呢個三層櫻花鹽山海觧塔，係用岩鹽，以及日本富士山進口嘅櫻花花瓣焗製，盡力保留返海鮮嘅原味之外，亦滲入咗淡淡嘅櫻花香氣。行政總廚每晚會喺10款海鮮入面揀5款提供，重點留意啲大蝦，每隻足5吋半長㗎！其他海鮮仲有游水生蝦、新鮮花螺、蜆、扇貝、麵包蟹等等。
去旅行就賞櫻，嚟自食助餐賞都一樣得，樣樣食物都整到靚一靚，加咗啲櫻花花瓣落去，成碟嘅感覺又唔同咗，部相機見到就更加肚餓要影多幾張先得。就好似櫻花蟹肉酥盒咁，個酥皮盒有成250層㗎，鬆化是常識吧。廚師仲好有心機咁將櫻花花瓣、櫻花蝦加入啲沙律醬度攪成醬汁，蟹肉又拆晒殼，加埋洋蔥釀入個盒度，食起上嚟既方便又鮮甜。
而三文魚凍批伴半熟吞拿配櫻花金箔酒啫喱個名雖然好長，但睇得出用料嘅用心呀！分咗三層嘅啫喱，底嗰層係三文魚慕絲，特別呀呢？我真係未食過。中間嗰層就係日本櫻花金箔酒啫喱，爽爽滑滑，最面層就係半熟吞拿魚兼成塊花瓣，可以同時食出兩種魚嘅魚鮮味！
其他一系列嘅櫻花製品仲有櫻花素麵、酥炸櫻花生蠔、櫻花蝦焗生蠔、鮑魚絲櫻花鹽漬炒麵、櫻花鹽漬和牛沙律……
食蒲飛點可以冇甜品？不過連甜品都係櫻花會唔會有少少屈咗機？最近去到邊都大受歡迎嘅閃電泡芙都有櫻花味，微甜中帶有淡淡嘅花香。
而櫻花海鹽朱古力撻就將櫻花打到變成mousse之後唧上灑滿海鹽嘅撻底，面層又放埋櫻花花瓣鹽漬，成個撻都好櫻花，甜中一點鹹。另外仲有櫻花草莓杯呀、櫻花白桃餅呀、櫻花檸檬撻呀、櫻花蕨餅呀……總之就浸喺一片櫻花海之中啦！
餐廳：儷廊咖啡室
訂座／查詢電話：2132 3502
文：Kar
隨時接收最新資訊
讚好OpenRice專頁！
Keyword
自助餐
櫻花
閃電泡芙
鮑魚
海鮮
Copied to Clipboard