食零食都係想開開心心過口癮，所以試新品同時要揀到啱心水嘅口味。2024年開飯仔會繼續搜羅便利店、超巿、零食店、啤酒舖等新款食零，第一時間開箱試真啲！
11月21日更新
日清 韓式牛肉拌粉絲 / 韓式炒雞拌粉絲 / 韓式三重芝士拌粉絲
銷售點：惠康超級市場、百佳超級市場
3款全新嘅冷凍韓式系列，都以拌粉絲做主題，其中最經典嘅當然係韓式牛肉拌粉絲！醬汁夠濃味，但急凍包本身冇拌勻醬汁，所以粉絲未能夠撈得均勻入味。配菜唔算多，大約4-5片牛肉，但意外地唔嚡口，算幾濕潤𠻹。而1包嘅分量做lunch略少，下午茶比較合適。
淘大點心 至尊鮮蝦餃皇
銷售點：各大超市
淘大點心嘅頂點系列推出新成員「至尊鮮蝦餃皇」，用健康嘅芥花籽油製作外，餡料量比「淘大晶瑩蝦餃王」增多70%，外形飽滿，切開見到粒粒蝦肉，食落的確爽口彈牙。
嘉頓 椰子朱古力咖啡味迷你瑞士卷
銷售點：各大便利店、超級市場
迷你瑞士卷系列換上新裝外，仲推出全新口味～椰子朱古力咖啡味嘅夾心加入少量椰絲，帶淡淡椰子香氣，而朱古力咖啡忌廉就比預期嘅light，整體唔會過甜，做早餐配返杯茶啱啱好。
瑞士蓮 開心果軟心朱古力
銷售點：各大便利店、超級市場
外層嘅牛奶朱古力同開心果味軟心都好幼滑，而牛奶朱古力味相對較重，蓋過開心果嘅味道；不過軟心內餡好足料，咬開有爆漿感覺幾滿足。
PRIME Hydration檸檬青檸味 / 藍桑子味
銷售點：7-11
電解質運動飲品畀人感覺味道一般，但呢款就有啲似果汁，藍桑子味仲出奇地有啲似荔枝味。品牌標榜無添加糖同咖啡因，更特別加入10%椰子水，可能因為咁，以運動飲品嚟講佢幾易入口。
碧泉 鴨屎香有氣檸檬茶 / 雙檸茉莉氣泡茶 / 鴨屎香檸檬茶 / 鴨屎香荔枝茶 / 青芒鴨屎香檸檬茶
銷售點：各大超市、便利店、士多辦館、網購平台
碧泉全新嘅五款茶飲，分為「鴨屎香」同「氣泡茶」系列，其中「雙檸茉莉氣泡茶」既有茉莉香氣，亦有陣陣檸檬味，氣泡感十足，融合得幾好有驚喜。另外青芒鴨屎香檸檬茶係比較少見嘅組合，不妨一試。
10月21日更新
卡樂B 蝦子拌麵味薯片
銷售點：7-11、OK便利店
期間限定嘅蝦子拌麵味薯片，由大開包裝到入口，都有明顯嘅「蝦」味，有種用蝦殼整調味粉嘅感覺，但「拌麵」部分則欠奉。整體味道可以，但貼題度可以再作調校。
生力 柑橘梳打酒
銷售點：7-11
好啤酒嘅朋友，7-11近日又有新品，其生力嘅柑橘梳打酒幾有新意～呢款無糖梳打酒呈透明顏色，就咁睇冇「柑橘」嘅感覺，入口有微微嘅水果香同甜味，冇苦澀感，幾易入口，而且只有5%酒精，好啱女士聚會飲用。
BASE BREAD 大理石朱古力麵包 / 楓糖麵包 / 肉桂麵包 / 日式咖喱麵包 / 提子乾味迷你吐司
銷售點：7-11
