位於日本北九州福岡嘅博多拉麵出晒名，喺日本拉麵界入面可以話係數一數二。相反，位於南九州嘅拉麵比較低調，但原來喺南九州當地亦有具代表性嘅鹿兒島拉麵。
鹿兒島嘅名物唔係拉麵，而係黑豚肉。喺鹿兒島市內，幾乎隨便入一間餐廳都可以見到餐牌上面有各款黑豚料理，可以想像到當地人係有幾鍾情於黑豚肉。呢間主打道地鹿兒島風味嘅「我流風」拉麵店就將當地人最愛嘅黑豚肉配上豚骨拉麵，順理成章成為咗當地大熱嘅拉麵店。既然難得嚟到鹿兒島，開飯仔當然要親身去試吓道地嘅鹿兒島拉麵同其他地方嘅拉麵有咩唔同啦。
由鹿兒島市電「天文館通駅から」出發，大約一分鐘嘅路程就會見到「我流風」搶眼嘅招牌，事不宜遲，馬上入去叫個拉麵試吓先。同大部分日本嘅拉麵店一樣，客人需要先喺門外嘅餐券販賣機揀選自己想叫嘅拉麵款式，俾錢之後拎住張餐券走入店內，店員就會招呼你坐埋位。
店內面積唔算太大，分別有吧枱同長型座位，座位背後有掛勾俾客人掛外套同袋，方便客人可以更舒適地享用拉麵。另外，每位客人旁邊亦會有擺放冰水同醃白蘿蔔，客人可以喺吧枱一邊欣賞師傅製作拉麵，一邊食醃白蘿蔔開胃。
先上嘅係「特製黑豚拉麵」，以原味黑豚肉配上豚骨湯拉麵，豚骨湯味道濃郁，湯底表面望落有少少油，但飲落亦唔會覺得太過油膩。拉麵當中更有大量高麗菜絲同芽菜絲，菜嘅清爽感減低咗湯嘅油膩。黑豚肉本身係鹿兒島嘅名物，原味嘅黑豚肉味道亦非常香濃，肥瘦適中，口感鬆軟，有別於平時喺香港食到嘅豚肉。
跟住落嚟係「灸燒黑豚拉麵配流心蛋」，未上依碗拉麵嘅時候已經見到師傳喺旁邊細心咁燒每一塊黑豚肉。拉麵一上到枱，賣相吸引，再配上流心蛋，成碗拉麵睇落非常飽滿。味道方面，灸燒黑豚比起原味黑豚味道更加香濃，同樣係用上鹿兒島當地出產嘅黑豚，肉質同原味黑豚分別不大，係多咗灸燒嘅香味。值得一讚嘅係流心蛋做得比想像中更出色，蛋白滑嫩，一咬落去係流心嘅蛋黃，成個蛋嘅熟度控制得好好。
麵質方面，唔算係好特別，但口感彈牙，掛湯能力佳，算係中規中舉。但係，單靠呢到嘅灸燒黑豚、豚骨湯同出色嘅流心蛋已經令人留下深刻印象，如果想一試鹿兒島道地嘅拉麵，相信「我流風」絕對係一個唔錯嘅選擇。
地址：鹿兒島縣鹿兒島市東韆石町 14-3
營業時間：星期一至星期六：11:00-23:00 ；星期日：11:00-22:00
交通：從鹿兒島市電「天文館通駅から」步行1分鐘即可到達
電話：099-227-7588
文、相：Dap