 | Simply Nutrition 營養師陳小艷（Sharon），香港大學食物及營養學畢業，並取得社區營養深造證書，曾於不同機構分享營養知識。fb專頁: nutritionsharing |
依家興起素食潮流，覺得食素健康啲、環保啲。的確，素食可避免攝取過多膽固醇同動物性脂肪之餘，同時又能增加纖維同抗氧化物嘅攝取，對心血管健康、腸道健康同埋預防衰老有一定嘅幫助。但係，如果你因爲食素而選擇食多左中式糖水，用素肉嚟代替動物性肉類，又或者食死一味素菜嘅話，肥胖、心血管疾病、營養不良等問題同樣會發生喺你身上。
點解？
因爲糖水熟高糖分嘅食物，什麽核桃糊、花生糊、芝麻糊等等，通通屬高油分高熱量嘅野，食得多唔肥都幾難。而素肉喺製作過程加入唔少調味劑、色素同防腐劑，煮嘅時候又加啲醬汁落去，鈉含量爆燈，食得多會影響個腎同埋血壓㗎。另外，如果唔識配搭食物，身體可能攝取不足蛋白質、維他命B12、鈣、 鐵等營養素，造成營養不良。所以食素前，都要遵守健康飲食嘅原則。
素食小貼士
1. 植物蛋白質含量一般比動物蛋白質低，所以盡量善用「蛋白質互補法」，藉由多種植物食材嘅搭配，以彌補彼此不足嘅蛋白質。例如揀豆類、堅果類及種子類等做出唔同嘅配搭：白果腐竹糖水、粟米豆腐羹、八寳粥、腰果炒西芹、五穀饅頭等等都係唔錯嘅選擇。
2. 維他命B12多數存在係動物性食物入面（例如肉類、魚類、海鮮、奶類），所以長期食全素嘅人好易缺乏。維他命B12唔夠嘅話，造血功能會受影響。素食者應該揀一啲特別加添左維他命B12嘅穀物類、豆奶或其他食品。選購食物時，留意包裝上嘅標籤，睇睇呢啲食物係咪加添左維他命B12。又或者諮詢營養師，有必要時進食維他命丸補充。
3. 鈣、 鐵食物要識配：少食太鹹嘅食物、少飲含咖啡因嘅野如咖啡、奶茶等，因其會增加鈣質嘅流失。含鐵食物如菠菜、白菜、提子乾、西梅可同含維他命C嘅食物如柑橘類、番茄、青椒等一齊食用，有助鐵質吸收。
最後提提各位素食者，食素時都要注意分量、食物種類同烹調方法哦！想keep住每日都知多一點點如何營養瘦身變靚啲？記得like我開設的fb專頁啦！
※上述內容純屬作者個人意見，不代表本網立場。※