日本品牌新推出5款麵包，以富含33 種營養素為賣點，當中包括豐富蛋白質、膳食纖維、25種維生素、礦物質等；而包體使用全麥麵粉、大豆、奇亞籽等10多種天然成分製成，冇合成色素或防腐劑。開飯仔試咗日式咖喱麵包，包體比一般麵包實淨，有啲似全麥麵包嗰種足料而乾身嘅口感；餡料唔算多，但日式咖喱味幾香，亦有辣勁。
8月30日更新
卡樂B Jagabee茄汁味波浪薯條
銷售點：各大超市、零售店
今次嘅波浪造型更加還原「薯條」感覺，同直條形相比似乎粗少少，口感就冇太大分別，都係脆卜卜；茄汁味調味粉充足，酸甜味突出。
卡樂B 什菜薯條茶碗蒸味 / 番茄羅勒意大利麵味薯片
銷售點：7-11
什菜薯條難得出新款呀～茶碗蒸味先甜後鹹鮮，初初食有少少唔慣，但食多幾條又OK。而番茄羅勒意大利麵味薯片幾有驚喜，唔係純番茄味，有啲「肉醬意粉」嘅風味。
紅櫻花食品 Hello Kitty造型紅豆麻糬餅
銷售點：7-11
台灣伴手禮品牌以Hello Kitty造型餅裝住紅豆麻糬餅，連餅皮都壓成Hello Kitty造型，啱晒Fans入手呀～餡料有滿滿嘅紅豆泥，以蜂蜜提味後甜度適中，但麻糬相對較薄，口感同味道就冇咁突出。
維他奶 低糖士多啤梨豆奶
銷售點：各大便利店、超級市場
全新嘅低糖士多啤梨豆奶，入口的確唔太甜，可能因為加入真士多啤梨汁，連代糖都唔使落。呢款標榜不含膽固醇、零反式脂肪、低飽和脂肪，tea time想飲啲嘢過吓口癮係唔錯嘅選擇。
8月21日更新
三養 泡菜忌廉汁闊麵 / 韓式忌廉汁烤肉味闊麵
銷售點：7-11
呢兩款攞到Halal清真認證嘅闊麵，都係韓式口味㗎！泡菜忌廉汁闊麵唔會太辣，乾蔬菜包亦真係有加入泡菜，酸中帶甜幾開胃；想傳統啲則可以揀韓式忌廉汁烤肉味闊麵，而麵條方面都算彈牙，整體嚟講幾有新意。
8月21日更新
卡樂B 熱浪香辣味粟一燒
銷售點：7-11
熱浪近年有唔同嘅食品crossover，今次就將其香辣味道融入粟一燒，辣味適中，平時少食辣嘅朋友都可以一試，不過唔太還原到熱浪薯片嘅感覺。
卡樂B 宅卡B薯條法式龍蝦湯味
銷售點：7-11
脆薯條今次推出期間限定法式龍蝦湯味，蝦味幾明顯，但鍾意重口味嘅朋友可能會覺得未夠鹹。
Lay’s 真脆薯條 - 番茄味 / 紫菜味 / 原味
銷售點：7-11
Lay’s都有脆薯條喇，設有經典嘅番茄、紫菜同原味。其中番茄味一打開就有陣酸甜味飄出嚟，薯條亦沾滿味粉，食落幾濃味。
嘉頓 「粒粒」忌廉威化 - 士多啤梨乳酪味 / 榛子朱古力味 / 芝士豆乳味
銷售點：指定超市、7-11
3款新登場嘅「粒粒」忌廉威化，夾心量增加35%，有士多啤梨乳酪味、榛子朱古力味同芝士豆乳味，其中芝士豆乳味道比想像中輕盈，食到淡淡嘅芝士味。
雀巢 雀巢咖啡韓國嚴選冷萃黑咖啡 / 雀巢咖啡韓國嚴選牛奶咖啡
銷售點：7-11
真韓國製造～齋啡嘅純粹味道唔係人人接受到，但呢款以冷泡萃取方式，選用100%阿拉比卡三大咖啡豆源製作嘅咖啡，味道較輕薄，讓人更容易接受。但鍾意有一點甜嘅話，同樣韓國製造嘅牛奶咖啡都唔錯。
真露 真露氣泡酒 - 鳳梨味 / 麝香葡萄味
