只要運用想像、創意，再加肯嘗試，傳統中菜、點心一樣可以有萬千變化。尖沙咀呢間新派中國菜館嘅師傅，就因應客人需要，以及營養考慮，加入多種真菌入饌，創作出多道驚喜嘅菜式，就等電台主持歪歪帶大家去發掘下先~

松茸羊肚菌海膽燴飯

呢道燴飯被歪歪稱為全枱最吸引嘅菜式，同時亦係餐廳總廚陳義夫師傅自己最愛嘅菜式。製作一啲都唔簡單，陳師傅先以雞煉成嘅濃高湯嚟炆汁，爆香料頭後，再連埋靈芝菇同牛油邊爆香邊煎，最後以濃雞湯炆飯。炆好飯後再放上海膽，輕輕一焗，淋埋白松露油先大功告成。

唔講唔知，原來師傅本身唔食海膽架，係因為工作所需，咩都要試先食少少，就發現海膽同飯好夾，可以令到啲飯變得更滑身。難怪歪歪試後都話：「好綿密嘅口感，估唔到呢個中式飯真係做到意大利飯嘅口感，很細滑，香而不膩，仲滲透住菇同秘製醬汁嘅鹹香，啲飯吸收晒所有菇菌類嘅香氣，個飯做得好好。海膽同個飯都好夾。首先啲海膽燒香過，質地豐厚，又有少少鹹香、帶少少甜，啱啱好呼應返飯本身嘅鹹味，同埋同菇味都係夾嘅。」至於羊肚菌，「本身嘅味道唔重，但唔緊要，飯已經充滿菇菌嘅香味，羊肚菌係增加整體嘅口感。」

辣味雞樅菌菜苗腸粉

師傅表示雞樅菌煉出嚟嘅油，比任何一種菌都香得多，而且同菜蔬類特別夾，於是就將佢哋混埋一齊。至於點解係配腸粉？師傅解釋：「大家食開都係叉燒腸同蝦腸，但有客人又會想食素，所以就諗到嚟做一道素腸粉。」係細心啊。
見到呢道菜，歪歪就好表現興奮嘅感覺：「雞樅菌我好期待架，貴嘢嚟架，雲南貴州嘅森林先有，都幾稀有架。相傳皇帝都鍾意食，明朝熹宗鍾意食雞樅菌嘅程度，係誇張到叫人喺森林採摘後，因為採摘後嘅香氣好快流失，佢叫人要快馬急件漏夜送返京城畀佢。所以呢個可以話係皇帝級嘅享受。」

試菜後幸好期望冇落差：「首先腸粉皮係半透明嘅，好薄身、好滑溜。菜苗都好鮮嫩，清新嘅。」師傅加入咗花椒八角，令腸粉味道更豐富，而呢個辣都幾特別，歪歪嘅形容係：「佢嘅辣係麻辣，但又唔太辣，喺味蕾上一閃即逝嘅感覺，啱啱先追蹤到係麻辣，但就已經冇咗喇。我覺得呢個辣味係啱啱好，如果太辣嘅話就會搶咗菜嘅鮮甜味道，整體味道配合得唔錯。吖，嗰個辣味又飛咗出嚟，又即刻走咗，好虛無飄渺。呢種感覺令我好想追逐佢，繼續食。」

羊肚菌燒賣

中式酒家通常都會有燒賣蝦餃，呢度都唔例外。但就將之同羊肚菌一齊配搭，師傅話因為平時食燒賣，咬落去通常都比較乾身，或者冇乜特別，食得多就會厭。如果搭下菌類好似羊肚菌咁，就可以有啲新鮮感，冇咁悶。

「表面睇落同普通燒賣分別唔大，但睇起嚟蒸得唔錯，熱辣辣，漲卜卜，上面加咗一粒細細粒嘅羊肚菌。」一啖放入口品嚐後：「嗯，豬肉有油香，喺個口度仲會爆啲汁液出嚟，可以叫得上係爆漿燒賣。但我係唔記得咗羊肚菌嘅，可能因為太細喇，冇幫到幾多口感，食咗都唔太覺。」

 歪歪(左) 與 餐廳總廚陳義夫師傅 (右)

六公館
地址: 尖沙咀廣東道3-27號海港城海運大廈地下OTE 101號舖

主持：歪歪

文：Kar
相+片：Tony Cheng、Tom Li

【OHealth!】 食用真菌篇

5種常見食用真菌介紹及功效 (傳送門按此)
輕鬆食譜跟住整  迷你蘑菇漢堡 （奶素/純素）   (傳送門按此)
5大貼士！野生食用菌店主教路 野生菌唔可以用水洗？ (傳送門按此)
8大推介 真菌餐廳集合 中西日式都有 (傳送門按此)
歪歪實試！尖沙咀松露主題餐廳 邊道菜式最濃味？ (傳送門按此)
營養師拆解坊間菇菌類零食 標榜全天然/營養豐富 就真係健康？ (傳送門按此)