【蠔癡必看】生蠔海鮮的浪漫盛宴!

香港人日日翻工忙到放工，放假只想吃餐好嘅，所以近年有唔少自助餐都新推出生蠔任食，不過正所謂「重質不重量」胃容量始終有限，與其瘋狂吃喝不如吃得高質有品味！不妨對自己好啲，用差不多嘅價錢品嚐以下三間即開生蠔餐廳！讓自己邊吃邊Hea，飛開壓力、為自己叉叉電！重新出發！

Casa Fina Seafood & Oyster Bar (銅鑼灣)

一入門口就可以透過玻璃窗見到整潔嘅廚房同廚師正在用心製作好似藝術品般嘅菜式，環境夠晒舒服，係一間適合情侶或商務人士嘅Fine Dining！啱晒慶祝紀念日或者同客人邊食邊傾計！

生蠔海鮮拼盤 (Oyster & Seafood Platter)
呢度嘅生蠔種類好多，大概有成18款，產地包括美國、南非、西班牙、法國。無論你鍾意海水味較重定creamy又鮮甜嘅都總有一款啱你！！

海膽伴莎莎 (Sea Urchin Salad)
有別於平日嘅莎莎，餐廳用creamy 嘅加拿大或時令海膽，襯托爽口番茄、洋蔥、青瓜製成嘅莎莎，簡直係絕配！

招牌蠔湯 (Oyster Soup)
每次飲呢個蠔湯小編都充滿驚喜，事關大廚會因應時令選用唔同嘅蠔煮成湯，所以次次味道都會唔同！大廚同負責人坦言依款湯同成本高，但味道好，所以一直係店內嘅招牌！

烤原條日本魷魚釀意大利飯 (Whole Squid Risotto)
大廚將煮到半熟嘅Risotto釀入原條日本魷魚當中，然後再攞去焗，令食客可以一次過品嚐Creamy嘅Risotto同魷魚嘅鮮味！夾埋側邊嘅蕃茄莎莎食仲唔會膩添！

鴨肝野菌意粉 (Duck Foie Gras Linguini)
餐廳內極受歡迎嘅Pasta，成件法國鴨肝配上勁rich嘅Porcini Cream Sauce, 食完罪惡感十足，但勁滿足！

八蠔吧 Raw Bar No.8(上環)

有曾為已故英國影星Peter Ustinov同維珍航空老闆Richard Branson揀蠔嘅「蠔王」John坐鎮！堅持每日為客人提供健康優質又鮮味嘅生蠔。店內嘅開蠔手為減低客人食蠔時中毒嘅風險，會不厭其煩咁切開每隻蠔嘅肌肉，再把蠔肉反轉，以減低客人吃蠔時叉子弄破碎蠔殼，同時，一見有包住細菌小囊均會去掉，以策安全！

「蠔王」每日精選生蠔
（John’s Daily Oyster Selection）
由被雜誌喻為「蠔王」嘅John每日親自挑選4-5款新鮮時令飛機直送生蠔！生蠔隻隻手掌咁大，肉厚肥美，令人「愛不釋口」！亦可加上莎莎醬或三文魚子增加口感！食唔習慣生冷蠔嘅客人亦可以選擇煙肉芝士焗蠔，讓微温嘅芝士同蠔一齊係口中溶化！香氣四溢！

八蠔吧海鮮拼盤
（RB8 Signature Seafood Platter）（需提前一天預訂）（2-3人份量）
勁豐富嘅海鮮拼盤！侍應一拎出嚟全場嘩然！最啱手機食先！大大隻新鮮生蠔、青口、南美蝦、松葉蟹蟹腳、波士頓龍蝦、四頭扇貝仲有九孔鮑魚！

焗燒美國頂級嫩腰眼牛排
（12oz USDA Prime Grade Striuploin）

老闆特意挑選較厚身嘅嫩腰眼部位，令食客較容易食到牛排原有嘅質感、保留到牛排嘅肉汁，做到啖啖都咁Juicy又香牛味！

香煎鮮三文魚配香辣蕃茄莎莎醬
（10OZ PAN-fried Salmon topped with Salsa Sauce）
煎過嘅十安士優質挪威三文魚，勁香噴噴！配上自家製嘅香辣蕃茄莎莎醬，輕易帶出魚嘅鮮味同時令人食慾大增！