銷售點：7-11
真露燒酒酒精濃度較高，想負擔輕啲而家可以考慮真露氣泡酒喇。鳳梨味同麝香葡萄味都係5%酒精，甜甜哋唔會有糖水嘅感覺，加埋明顯嘅氣泡感覺，幾啱同閏蜜開party或午後輕酌。
飲啦 爆菊瓶裝雞尾酒 / 魔檸瓶裝雞尾酒
銷售點：7-11
呢兩款香港製造嘅雞尾酒，「爆菊」集合7種菊花，包括杭白菊、胎菊、昆侖雪菊等，再加入伏特加、秘製蜜糖同蘋果汁，扭開樽蓋有淡淡菊花香氣。而「魔檸」就保留到檸茶嘅感覺，加入杜松子酒、薄荷精油等材料，係意料之外嘅夾。
7月31日更新
卡樂B 黃金海苔味薯片 / 日式芥末沙律味薯片
銷售點：7-11
期間限定嘅黃金海苔味薯片，睇落有好多味粉，但鹹蛋味唔算好突出，但配海苔粒粒，鹹香味幾有層次。而日式芥末沙律味薯片，好似唔多味料，反而芥末味幾「攻鼻」，味道就唔太辣。
7月9日更新
喜馬拉雅軟糖 蜂蜜檸檬味 / 巴西莓櫻花味 / 薄荷味
銷售點：7-11
呢3款軟糖都有冰涼嘅薄荷感覺，但當然以薄荷味最強勁，但唔似食「牙膏」嘅。而蜂蜜檸檬味有種潤喉感覺，蜂蜜味突出；如果同巴西莓櫻花味相比，兩款甜度差唔多，但後者會帶微微莓果嘅酸味。
卡樂B 椒麻味蝦條
銷售點：7-11
花椒同辣椒香氣唔會互搶，微辛辣味易入口，麻度就唔算好突出，平時唔食辣嘅朋友都可以一試啊。
湖池屋 周打蜆湯味 / 披薩味餡批餅乾
銷售點：7-11
鍾意千層酥皮嘅朋友，呢款迷你千層批小食就啱你喇～周打蜆湯味同披薩味都幾像真，前者味道柔和啲，後者就開胃啲，鹹鹹甜甜幾過癮。
艾丁格 小麥啤酒／小麥白啤酒
釀酒狗 黑色心臟／印度淡色艾爾啤酒
喜力 星銀啤酒
HOEGAARDEN 柚子白啤酒
銷售點：7-11
歐國盃進入尾聲，梗係買定啤酒睇比賽先過癮～上圖嘅啤酒之中，由黑啤、IPA到白啤都有，而特別口味就有HOEGAARDEN嘅柚子白啤酒，甜度適中又自然，男女都啱飲。
7月8日更新
維他™ 氣泡蘋果綠茶
銷售點：各大超級市場、7-11、OK便利店、HKTV Mall
氣泡茶系列今次嘅新成員，係蘋果綠茶味，入口先有明顯嘅綠茶味，再到蘋果味，甜度適中，配合細緻嘅氣泡，冷藏後更加refreshing。
EMPHASIS × 180 Popcorn 薑味爆谷
銷售點：180 Popcorn香港分店
珠寶品牌聯乘爆谷品牌，獨家推出薑咪爆谷，入口薑味唔會好搶，意外地同爆谷嘅甜味幾夾，仲有少少焦糖嘅感覺𠻹。
6月11日更新
味味一品 天香川味牛肉麵
銷售點：7-11
台灣嘅牛肉碗麵一向出色，今次推出嘅天香川味牛肉麵，咪以為有「川味」就好辣，食落似加咗麻香嘅濃味牛肉麵，容易入口。而牛肉有4至5粒，有少少牛筋，分量唔錯，近筋位嘅肉會軟腍啲。
LOTTE 昭和復古布丁味泡芙 / 平成懷舊提拉米蘇味
銷售點：7-11
呢兩日式甜品味道好像真！昭和復古布丁外層鬆脆，入層嘅鮮奶油餡好幼滑，而且有明顯嘅糖醬味𠻹。而平成懷舊提拉米蘇味，就喺餅乾條內注滿提拉米蘇棉花糖夾心，香甜得嚟唔會蓋過「提拉米蘇」嘅咖啡味。
