零食、速食、酒等等，係唔少人嘅comfort food，2025年開飯仔繼續搜羅便利店、超巿、零食店、啤酒舖等各種產品，為大家開箱試真啲！

2月25日更新

【卡樂B】豉椒炒蟶子味薯片
銷售點：7-11

海鮮味薯片之中，今次嘅豉椒炒蟶子味都算經典，睇落唔多味粉，但真係有明顯嘅豉椒味，不過蟶子味就唔突出，但開飯仔覺得做到豉椒味比較特別，都可以一試啊。

【Kinder】健達利尼酥餅
銷售點：各超級市場、便利店

充滿童年回憶嘅Kinder，今次將經典牛奶可可味化身成表情包酥餅，一包20塊共有18種表情，單眼、嬲嬲豬、開心笑等等都好趣怪，不過冇獨立包裝，難以保護酥餅，有機會碎咗…酥餅口感偏硬脆，甜度幾啱小朋友同螞蟻人。

【野獸先生朱古力】牛奶朱古力脆餅 / 牛奶朱古力 / 花生醬朱古力 
銷售點：7-11

人氣YouTuber Mr.Beast嘅自家朱古力，而家正式登陸香港喇～3款口味幾大眾化，其中花生醬朱古力味，拆開包裝已經見到注入花生醬嘅痕跡，食落更加不得了，花生醬同朱古力都好濃，但唔會蓋過對方，幾足料。

【海太 ×《魷魚遊戲》】 辣味脆餅
銷售點：7-11

脆餅版椪糖遊戲～打開盒有十幾個小包，每包有圓形、三角形、正方形、星形同埋傘形5種圖案，不過脆餅版冇提供「針」，大家可以向難度挑戰試試手搣啊～開飯仔試過三角形成功存活，星形就秒死……脆餅本身幾香口，食食吓會有微辣味道，都幾夾。

1月9日更新

【NETFLIX × 《魷魚遊戲》】限量版能量飲料無糖系列 熱情果味 / 蜜瓜味
銷售點：7-11

大家睇咗《魷魚遊戲》第二季未呢？如果唔夠喉就試埋佢嘅能量飲品啦～雖然話係無糖系列，但都有甜味嘅，飲落有啲似梳打水嘅感覺，其中蜜瓜味都算像真，唔係糖水嗰種甜。熱情果味罐印有戴上三角形「△」面具嘅魷魚遊戲管理員；蜜瓜味則印有「123 木頭人」關卡中嘅女娃娃，當作收藏品都唔錯啊。

【樂事 ×《魷魚遊戲》】 韓式椒鹽魷魚味薯片 / 韓式濃郁辛辣拉麵味薯片
銷售點：7-11、百佳超級市場

脆口之選就非薯片莫屬，薄脆大塊嘅樂事薯片，韓式椒鹽魷魚味還原到韓式辣醬甜辣味，魷魚香氣為次；而韓式濃郁辛辣拉麵味就傳統啲。

【卡樂B】 蟹膏甲羅燒味薯片
銷售點：7-11

最近幾多海鮮口味薯片，呢款蟹膏甲羅燒味帶到海鮮嘅風味，似唔似甲羅燒就見仁見智。味道唔係濃厚嗰種，對於愛好重口味嘅朋友嚟講會想鹹味出返啲。

【BASKIN ROBBINS】 杏仁忌廉朱古力批 / 黃豆粉忌廉麻糬朱古力批 / 開心果忌廉麻糬朱古力批
銷售點：7-11

3款來自韓國嘅忌廉朱古力批，黃豆粉同開心果味都有麻糬餡料，口感較煙韌得嚟幾足料，麻糬控不妨一試，但留意開心果味比較淡，反而帶少少杏仁味。

【KIT KAT】 家庭裝迷你美祿朱古力
銷售點：7-11

KIT KAT加美祿絕對係小朋友同「螞蟻人」大愛嘅口味！加入美祿並冇甜上加甜嘅感覺（KIT KAT本身都夠甜），美祿麥芽風味會漸漸滲出嚟，同朱古力味冇互搶，幾夾。

【Pepper Lunch×日清食品】黑椒牛肉配蒜香醬油味即食撈麵  / 芝士醬漢堡扒配咖喱味即食撈麵
銷售點：惠康超級市場、百佳超級市場、7-11

Pepper Lunch鐵板料理變成即食撈麵會係點？「黑椒牛肉配蒜香醬油味」就以Pepper Lunch經典招牌黑椒牛肉飯為靈感，蔬菜包仲有肉粒同粟米粒盡量還原風味；調味方面有醬料同調味粉，食落黑椒味非常出，啱重口味嘅朋友仔。而「芝士醬漢堡扒配咖喱味」則以Pepper Lunch嘅珍寶漢堡扒芝士醬飯為靈感，拌勻調味料後口感相對冇咁爽身。

文：Cathy