距離中秋佳節仲有兩個月，各品牌陸續推出月餅早鳥優惠喇，款式五花八百，既有可愛卡通造型，又有新穎口味，當然唔少得經典口味啦，無論獨食或送禮都啱，即刻介紹多間特色月餅畀大家。

流心開心果+Pokémon特別版月餅套裝  望月

相信大家都對呢個本地品牌唔陌生，以流心奶黃月餅最為人熟悉，今年中秋除咗經典款仲有好多新口味同crossover！首先有同本地港式糖水店「研香」聯乘推出嘅「流心開心果」同「流心黑芝麻月餅」，前者以意大利開心果烘製，餡料就好似濃縮版嘅開心果糊一樣，味道超濃郁；後者食出芝麻沙沙顆粒感，芝麻控一定鍾意～另外仲有可愛Pokémon造型流心奶黃月餅特別版，啱晒送畀小朋友。

早鳥優惠：即日起至8月20日

研香特別版禮盒（4件裝）：$198/早鳥價［$248/原價］

Pokémon流心奶黃月餅特別版（4件禮盒裝）：$198/早鳥價［$238/原價］

錦繡月餅禮盒  南坊

「錦繡月餅禮盒」可以一次過品嚐三款月餅口味，包括迷你流心奶黃月餅、迷你蛋黃純白蓮蓉月餅同迷你抹茶豆蓉麻糬月餅，有齊傳統同新派款式。呢個禮盒仲包埋上乘人參烏龍茶葉同手工特製琥珀核桃，送禮得體又豐富，一邊嘆茶，一邊食月餅就最正喇。

早鳥優惠：即日起至7月31享有7折優惠，8月1日至9月8日會根據日子優惠各不同

錦繡月餅禮盒：$215.6/早鳥價［$308/原價］

「月照大嶼」迷你雙囍月餅 采悅軒（香港東涌世茂喜來登酒店）

全新迷你雙囍月餅包括3個迷你奶黃月餅同3個迷你草莓乳酪奶黃月餅，前者奶黃內餡充滿啖啖牛油香氣，口感豐富綿密；後者草莓果蓉散發清新果香，配搭酸酸甜甜嘅乳酪，細膩濃郁。除此之外，包裝盒更融入中秋月色同大嶼山景色，好有意思。

早鳥優惠：即日起至8月3日享有75折

迷你雙囍月餅：$268.5/早鳥價［$358/原價］

迪士尼彼思系列Sweet Dreams走馬燈月餅禮盒  奇華餅家

奇華餅家每年都有新搞作，今年就有以旋轉走馬燈設計，配以四款迪士尼角色造型嘅創新果味奶皇月餅，分別有1件毛毛造型嘅「藍莓奶皇月餅」（紫薯口味餅皮）、1件大眼仔造型嘅「菠蘿奶皇月餅」（抹茶口味餅皮） 、2件勞蘇造型嘅「士多啤梨奶皇月餅」（士多啤梨口味餅皮）同埋2件阿愁造型嘅「芒果奶皇月餅」（芝麻口味餅皮） ，食完月餅仲可以將禮盒亮燈當燈籠，有得食又有得玩，迪士尼fans唔好錯過喇～

早鳥優惠：即日起至7月31日

「迪士尼彼思系列Sweet Dreams走馬燈月餅禮盒」禮券：$262/早鳥價［$328/原價］

迷你貓山王榴槤月餅+華貴六福月餅  香港港麗酒店（金葉庭）

「迷你貓山王榴槤月餅」選用馬來西亞頂級貓山王榴槤，金黃酥脆嘅曲奇餅皮包裹榴槤果肉，馥郁味美，今年限量800盒咋，想買就要快手喇！鍾意經典口味嘅你可以揀「華貴六福月餅」，一共5款口味，包括正紅豆沙（2件）、白蓮蓉蛋黃、黃蓮蓉蛋黃、蛋黃豆蓉、麥芽糖低糖白蓮蓉（各1件），啱晒送畀長輩。

早鳥優惠：2024年8月25日或之前於官方網上商店預購指定月餅可享8折優惠，禮物籃可享9折優惠

迷你貓山王榴槤月餅：$406.6/早鳥價［$508/原價］

華貴六福月餅：$398.4/早鳥價［$498/原價］

香宮迷你金時番薯紅豆月餅+榴槤冰皮月餅二重奏  香宮

香宮月餅款式多多，又有冰皮系列，又有傳統口味，當中原創月餅系列採用日本金時番薯、柚子、紅豆、麻糬同茶葉等優質食材製作，重點推薦「迷你金時番薯紅豆月餅」，香得嚟又唔太甜，老少咸宜。仲有人氣冰皮月餅「榴槤冰皮月餅二重奏」，柔軟嘅冰皮分別包入香氣濃郁貓山王或黑刺果肉，入口回甘，做到齒頰留香。

早鳥優惠：即日起至7月31日期間，於精品店選購中秋月餅同禮盒可享75折起早鳥優惠 

迷你金時番薯紅豆月餅（八件裝）：$328.5/早鳥價；$438/原價

榴槤冰皮月餅二重奏（六件裝）：$403.5/早鳥價；$538/原價

文：Yanica
編：Sharon、Cathy