OREO 夾心餅寵物小精靈版
銷售點：7-11
OREO聯乘寵物小精靈推出朱古力香蕉口味OREO餅乾，一打開就有聞到陣陣香蕉味，但輕返啲會自然得多，加埋朱古力夾心都幾啱螞蟻人口味。而加分嘅係餅乾印上皮卡丘圖案，卡哇伊呢～
5月17日更新
Melona 韓國雪糕杯（蜜瓜口味／士多啤梨口味）
銷售點：7-11
由雪條變成雪糕，味道冇太大出入，士多啤梨口味有9%係士多啤梨醬，令味道更濃郁；蜜瓜口味則然後香甜清清地。雪糕質感偏「黏實」，食落冇雪條咁fresh。
雙葉 「四季春奶蓋珍珠雪條
銷售點：Circle K
來自台灣嘅雪條，梗係有當地特色～將四季春奶蓋珍珠變成雪條，有清香嘅葉味，因為混合咗四季春、紅茶同綠茶；而頂層嘅芝士奶蓋唔會好膩，加埋煙韌嘅黑糖珍珠，消暑唔錯。
日本樂天 Hello Kitty蘋果批味小熊餅
銷售點：7-11
為慶祝Hello Kitty 50週年，日本樂天小熊餅聯乘Hello Kitty推出蘋果批味小熊餅，入口酸甜之外，包裝盒同小熊餅都印有Hello Kitty蝴蝶結，充滿童真呀！
維他奶 維他奶低糖香蕉豆奶
銷售點：7-11、OK 便利店、惠康及百佳旗下全線超市
香港都有自己嘅蕉奶喇！呢款豆奶加入真香蕉汁，採⽤低糖配⽅，無添加代糖，聞到陣陣香蕉嘅香氣，甜度比韓國嗰款低，感覺相對「真」啲。
紅牛 巨峰提子味能量飲品
三得利 CRAFT BOSS柑橘味無糖冰紅茶 / 水果茶 / 檸檬茶 / 柚子茶
銷售點：7-11
果味飲品近期有唔少新款，好似紅牛嘅巨峰提子味能量飲品，提子味幾濃，口感有啲似梳打，好易入口。而三得利嘅茶飲，就有水果茶、 檸檬茶同柚子茶，其中水果茶包括橘子、蘋果、桃子、鳳梨同芒果，甜得嚟唔似糖漿嘅死甜，雪凍更加解渴。
CHOYA 梅酒梳打
三得利 STR ZERO青蘋果酒
樂天 清河蘋果氣泡清酒
銷售點：7-11
酒類飲品都有新選擇，其中CHOYA梅酒梳打用紀州產南高梅釀製，冇加入任何酸味劑或香料，味道天然唔太甜，而且只有4%酒精，平時午後飲罐chill吓都唔錯。
Calbee CALBEE JP 香草醬味薄薯片
銷售點：7-11
平時嘅薯片主要圍繞鹹、辣、甜嘅味道，呢款就令開飯仔諗起香草醬意粉。打開聞到明顯嘅香草醬味，食落味道都突出嘅，帶少少鹹香。不過最好嘅係細細包，方便過吓口癮。
4月27日更新
卡樂B PoteRich 海老牛油味薯片
銷售點：7-11
呢款期間限定口味，海老嘅香氣比味道明顯，而牛油味幾溫和，整體味道鹹鹹香香，唔會好膩同太濃味。如果配飲品，淡身嘅啤酒都唔錯啊。
Ace Bakery生布朗尼宇治 / FUJIYA抹茶朱古力軟曲奇
銷售點：7-11
抹茶控注意，期間限定宇治抹茶「生」布朗尼蛋糕，同埋日本由老字號茶商監製嘅軟曲奇香港都買到喇～前者相對冇咁甜膩，抹茶味亦比較明顯，入口鬆軟；後者則加入荷蘭朱古力粒，兩款單件都細細塊，配咖啡做茶點啱晒。
