牛油果咁有益，出街食邊度有得食？唔少餐廳都有加入牛油果菜式，不過就大部分都限於牛油果沙律，或者牛油果沙冰/奶昔，想有更多可能性？一於等鍾意周圍飲飲食食嘅電台主持歪歪帶大家去搵食啦~

位於尖沙咀嘅呢間樓上日式洋食café，設有榻榻米座位，環境自然舒適，數數menu，當中有成17款嘅菜式都有用到澳洲牛油果入饌呢，無論係沙律、小食、麵食、甜品定飲品都有。歪歪就試咗其中幾款較受歡迎同有特色嘅菜式喇。

牛油果溫泉蛋多士 （酸種包）配沙律

呢道係餐廳招牌菜之一，開店以嚟轉過好多次menu，但呢道菜就一直留到而家。前排仲對之加以改良，將塊多士換成營養價值同纖維量都比傳統麵包高嘅酸種麵包𠻹。

「佢都幾有心思，兩塊都搽滿晒牛油果醬，其中一邊，佢真係切晒片，每一啖都有牛油果嘅肉食到；另外一邊，講真，多士唔配溫泉蛋，我覺得真係對唔住塊多士。」歪歪一路食一路對呢道菜讚不絕口：「牛油果醬好好味，香醇味好出，同埋酸種包嘅酸我都食到嘅，好正啊，呢個牛油果味好出呀！」、「個溫泉蛋真係啱啱好。」

燒法國春雞釀牛油果意大利飯

師傅特意選用法國大號春雞，以紅酒同大量香草醃製，再釀入半熟嘅自家製牛油果醬配意大利飯後進行烤焗，都幾花功夫。

「如果平時男仔陪女仔嚟食呢啲café，會好怕食唔飽，但呢道就一定飽嘞，有肉、有飯，畀我嚟嘅話實嗌。」溫馨提示一下，呢道菜限量供應㗎留意返，想食嘅話要預早訂定啊。

「我一路切，一路見到雞油、雞汁都咇晒出嚟，係有啲嘥料，但都證明即係焗得好，鎖咗啲汁喺裡面。雞肉係嫩嘅，不過雞髀位置淡口咗少少。至於個飯就好軟糯，佢釀咗啲牛油果入去，做到意大利飯嗰種好creamy、好綿密嘅口感。但可以再好啲嘅係，啲飯我鍾意再硬身少少。」歪歪食多幾啖再補充：「同埋一啲都唔膩，味道係豐富嘅，平時兩啖就膩㗎嘛，你永遠食唔晒一個意大利飯㗎嘛，呢個Okay嘅。」

秘製牛油果忌廉海鮮意粉

忌廉意粉呢家嘢，好係好食，但女生通常怕肥，而餐廳巧妙地利用牛油果厚滑嘅優點，製作出秘製醬汁，成功解決大家怕肥嘅問題。而菜式嘅靈感來源，係餐廳合伙人之一Bambi有日喺屋企對住個熟透嘅牛油果觸發出嚟嘅。

 歪歪(左)、Bambi (右, 餐廳合伙人之一)

Bambi話：「因為我自己好鍾意食牛油果，所以我屋企長期會有啲牛油果喺度。有一日，有個牛油果好熟，一定要食嘞，咁我就不斷撈，撈完用嚟煮咗個意粉。咁個味道好好，因為牛油果本身好creamy，咁我就諗如果用嚟做醬汁，就可以落少啲cream，我就返嚟同廚師提議喇。」經過師傅多次研製同調配分量、比例，終於可以落到menu喇。歪歪試食後亦認同：「好creamy，就咁食落個口感同出面嘅忌廉意粉唔太大分別，仲有啲牛油果香。」

牛油果甘藍蜂蜜牛乳沙冰

呢杯特飲用咗好多種食材混合調配而成，到底會唔會炒晒車、撞晒味？飲唔飲得返咁多種料？

「我第一下飲呢……我係飲到甘藍味，成陣草青味飛咗出嚟。可能佢加咗蜂蜜啦，我就咁飲苦味唔出嘅，淨係留返甘藍嘅草青味。有人鍾意有人唔鍾意，草青味畀我嘅感覺係fresh啲，會提醒我飲緊嘅係健康飲品。」咁牛油果呢？「我expect可以飲到牛油果香醇嘅味道，但而家羽衣甘藍嘅味標咗出嚟先，但佢好嘅地方蓋咗甘藍嘅苦味，淨返fresh嘅感覺，不過牛油果嘅香味就略為少咗啲。」

鳥語
地址: 尖沙咀厚福街12-12A號藍馬商業大廈10樓

主持：歪歪

文：Kar
相+片：Tony Cheng、Tom Li

【OHealth!】 牛油果篇

牛油果5大功效！有助減磅及抗老化   (傳送門按此)
口袋名單 5大牛油果餐廳推介   (傳送門按此)
5大貼士！果檔檔主教你揀牛油果 (傳送門按此)
輕鬆食譜跟住整 牛油果兔兔油揚Taco (奶素) (傳送門按此)
坊間流傳4種牛油果食法 即場實試邊款最好食 加納豆竟然唔係最伏？ (傳送門按此)