成日都話世界級，有無見過先？我見過，我真係見過：「烘焙甜點界世界盃」雙料冠軍名廚五十嵐宏嚟咗香港！今次嚟做Italian Tomato Grande Chef蛋糕系列第一擊嘅主角，除咗帶嚟三款首度喺香港發售嘅新蛋糕，餐廳仲設計咗一款有蛋糕嘅Tea Set，一次過滿足哂三個願望！
今年Italian Tomato推出Grande Chef計劃，嚟緊呢一年都會搵唔同嘅大師合作推出Crossover蛋糕。第一擊就搵咗喺2010年Amoretti世界糕點團隊錦標賽當中勇奪團體錦標賽雙料冠軍嘅名廚五十嵐宏，三款皇者蛋糕都各有特色，而且有一款仲大有來頭㗎。
呢款PIXY開心果脆慕絲蛋糕就係當時五十嵐宏喺世界糕點錦標賽嘅參賽作品，既係總冠軍亦得到「最佳味覺項目」大賞！而嚟到香港亦依然堅持嚴選食材，100%採用新鮮空運嘅日本北海道牛乳，所以忌廉特別輕盈。開心果慕絲加咗法國白朱古力，香甜交融，入口即溶。內層仲加咗士多啤梨忌廉同啫喱，所以蛋糕入口舌尖會先試到士多啤梨嘅微酸，然後白朱古力嘅甜同開心果嘅香味會慢慢滲出嚟。
另一款ORKA法國朱古力五重奏就絕對係朱古力迷嘅摯愛，一樣100%採用北海道牛乳，加入法國牛油同64%法國朱古力。五重奏分別係表面帶光澤嘅鏡面朱古力，然後係幼滑嘅朱古力醬、朱古力慕絲、可可脆餅、特製朱古力淋醬同底嘅杏仁朱古力餅底。特別值得一提嘅係中間嘅可可脆餅夠香脆，增加咗成個蛋糕嘅口感同味道層次。蛋糕整體唔會太甜，而係富可可香味嘅濃滑朱古力味。
最後一款係PINK玫瑰白桃慕絲蛋糕，有名你叫PINK，粉紅色蛋糕加馬卡龍，少女們見到立刻心心眼啦！比起PIXY或者ORKA，呢款無論口感同味道都Light好多。用荔枝、紅桑子同玫瑰做慕絲，中間係清甜嘅白桃慕絲鬆軟海綿蛋糕。無論係玫瑰定各款水果味道都平衡有致，而且花果香味令呢款日本蛋糕加咗啲法國嘅浪漫氣息。
不過三款口味咁多，每次都要買成個返屋企試咪要食好耐？唔緊要，嚟指定Italian Tomato Café同夢見屋食最優秀受賞の甘味Tea Set就得。每次Tea Set都有其中兩款蛋糕，有蛋糕之餘亦有三款鹹點，而且仲係女孩子最愛嘅Afternoon tea（好似係），仲唔係一次過滿足哂三個願望？
三款鹹點分別係有邪惡流心蛋嘅煙花頌、細細粒但「芝」味十足嘅車厘茄芝士杯，同煙燻三文魚三重奏。不過煙燻三文魚三重奏就稍嫌煙三文魚太健康，唔夠肥美所以味道唔夠，反而比麵包裡面嘅Wasabi搶咗風頭。
Tea Set同蛋糕一樣2月15號開始發售，2月15號先登場嘅係PIXY同ORKA，到4月1號就輪到PINK同PIXY。最後開飯仔比個提示你，嚟食Tea Set嘅話先食鹹食，蛋糕就按口味由淡到濃咁食，最Light嘅係PINK，最濃味嘅係ORKA，唔好搞錯呀！
Italian Tomato X五十嵐宏聯乘系列
*蛋糕不作現場購買，只設預先訂購。
PIXY及ORKA只在2016年2月15日至3月31日期間發售；
PINK只在2016年4月1日至5月15日期間發售
最優秀受賞の甘味Tea Set(二人用)只限指定Italian Tomato Café及夢見屋
2016年2月15日至3月31日供應之蛋糕款式：PIXY+ORKA
2016年4月1日至5月15日供應之蛋糕款式：PIXY+PINK