KOKUAJI 意大利芝士蛋糕味雪糕
銷售點：全線惠康超級市場、Market Place、3hreesity、Oliver’s The Delicatessen之香港店舖獨家發售
如果你係咖啡或Tiramisu嘅fans，呢款意大利芝士蛋糕味雪糕就啱晒你喇～品牌今次再度聯乘咖啡品牌UCC，加入UCC The Blend 117 即溶咖啡、幼滑嘅芝士同北海道牛奶，入口係明顯嘅咖啡味，質感實在仲幾香滑𠻹。
3月26日更新
卡樂B x KFC巴辣雞腿包味薯片
銷售點：KFC、各大超級市場、便利店、零售店
卡樂B再度聯乘KFC，將香辣「巴辣雞腿包」變成薯片！入口幾明顯試到香甜嘅蛋黃醬味，後勁開始有雞腿味，整體嚟講酸甜微辣，還原度幾高。
LINE FRIENDS 鹹蛋黃味忌廉泡芙／檸檬味蛋糕
銷售點：7-11
以人氣角色LINE FRIENDS作包裝嘅忌廉泡芙同海綿蛋糕，前者口感鬆脆，鹹蛋黃味忌廉幾濃厚，亦比想像中冇咁油膩，略有驚喜，不過最好嘅係佢細細粒，可以分散負擔。後者口感鬆軟，有淡淡檸檬香，幾清新。
明輝印尼蝦片醬香醉蝦味
銷售點：7-11獨家發售
明輝蝦片百份百由印尼蝦坯直接炸製，但今次嘅醬香醉蝦味醬料味比較激烈，開頭唔太食到蝦味，反而「酒」嘅感覺比賽強烈。
品客韓式正宗烤肋排風味薯片 / 品客美式煙燻火烤BBQ風味薯片
銷售點：7-11
品客新出嘅韓式正宗烤肋排風味薯片，烤肉醬相對淡少少，如果你偏好重口味，美式煙燻火烤BBQ味比較適合你，皆因入口有明顯嘅柴燻香氣，風味更突出，再配上特製烤肉醬、匈牙利語紅椒、孜然同大蒜香點綴，味道豐富啲。
阿部幸螺絲粉形芝士條／GLICO煙燻芝士味餅乾
銷售點：7-11
芝士控要試嘅有呢兩款：阿部幸螺絲粉形芝士條其實係將新鮮製作嘅意大利麵油炸，打開包裝芝士味幾香濃，而芝士條沾上少少黑胡椒，鹹香惹味。另外GLICO煙燻芝士味餅乾，將燻製過嘅芝士烘烤成薄薄嘅椒鹽脆餅，煙燻香氣啱啱好，幾適合開罐啤酒，一邊食一邊睇電視。
3月11日更新
7-SELECT x 嵜本：三重芝士雲朵吐司 / 忌廉芝士法式車輪酥 / 丹麥吐司 / 雙重芝士燒餅包 / 雜莓芝士忌廉瑞士卷 / 檸檬芝士忌廉泡芙 / 雜莓芝士忌廉蛋糕 / 芒果夾心芝士慕絲蛋糕
銷售點：7-11
7-SELECT首次聯乘SAKImoto Bakery（嵜本ベーカリー）打造8款期間限定烘焙產品同甜點，既有招牌生吐司，亦有人氣嘅芝士元素。其中忌廉芝士法式車輪酥內裡有澳洲忌廉芝士，面層則沾上朱古力，份外酥脆；另外雙重芝士燒餅包內裡有美國車打芝士醬，包面則鋪上英國車打芝士同紐西蘭巴馬臣芝士粉，味道鹹香，叮熱嘅話芝士味會更突出。另外雜莓芝士同檸檬芝士甜品由日本直送，甜品控都可以一試。
維他 – VLT Zero 維他0糖檸檬茶
