜品等等，即睇開飯仔精選推介！
 

尊貴美食區

Pepe抹茶（會場價$55）（可轉芝麻或咖啡，每日限50杯）

爆紅Pepe喺美食博覽都見到！因為呢間咖啡店將最近新出嘅Pepe Latte Art帶埋過嚟，可以揀唔同表情即場繪畫。抹茶粉同芝麻粉都係選用日本直送，有賣相得嚟仲真係有實際。
 

（左）立體拉花Latte（$72），（右）三眼仔抹茶（$52）

另外仲有超可愛嘅立體拉花，同咖啡店招牌三眼仔抹茶Latte，店主話如果有想畫嘅公仔同圖案，可以Show畀咖啡師參考返，幫你喺Latte上做埋出嚟！

攤檔：Cafe R&C（3B-E16）
 

檸檬蜂蜜冰滴咖啡（$50）

嚟自長洲嘅啡寮就將之前喺其他活動推出過嘅特別版咖啡帶過嚟灣仔，呢杯用咗本地寶生園養蜂場嘅冬蜜，配搭新鮮檸檬片同冰滴咖啡，清爽消暑。另外仲有帶少少辣嘅花膠冰滴咖啡（$70），最啱重口味朋友！

攤檔：Valor Cheung Chau Limited（3B-E14）
 

黑麥在啡（$65）

唔單止有咖啡，仲有加咗哥倫比亞中淺焙咖啡豆嘅手工啤酒！因為釀酒嗰陣加咗橡木條，啤酒除咗咖啡香，仲帶啲啲類似Whiskey咁嘅木桶香。麥味同甜味會比較重，但唔會蓋過咖啡味。

攤檔：TAP：The Ale Project（3B-E24）
 

紅豆粒粒椰寶（$40/支，$70/兩支）

而呢間香港老字號今年主打呢支七、八十年代出過嘅紅豆粒粒椰寶雪條，清甜椰汁加粒粒紅豆，紅豆有少少起沙口感，難得係唔會過甜，同椰汁香相當平衡，消暑最啱！
 

（左）椰汁果仁奶昔，（右）椰汁奶昔配紅豆（$50）

另外仲有兩杯會場限定Smoothie，都係用咗招牌仙椰汁打成。椰汁果仁奶昔加入果仁以增加味道同口感層次，椰汁奶昔配紅豆就有粒粒咬口。順帶一提佢地仲有賣可拆洗嘅重用飲管（換購價$15），方便大家走塑。

攤檔：甄沾記香港有限公司（3B-B11）
 

 

蛋糕組合（$130）

想試士多啤梨西瓜蛋糕嘅話，而家係個好機會啦！呢間Cafe推出蛋糕組合，一Set有三件唔同口味。士多啤梨西瓜蛋糕以杏仁餅底、西瓜、玫瑰忌廉、新鮮士多啤梨一層層疊成，上面再加玫瑰花瓣同開心果點綴，層次豐富。
 

攤檔：LIFETASTIC（3B-D06）
 

抺茶手工啤酒（試飲價$20/95mL，$40/250mL）

全港首創抺茶蘋果手工啤酒！由本地手工啤酒廠吹啤啤同芬蘭果汁品牌Bonne聯乘推出，糅合日本宇治抹茶嘅茶香同芬蘭蘋果汁嘅清甜。可以先試細杯裝，啱飲再買支裝（$50/枝）返屋企。

攤檔：Great (HK) Investment Company Limited（3B-A20）
 

即食混醬雞皮（$40）

想搵惹味小食送酒？呢度就用泰國Max Oceans麻辣燙口味嘅雞皮脆脆，配搭芝士醬、沙律醬同煙肉碎，惹味香脆。

攤檔：山下菓子（3B-E03）
 

即食火腿杯（$30/杯，$60/3杯）

提到送酒小食就唔少得Ham嘅，一杯就有西班牙黑毛豬火腿、莎樂美腸，同辣肉腸。當中最出色嘅係黑毛豬火腿，油香滿溢，帶少少香甜。
 

（左）OREO芝士蛋糕，（右）紐約芝士蛋糕（$38/件，$70/兩件）

甜魔必買！喺外國大熱嘅OREO芝士蛋糕唔單止有OREO餅底同曲奇碎，裡面仲有OREO曲奇夾心呀！而紐約芝士蛋糕就用咗Philadelphia Cream Cheese，無OREO嘅咁甜。

攤檔：進浩食品有限公司（3B-B20）
 

（左）法國黑魚子煙三文魚酸忌廉湯種三文治，熔岩芝士波士頓龍蝦黑松露麵包（$128/Set），（右）夏威夷千島醬海陸（蝦肉雞肉）多榖漢堡，法國黑松露炒蛋牛角包（$128/Set）

前天氣主播，喺法國藍帶國際學院修讀麵包文憑課程嘅黃婉曼（Icy）開設嘅餐廳亦嚟到美食博覽，麵包用自家培養嘅天然酵母麵種，每日新鮮烘焙。

攤檔：Rise Kitchen（3B-E19）

第30屆美食博覽
活動日期：2019年8月15至19日
地址：香港島灣仔博覽道1號香港會議展覽中心
購票指南及其他詳情：香港貿發局美食博覽

文、相：Cathy