【開飯熱店入圍名單巡禮】深水埗食肆新舊融合

話說今屆開飯熱店大賞又嚟喇，開飯仔就委託咗最Like瓹窿瓹罅搵食嘅喵星人，合組「為食貓偵探團」，上山下海、一帶一路偵查全城大大小小講飲講食情報，廿四小時儘量不眠不休咁四出發掘屬於港喵（oops，唔係，係港人）嘅真正味道。

根據餓底貓早排微服出巡嘅匯報，深水埗作為傳統舊區，理所當然咁有好多傳統食店，不過亦都發現到裡面有唔少潮流食店，今次佢就帶埋美食隊長同公主貓一齊落區搵食嘞！

足料豬潤麵　　維記咖啡粉麵

Photos by phyllis903 & Missnomnomz
一落到深水埗，餓底貓就已經即刻嗌肚餓，於是就入咗地鐵站附近嘅一間茶記。白色階磚牆、木枱木櫈，簡單紅字掛牆餐牌，經美食隊長驗證係極傳統舊式茶餐廳。目測統計，嚟親呢度十個有八個都係嗌豬潤麵同咖央西多。

碗豬潤麵好足料，啲豬潤多到數唔到有幾多塊，全部都煮到啱啱熟，好爽，亦都好新鮮。有啲人好怕食豬潤，因為怕佢嗰陣羶味，不過喺度絕對可以一試。維記加咗薑粒去煮，辣辣地之餘仲可以辟走嗰陣羶味，隊長話嘅。而咖央西多中間層醬就係用雞蛋、鴨蛋、牛油同埋糖整嘅，成件西多都好有蛋香味，外層脆脆地而麵包又軟綿綿咁，係港式西多嘅味道，加上本身夠甜，連出名食開大甜嘅公主貓都唔使落糖漿。

排長龍蛋牛治　　新香園 (堅記)

Photos by Pillowdor & natfoodiary_
呢間餐廳大約有五六十年歷史喇，係呢區嘅傳統冰室，仲要係少有地24小時營業㗎，成日都好多人喺門口排晒隊咁等，呢三隻為食貓就決定進行實地考察，睇下點解咁長龍。驟眼睇，啲伙計手腳都好快，落單快、上菜快，啲客人食嘢都好快，走都好快。咁，惟一嘅解釋就係真係好多人嚟食（應該係）。

好多人應該都係慕豬手麵同蛋牛治之名而嚟。豬手炆得好腍好香口，食得到淡淡嘅南乳香味。湯底好夠色水，但又冇想像中咁鹹，餓底貓食完都唔會覺得好口渴。至於蛋牛治，識嗌一定係嗌烘底，夠晒鬆脆。仲有少少蛋汁嘅煎蛋夾住滑牛，成件事都好滑，拎上手仲有少少微溫，拿拿臨食埋佢先。不過隻公主貓嘅甜癮又發作，叫埋個紅豆冰畀佢。紅豆冰其實係起源於香港嘅冰室，喺呢度再嗌返杯嚟飲又的確幾有味道。椰奶味香，紅豆味甜，溝埋一齊一啲都唔笨！

邪惡芝士雞煲　　米走雞

Photos by gordonkcchin & conconyan
深水埗食雞煲嘅餐廳都幾多，喺美食隊長「同朕Check下」嘅一聲令下，餓底貓就即刻check咗呢間餐廳嘞。人食雞煲喵食雞煲，餓底貓食都食得特別邪惡，一大煲雞都不特止，仲要係淋晒芝士粒同芝士湯底嘅芝士雞煲！一滾起，就成煲都係金黃色嘅芝士流漿，夾起嚿雞就會拉芝嘅效果，芝士味極重！啲雞啖啖肉，呀唔係，係啖啖芝士同肉，食到連一向嘴尖尖嘅公主貓都冇聲出，密密食。

食到咁上下，要加水，加嘅係芝士湯呀！成煲嘢繼續濃厚嘅芝士味，為食嘅餓底貓當然唔會放棄呢啲機會啦，繼續叫餸打邊爐，食乜都有芝士味！不過重點係，公仔麵！將個公仔麵放入個煲度煮，咪變咗芝士撈丁囉，又係邪惡嘅，不過隊長都冇制止，梗係繼續食啦。

黐線芝士三文治　　Holy Chef

Photos by olfooddiary
芝士嘅魅力一向冇得擋，以為食輕食就可以冇咁邪惡咩？少年你太年輕喇，經常捐窿捐罅搵好嘢食嘅餓底貓又立大功，今次搵到嘅呢間餐廳位置都幾偏下，唔開住地圖都未必識路。不過呢間隱世小店就有啲隱世美食囉，跟我讀一次「黐線芝士黐住三文治」先啦，Sor，不過讀到都未必有得食，淨係平日先有㗎咋！

黐線芝士火腿三文治係真係黐晒線㗎，我指啲芝士，熱辣辣上碟，即到即拉，就可以拉到好長嘅芝士絲喇，所以美食隊長今次就禁止咗佢兩隻喵嘅相機食先，立馬拉一拉咬咗啖先。嗯，係好香濃嘅芝士味呀，塊火腿又超級厚，呢啖好滿足。除咗啲餡，底面嘅麵包都有睇頭㗎，有紅色同黑色揀，紅色嘅係紅菜頭味，甜甜地好清新、黑色嘅就係竹炭，旁邊仲有薯條同沙律，一有沙律個感覺即刻冇咁邪惡，哈哈。

十蚊有找豆腐花　　公和荳品

Photos by yatding
公主貓忍唔住要帶返一次路喇，佢目標非常之咁清晰咁向住北河街方向一直行，行到呢間舊式舖頭前面就停低咗嘞。望一望，附近係街巿，舖面又賣緊豆腐，間舖又細間，得幾張枱，真係要入去？公主貓冇理咁多，一馬當先已經入去自己搵咗個位坐，餐牌都唔使睇咁就叫咗兩碗豆腐花嘞，一冷一熱。見到公主貓咁主動，隊長同餓底貓都跟住叫，仲嗌多杯豆漿添。熱又好凍又好，啲豆花都係一樣咁滑，而且豆味相當重。豆花本身已經落咗糖水，都夠甜。不過，嗜甜嘅公主貓就梗係再瘋狂落黃糖啦……

隊長最後再望一望多次份兩隻喵交嘅report，Little Break Coffee & Kitchen、合益泰小食、品香樓中西風味餐廳、程班長台灣美食同Burgerman都係榜上有名㗎，揀啱就去投票啦！

投票網站：http://tiny.cc/op_2016

文：Kar

隨時接收最新資訊
讚好OpenRice專頁！