銷售點：7-11、Circle K、惠康、百佳及其他銷售點
標榜「0糖0卡⼀樣可以澀得起」嘅維他檸檬茶，茶色比原味淡，雖然無糖，但飲落都會有甜品，只係相對較淡，感覺好似將原味稀釋，但保留「澀」嘅味道。未至於有好新奇嘅感覺，但想追求較健康嘅飲食習慣，都係一個選擇。
Lavelee 柚子蜜乳酪雪糕
銷售點：Circle K
韓國人氣品牌Lavelee乳酪雪糕系列，推出春日新品「柚子蜜乳酪雪糕」。呢款雪糕結合品牌皇牌乳酪雪糕嘅口感，以及韓國柚子蜜，初入口時帶點微酸，慢慢會食到清新嘅柚子蜜味道，而且質感香滑，整體嚟講唔錯。
Ísey Skyr 冰島乳酪系列（8款口味）
銷售點：Market Place、Fusion、TASTE、city'super等指定超級市場
嚟自冰島嘅乳製品品牌近月正式登陸香港，乳酪系列有8款口味，比較一般品牌多元化，其中原味同加入新鮮雲呢拿籽嘅雲呢拿味都係零脂肪，適合健康人士同健身愛好者。而無乳糖嘅咖啡朱古力、藍莓紅莓同椰子味則適合乳糖不耐嘅人士。如果想特別啲，焦糖布甸味坊間少見。乳酪唔算好酸，都易入口，而且口感綿密，感覺幾足料。
雀巢DRUMSTICK 士多啤梨脆爆粉紅CONE
銷售點：各大便利店、超級市場
士多啤梨脆筒回歸變成常駐口味喇～雪糕同脆筒都係少女心嘅粉妅色，而面層嘅櫻花味朱古力碎就轉為常駐口味嘅香烤花生碎，雪糕味道酸酸甜甜，做飯後甜品幾醒胃，之前未試過嘅朋友不訪試試。
卡樂B 沙嗲串燒味薯片／香蒜辣椒醬味薯片
銷售點：7-11
今次嘅新口味有兩款，包括東南亞風味嘅沙嗲串燒味薯片，以及具葡萄牙風情嘅香蒜辣椒醬味薯片，而後者味道較像真，可能因為辣椒醬味道較鮮明嘅辣椒、洋蔥等多種香料，味道層次相對豐富啲。
CJ 韓式烤豬肉拌飯 / 蛋黃醬雞肉拌飯
銷售點：7-11
韓國即食飯出名方便，今期引入當地人氣品牌拌飯，包括韓式烤豬肉同蛋黃醬雞肉口味。韓國珍珠米即食飯質感軟糯，而烤豬肉拌飯幾啱鍾意濕潤口感嘅朋友，拌勻之後每粒飯都可以沾上偏湯水質感嘅醬汁，每啖都食到香菇或肉料。當正餐食就未必夠飽，但幾啱早餐鍾意有「米氣」落肚嘅朋友仔。
BOSS 焦糖咖啡
銷售點：7-11
無啡不歡嘅朋友又多一個選擇喇～BOSS推出焦糖咖啡，一開蓋就聞到焦糖香氣，但飲落唔會好甜膩，而咖啡嘅香會慢慢滲出嚟；口感順滑偏薄身，飲晒一枝（250ml）都唔會頂住個胃。
2月19日更新
森永 Beard Papa奶油泡芙味夾心餅
銷售點：7-11
將冷藏版奶油泡芙變成夾心餅，入口少咗泡芙面層有層「油」嘅感覺，而中間嘅奶油相對冇咁軟身，餅乾則口感鬆化，帶淡淡嘅牛油香，幾啱配味道較淡嘅茶似或咖啡。
卡樂B × Jagabee 期間限定日式相樸火鍋味
銷售點：7-11
期間限定脆薯條～將日本傳統火鍋口味融入薯條之中，但可能因為鹹中帶鮮甜，即使薯條沾滿味粉都冇想像中咁濃味，同充滿衝擊色調嘅包裝相比，略為唔夠惹味。