虎蝦鵝肝黑松露蘑菇燴飯
（Mixed Mushroom Black Truffle Risotto with Tiger Prawn & Foie Gras）
大大隻馬來西亞虎蝦加上匈牙利鵝肝，勁吸晴！唔只好睇得，仲好食得！Risotto用上正宗意大利黑松露醬加意大利米，煮到八成熟，口感一流！

Oystermine Restaurant (尖沙咀)

由藝人黃宗澤開設嘅西餐廳，主打生蠔同精品fusion菜，每日有多款來自不同國家產區及不同品種的生蠔供應。餐廳裝修時尚簡約，而且間隔清晰分明，格調舒適，務求讓客人係最舒適嘅環境下享受又睇得又食得嘅美食，絕對係週末約埋姊妹打卡嘅好去處！

蟶子鮑魚沙津伴咸柑桔番茄沙沙醬
(Razor Clam & Abalone Salad with Salted Kumquat Tomato Salsa)
新鮮嘅蟶子同鮑魚粒配上咸柑桔番茄沙沙醬，絕對係夏日清新refresh之選！

「菠蘿椰子風」乾式熟成薄切刺身級魚生漬
(Dry-Aged Sashimi Grade Fish Carpaccio with Pina Colada Foam)
以分子料理方式將雞尾酒Pina Colada制成泡泡，再配上自家Dry-age嘅時令刺身級魚生，入口微鹹中帶有菠蘿同椰子香味，充滿驚喜！

燒西班牙黑毛豬扒伴青蘋果洋蔥汁
（Roasted Spanish Iberico Pork Chop with Green Apple&Onion Sauce）

店內長期嘅熱賣菜式之一，厚切西班牙黑毛豬扒炭燒至勁juicy又嫩滑，配上由青蘋果蓉、洋蔥同紅酒秘製嘅醬汁，令人食唔停口！

新西蘭羽龍蝦意大利飯伴龍蝦汁
（Roasted New Zealand Scampi on Capsicum Risotto with Lobster Sauce）
店內選用新西蘭刺身級羽龍蝦，微微燒香表面至半生熟，中間配以魚子醬，再加上自家熬製嘅龍蝦汁，一口龍蝦肉再一口傳統意大利飯，啖啖都鮮味滿分！

Oystime 蠔灘 (香港仔)

「Oystime蠔灘」顧名思義係一間主打生蠔並提供各式西式餐點嘅餐廳。店內以冷色系配上木系傢俬為主，環境舒服，更設有蠔吧專櫃，滿滿嘅冰上擺放咗八至十二款每日新鮮空運到港，嚟自世界各地嘅時令生蠔讓食客選擇，係南區少有嘅蠔吧！仲要CP值極高！

每晩精選生蠔$10/隻
餐廳每日都會有一款精選生蠔做推廣$10/隻，勁抵食! 雖然係推廣價，但選材並唔會將貨就價，都係即叫即開，小編今次試嘅澳洲塔斯曼你亞蠔隻隻都肥大肉厚，勁鮮甜！值得一提嘅係$10生蠔係不設上限任點，仼叫唔嬲㗎，好大方呀！

石燒美國黑安格斯平鐵牛扒
特別選用可以保持高溫一段時間嘅熱火山石，讓客人可以DIY自行控制牛扒生熟程度，燒到適合自己口味。超級厚切嘅美國黑安格斯扒有成隻手指咁厚，足足成300g，超足料！只要簡單用天然海鹽同少量黑椒調味，燒熟後肉質鮮嫩，勁juicy，入口啖啖牛脂香！

燒原隻豬手
豬手燒到熱辣辣，豬皮又香又脆，啖啖肉得黎又唔會太肥膩，沾埋用芥末籽、洋蔥自家秘製嘅醬汁，酸酸地有效中和油膩感，份量啱晒兩三好友一齊開心share!

鹽燒原條沙巴龍躉
沙巴龍躉簡單加入海鹽然後原條燒熟，魚皮帶有鹽香，魚肉入口肉質紮實，有炭香味，魚油量足，可以沾埋自家秘製泰式醬汁一齊食，增添風味，值得一試！

心動不如行動！有興趣就快啲約埋三五知己去嘆下美食啦！

*以上圖片只供參考，所有食品以實物為準. 食品供應因餐廳而異

相、文：Tiffany