中秋節好快就到喇，仲未諗去邊度做節嘅就睇吓以下介紹，鍾意出街食同留喺家中食盆菜都得～
粵、浙、滬、京菜融匯一堂 金枝玉葉 
匯聚粵、浙、滬、京菜嘅中菜館，裝修金碧輝煌有氣派，主廳唔只有多個獨立拱形卡座，更設有五間私密包廂。招牌蜜汁火焰豚肉叉燒王會於現場烹調，先喺海鹽上淋上玫瑰露，然後點燃火焰約3-4分鐘，令肉質散發出煙燻玫瑰酒香氣。經典浙菜有金枝秘製牛肉同鹹肉蒸舟生風帶魚；京菜就有北京烤填鴨兩吃等，款式超多！
《胡同‧海納百川》嚐味菜單 胡同
呢間可以欣賞維港景色嘅中菜館推出八道菜嚐味晚宴，主打上海菜同四川菜，菜式由香港、杜拜嘅主廚合作～茶燻乳鴿以碧螺春茶葉同玫瑰輕輕地燻烤，每咬一啖都感受到茶香同花香；響油㸆鱔絲以秘製初釀老醬油燜製，口感鮮嫩，層次分明。川菜方面就推介椒麻鱈魚筍，椒麻味香濃，吸收咗醬汁精華嘅竹筍倍添清爽。留意供應日期由8月30日至9月30日。
酒店中菜廳出品都有一定水準，而呢兩間餐廳今次會供應同一個餐單。以矜貴食材炮製嘅中式盛宴，其中高湯鮮菌焗開邊乳龍蝦配長壽伊府麵夠晒意頭，新鮮本地乳龍蝦肉質爽口帶牛油香；鮑魚汁海參扣滋補花膠筒伴玉環瑤柱甫，黃肉海參同花膠以高湯、鮑汁燜煮至入味；仲有羊肚菌花膠蟹肉燴燕窩、雲南鮮牛肝菌茅香雛鴿等款式。套餐分別供四位、六位同十二位享用，提前7日預訂兼繳付訂金，可享88折優惠同指定月餅換領券乙張。
中秋精緻粵式美饌+矜貴外賣盆菜盛宴 萬豪金殿 
米芝蓮星級中菜廳同時推出中秋精緻粵式美饌，以及矜貴外賣盆菜盛宴～中秋團圓晚餐包括八道菜，以名貴食材入饌一定可以滿足唔同食客，包括清甜富鮮味嘅天籽蘭花柱甫燉花膠湯，肉質彈牙鮮甜嘅上湯焗開邊龍蝦，香濃入味、口感軟滑嘅六頭南非鮑魚伴花菇鵝掌等。至於外賣盆菜匯聚十八款上乘食材，包括澳洲海參、三十三頭南非吉品鮑魚、鵝掌、茶燻平原雞、蝦籽六頭虎蝦球、髮菜鯪魚鮮腐竹扎、豬碲筋同百花釀羊肚菌等，配搭自家熬製嘅鮑魚汁，更添風味。
鮑魚珍饈豐食盆菜 FEAST
人氣網上到會專門店，中秋佳節推出「鮑魚珍饈豐食盆菜」，選用多達16款食材，包括溏心鮑魚、原條海參、鮮元貝、鮑汁燴花膠、鮑汁鴨掌、極品大蝦、珍珠魚唇、蠔皇螺片、南乳五花腩等。溏心鮑魚以秘製醬汁燜燉，肉質厚實鮮味；海參則採用品質上乘嘅原條海參，慢火燉煮至入味，口感彈牙有嚼勁。即日起至9月9日期間預訂盆菜，即可享8折早鳥優惠～
自家製中秋喜慶盆菜 8度海逸酒店
酒店自家製傳統盆菜精髓係醬汁，秘製醬汁由鮑魚、金華火腿等矜貴食材輔以老雞、腩排、雞腳等熬製八小時而成，鮮甜又香濃～而食材就有原隻鮑魚、花膠、瑤柱、沙井蠔、大蝦、花菇、貴妃雞、燒腩仔、鵝掌等一共十六款，好豐富。盆菜設有二位、四位、六位同八位用，無論係小型聚會或大家庭食都冇問題～
文：Yanica、Cathy
編：Cathy