Ace士多啤梨朱古力年輪蛋糕、日吉士多啤梨銅鑼燒、TAIYO士多啤梨年輪蛋糕
銷售點：7-11
由日本直送嘅士多啤梨主題糕點之中，年輪蛋糕同銅鑼燒係大眾化款式，後者更以大量豆沙混合士多啤梨醬做餡料，一拆包裝就散發士多啤梨香氣。
KAGOME 福岡士多啤梨蔬果汁、熊本不知火柑蔬果汁
道地 玫瑰蜂蜜綠茶、櫻花蜂蜜綠茶
銷售點：7-11
如果你鍾意飲蔬果汁，分別採用福岡縣產士多啤梨、熊本縣不知火柑混合蔬菜製成嘅蔬果汁就啱你喇，但甜度略為高啲。若果鍾意茶飲，期間限定嘅玫瑰蜂蜜綠茶、櫻花蜂蜜綠茶就幾清新。
日清盈優青汁 濃厚白桃味、清爽蘋果味
銷售點：U Select、DON DON Donki、Aeon、Sogo、松本清門市
另一款蔬果汁新品係日清出品，甜度較低；雖然顏色好似五青汁咁「青BB」，但又幾易入口喎。細心啲睇包裝上嘅圖示，白桃味同蘋果味都加入4款蔬菜、檸檬、蘋果同抹茶，而前者重有芒果𠻹。
1月19日更新
百邦：士多啤梨味夾心餅／士多啤梨味威化餅／迷你士多啤梨朱古力餅
甘樂軟糖：Pure Premium軟糖草莓蘇打味
銷售點：7-11
召喚士多啤梨控～呢幾款新出嘅餅類同糖果都以士多啤梨為題，其中士多啤梨味夾心餅，以兩層騷化嘅餅乾夾住士多啤梨朱古力，雖然略甜，但細細餅過吓口癮都唔大負擔。而甘樂軟糖新出嘅草莓蘇打味，入口第一吓係酸味行先，而夾心嘅士多啤梨果醬，選用日本第一士多啤梨產地枥木縣所產出嘅士多啤梨製作，不過夾心唔係好多，要仔細咁食先試到果醬味道喇。
BONO：TOKYO RICH CHEESECAKE
銷售點：7-11
呢款引入自東京嘅TOKYO RICH CHEESECAKE，以北海道、法國同紐西蘭3種芝士製作，蛋糕體比較濕潤，芝士香氣同味道適中，唔算極濃厚，平時少食芝士嘅朋友都容易入口。
北川半兵衛商店：青檸烏龍／熱情果烏龍
銷售點：7-11
便利店獨家發售嘅兩款期間限定飲品，青檸烏龍有啲似淡口嘅紙包檸檬茶，但味道較溫和，唔會有澀味嘅沖擊，茶味亦明顯。另外熱情果烏龍香氣比前者明顥，但茶味就相對淡少少，而值得一讚嘅係兩款都唔太甜膩。
1月5日更新
7-SELECT x mofusand：焦糖瑞士卷 / 香蕉朱古力雙層忌廉泡芙 / 香蕉朱古力忌廉蛋糕 / 香蕉朱古力忌廉瑞士卷 / 香蕉朱古力吉士包
銷售點：7-11
今次便利店聯乘日本人氣貓貓，推出5款限定烘焙甜品，其中焦糖瑞士卷同香蕉朱古力忌廉蛋糕融入貓貓造型𠻹。味道方面，焦糖瑞士卷清甜唔會膩；其餘4款則均為香蕉朱古力味，好似忌廉泡芙就香蕉味較突出。
Optmeal：藥膳雞胸肉燒賣 / 蟹子雞胸肉燒賣
銷售點：官網
燒賣無論做早餐 、下午茶或做加餸小食都係唔知嘅選擇，而呢個低卡雞胸肉燒賣品牌，最近就推出兩款新口味：藥膳口味加入杞子、淮山及當歸，入口有清香嘅當歸味道，但如果你平時好怕藥材味，可能仍然覺得味道較濃。而蟹子口味就咬到細細粒嘅蟹子，口感豐富。
文：Cathy
