第五位 時新快餐店
戰績：獲獎9次－最優秀九龍城開飯熱店 (2011-2015), 最優秀開飯快餐店 (2011-14)
Photos by natfoodiary_ 呢間係真‧香港味道嘅快餐店。鋪頭由60年代起營業至今，店內仍保持舊式快餐店嘅裝潢，時代興懷舊，真係為咗佢老店嗰名都要嚟撐吓場。時新嘅招牌係漢堡包，牛肉係新鮮手打，肉感自然鬆軟又有肉汁，熱辣辣嘅煎蛋將芝士融化，加上秘製嘅酸甜沙律醬，成個味道都好有層次感。
第五位 維記咖啡粉麵
戰績：獲獎9次－最優秀開飯粥粉麵店 (2008-15), 最優秀深水埗開飯熱店 (2015)
Photos by Your Marvellous Angel N又係一間充滿香港味道嘅「優等生」，入到嚟十個有九個都係order碗豬潤麵嘆吓，亦難怪，當你已經接受咗「呃秤是常識吧」呢個事實，居然發現佢嘅豬潤多到就瀉，咪話有幾咁感動！最驚喜嘅係，有量亦有質，傳說中佢啲豬潤好新鮮，入口即融咁誇張！未知佢可唔可以用煮豬潤嘅技巧融化廣大食家嘅心，喺開飯大賞再下一城呢？
第五位 鼎泰豐
戰績：獲獎9次－最優秀開飯京川滬菜館 (2009-10, 2013-15), 最優秀尖沙咀開飯熱店 (2009-2012)
Photos by 樂斐兒由台灣殺出一條血路，賣小籠包賣到世界各地都有分店。鼎泰豐出名製作嚴謹，就好似小籠包咁，為咗食落更有口感，必須嚴守「黃金18摺」。而且皮薄餡多，望落去已經可以睇到入面啲餡咁款，絕對係大師級製作，大家見佢咁有誠意都要加分啦。
第四位 澳洲牛奶公司
戰績：獲獎10次－最優秀尖沙咀開飯熱店 (2014-15), 最優秀開飯港式茶餐廳 (2008-2015)
Photos by Eatnonstooop澳牛代表咗港人做事嘅真諦－快！望著澳牛店外長期都人滿為患，但係點解排隊時間又唔長？因為呢度啲侍應全部都係真‧漢子！喺呢度由點餐到上菜時間唔夠一分鐘，聽聞喺澳牛影張食物照係食客嘅終極目標，因為一旦侍應發現你無專心食，就會俾小小「溫馨提示」你。講番正題先，澳牛確實係口碑之選，最出名係簡單嘅炒蛋，炒至半生熟，嫩滑非常，蛋香濃郁，相信日後淨賣炒蛋都可以做唔休。
第三位 九記牛腩
戰績：獲獎11次－最優秀中西區開飯熱店 (2008,2011, 2013-14), 最優秀開飯粥粉麵店 (2009-15)
Photos by Gretel Wang 中環巨頭之一，鋪頭長年累月排著人龍。見到鋪頭名就知招牌係牛腩，可以嗌個上湯牛腩麵，湯底用藥材同牛骨熬嘅，飲落鮮味十足，唔再係味精湯，而牛腩亦好入味，如果你重口味嘅話，仲可以選擇咖喱湯底。
第二位 肥姐小食店
戰績：獲獎12次－最優秀開飯小食店 (2009-15), 最優秀旺角開飯熱店(2009,2011,2013-15)
Photos by 為食MoJil作為一間小食店可以拎咁多次獎，其實真係好勁。食物品質固然係優質，但亦可能係香港人心入面對掃街、地道美食有種情意結。喺呢度嘅客人最鐘意試佢嘅皇牌套餐，入面有墨魚、雞腎同生腸。所有嘢都厚切大舊，食物新鮮食落又爽口，加上老闆秘製嘅醬汁，味道更上一層樓。
第一位 勝香園
戰績：獲獎15次－最優秀中西區開飯熱店 (2008-2015), 最優秀開飯港式茶餐廳 (2009-2015)
Photos by hkfoodom常勝將軍榜首－勝香園！聽個名你可能會想像一間環境優雅、鳥語花香嘅餐廳，其實佢係一間簡單嘅鐵皮檔，屹立喺中環美輪街一級級石階旁，甚有老香港風貌。賣嘅，仍然係老香港味道，最出名係鮮番茄牛肉麵，番茄湯底以香濃茄味見稱，當然啦，以新鮮番茄打成，仲有得假嘅？仲有檸蜜脆脆都係一大賣點，麵包炸得香脆，望落去金黃色咁，一睇就好吸引，奶油混檸蜜，酸酸甜甜甜咁，口感一流。唔知佢喺今年開飯大賞可唔可以繼續稱霸呢？
好啦大熱我哋就睇晒架啦，到底佢哋今年可唔可以繼續拎獎，就要等5月4號嘅頒獎禮揭盅喇！
文: 段
投票網站：http://tiny.cc/op_2016
隨時接收最新資訊
讚好OpenRice專頁！
Keyword
開飯熱店大賞
入圍名單
全城人氣
地道美食
港式小店
Copied to Clipboard