講到食用真菌，必定唔少得位於尖沙咀，以新鮮松露為主題嘅法國菜餐廳，多款菜式無論湯品、主食定係甜品，均以真材實料嘅松露入饌，甚至刨下一片片松露，絕不欺場。電台主持歪歪又帶大家出動啦~

牛肝菌濃湯

以嚟自意大利嘅牛肝菌同磨菇為主材料，師傅先用橄欖油煎香洋蔥同各款磨菇，加入牛肝菌、白酒等，再放入忌廉同濃湯以細火慢滾，並用攪拌機攪勻，最後刨上新鮮黑松露。

「好濃郁，我啱啱嗶起嗰匙有好多松露片同埋啲泡沫，除咗有湯本身嘅濃稠外，另外亦有松露嘅質地。松露刨得好薄輕輕咬一咬就碎，加埋泡沫就再順滑啲，而且可以中和濃郁嘅湯品，令整體口感豐富同埋解膩。總括嚟講，呢個湯好好飲。」

歪歪更以香水形容松露片同食物嘅關係：「點解好多菜式都會加入松露片？我覺得其實同噴香水一樣，係可以提昇一個人嘅氣質，令到一個人更加吸引；食物都一樣。」

澳洲M6和牛西冷牛排‧松露

澳洲M6和牛西冷脂肪分佈平均，師傅更特意以松露油煎香牛排嘅兩邊，增加香氣。上碟前再配多幾片松露喺面。

「我覺得表皮煎得好香口，係幾唔錯，入面嘅肉汁同肉味都係濃郁嘅，肉汁可以鎖喺裡面，但略為熟咗少少。」另外歪歪覺得松露同西冷各自嘅味道都好突出同濃郁，各自精彩，如果可以相互融入則更理想。

松露芝士球

呢個甜品造型攞滿分，望落有啲似盆景，原來係模仿返松露喺泥土中生長嘅環境呢，好有心思。除咗有一片片松露外，另外亦有加入松露油同埋曲奇碎，增添味道層次。

「芝士味好香，入面好香滑，入口即溶，好正。芝士唔膩，而呢啲曲奇碎令本身軟腍嘅芝士內餡多咗一重口感。但有啲美中不足，我食嗰陣……唔太食到松露味，畀朱古力、曲奇蓋過咗。」

呢個咁靚、吸引咁多女生打卡嘅甜品，居然係師傅飲多兩杯酒嘅時候諗出嚟？餐廳西式行政總廚Manful Lee表示靈感來源嚟自飲酒後見到啲盆栽，得到啟發，忽發奇想「我可唔可以做一樣嘢出來，好似呢個盆栽咁，又好睇又可以食呢？於是就諗咗呢個甜品出嚟。」Manful續講：「賣相好重要，做西餐都係講求色香味嘅，擺盤都好重要，而家好多客人都要相機食先，擺出嚟唔夠吸引嘅話，啲靚女會唔鍾意㗎，冇得影相，冇得打卡。」

 (左) 歪歪；(右) 西式行政總廚Manful Lee

問：其實松露最適合配搭咩食物？

Manful：以我哋做餐嚟講，松露主要係食佢嘅香氣、香味，一般我哋唔會配太濃、或重香料嘅嘢。如果味道太濃，會遮蓋咗松露本身嘅香味。一般嚟講，我們會用較清淡嘅嘢，喺法國、意大利通常就會配搭雞蛋、以簡單忌廉汁製作嘅麵。或者意式燴飯。

問：松露油係咪一定唔夠原片松露好味？

Manful：松露油其實係加工品，啲香氣係人工化嘅。我哋食松露係食佢本身嗰種土壤嘅味道、麝香嘅味道，食落去會清啲，而用油煮咗加工嘅嘢就好假嘞，好濃 ，但好假。有好多客人嚟食飯都會問，點解你啲松露冇味嘅？係呀，因為我用真松露嘛，我唔係單靠松露油或醬嘅香味，嗰啲係唔同㗎，因為大家食慣咗嘅可能係氣油味，好濃，但嗰啲通常是加咗工嘅香氣。我們食松露嘅話，會食到啲泥土嘅味道、大自然、 木同麝香嘅味道，唔係人工化可以做到。

松藝館
地址：尖沙咀廣東道3-27號海港城海運大廈3樓OTE303號舖

主持：歪歪

文：Kar
相+片：Tony Cheng、Tom Li

【OHealth!】 食用真菌篇

5種常見食用真菌介紹及功效 (傳送門按此)
輕鬆食譜跟住整  迷你蘑菇漢堡 （奶素/純素）   (傳送門按此)
5大貼士！野生食用菌店主教路 野生菌唔可以用水洗？ (傳送門按此)
8大推介 真菌餐廳集合 中西日式都有 (傳送門按此)
歪歪實試！尖沙咀新派中菜 大推松茸羊肚菌海膽燴飯 (傳送門按此)
營養師拆解坊間菇菌類零食 標榜全天然/營養豐富 就真係健康？ (傳送門按此)