雖然距離中秋節仲有一段時間，但係已經陸陸續續有好多月餅出緊啦。今年流心系仍然係大熱，當然仲有其他新款口味啦，即刻嚟巡個禮先（部分仲有早鳥優惠呀）！
流心系
流心奶黃 Valerie Pastry
呢盒月餅，有外又有內。禮盒成個首飾盒咁，加上花花同免仔圖案，好精緻。打開有兩層，分別係流心奶黃同宇治抹茶兩款口味。流心奶黃入口即溶，而宇治抹茶就啖啖甘香，抹茶控大愛！
流心芝麻 皇玥餅藝
單係流心奶皇已經滿足唔到奄尖嘅人類喇，呢間餅店首次推出咗流心芝麻月餅。一切即流，食落口感鬆化，味道香濃。而流心奶皇月餅就外皮金黃，比較重奶香。唔知揀邊款好？why not both？流心雙輝月餅禮盒裝就可以一次過滿足哂兩個願望啦。
流心奶黃 Blesscuit
陳敏之嘅曲奇品牌都有出月餅，迷你流心奶黃月餅細細件，自己食一個都唔會覺得好膩。如果想清新啲嘅就可以試下迷你金桔奶黃月餅。未食已經聞到好香嘅金桔味，裡面仲有粒粒果肉~
金沙流心 聖安娜
流心奶黃死忠fans想剩係食流心奶黃都無問題。呢款月餅著重奶黃同餅皮嘅比例，食之前記得先叮熱5-10秒，咁流心效果會比較顯著。
新款系
四重特濃宇治抹茶月餅 電音
抹茶控大愛嘅品牌，今年會出兩款月餅，除咗往年都有出過嘅breakfast mooncake，即係抹茶曲奇皮，配開心果加抹茶奶皇吉士再加夾有自家楓糖漬煙肉粒之外，另外仲有款新口味！四重特濃宇治抹茶月餅！又抹茶麻糬又抹茶流心咁，聽到已經覺得非食不可！
抹茶玄米茶迷你奶皇月 中村藤吉
另一款抹茶控追棒嘅抹茶品牌，今年首次推出丸十迷你奶皇系列月餅，總共有三款口味：抹茶、焙茶、同埋抹茶玄米茶，每款嘅茶味都相當甘香突出，特別係玄米茶嗰款啊。
軟心忌廉 百味堂
呢個來自韓國嘅人氣雪糕品牌唔係得雪糕㗎！月餅都有！就係呢款迷你軟心忌廉奶皇月餅，奶黃以韓國直送嘅忌廉炮製，奶香更重。咪話唔提你，限量推出600盒咋，有買趁手喇。
韓式月餅 炑八韓烤
唔講唔知，原來韓國人一樣會慶祝中秋節㗎，而佢哋食嘅月餅就叫做「花餅」。呢間韓式燒烤店就特別推出九款味道嘅韓式月餅，包括杏仁、栗子、青蘋果、楓葉、竹葉同水仙花味等。而荃新天地分店更會獨家發售限量夜空版包裝，好適合送畀鍾意韓國嘢嘅朋友仔。
日式和菓子月餅 鮨蕾
日式月餅都有？！呢間餐廳同京都品牌和晃合作，推出兩款和菓子月餅禮盒，分別有牛奶白豆同抹茶味。餅皮煙煙韌韌，內餡就一款香甜，一款回甘。
果仁朱古力月餅 HAPPY b.
講完韓式同日式，而家輪到法式啦~ HAPPY b.係agnès b. 旗下嘅生活品牌，佢哋有幾個系列嘅，好似果仁朱古力呀、水果朱古力呀咁。其中夏威夷果仁月餅係今年新出嘅，口感爽脆。另外經典奶黃系列亦新加入埋earl grey味，奶黃味中滲透住陣陣茶香，仲可以清減油膩感。
玫瑰荔枝月餅 Paul Lafayet
呢個禮盒有四款口味，分別係濃香榛子朱古力、醇香抹茶、清香玫瑰荔枝同甜香杏仁黑櫻米。玫瑰荔枝味以法國荔枝製作，面層鋪上可食用玫瑰花瓣，感覺浪漫。而杏仁黑櫻米就帶微微桂花香。
法式朱古力月餅 Sift
呢間現代法式餅店，今年首次推出法式朱古力月餅，一盒六件，三款味道，包括香蕉花生、脆香檸檬同榛子脆餅。要知道香蕉同朱古力一向係好朋友，今次加埋花生醬「三人行」，層次就更加豐富，兼且食到啖啖香蕉果蓉。
黑松露月餅 Chroma
一見到呢幾個咁靚嘅星球月餅，就知道Chroma又有新作啦。「明月」係黑松露朱古力mousse加奶凍加脆脆，而「地球」同「火星」就係北海道蜜紅豆同宇治抹茶嘅配搭。
60年陳皮豆沙月餅 港島香格里拉
年份愈耐嘅陳皮，愈香醇。呢盒迷你月餅仲要用上60年嘅陳皮去製造，香氣可想而知。加搭經典拍檔紅豆蓉，細細個又唔怕膩，送禮自用都啱。
迷你咖啡奶皇月 Ms B’s CAKERY
佢哋今年新推出迷你咖啡奶皇月，咖啡嘅香醇當然都係重點，但要特別講嘅係，佢哋選用由生果同蔬菜提煉出嚟嘅純天然麥芽糖醇代替庶糖，比一般月餅健康啲呀。
蜂蜜奶皇月 奇華
作為傳統品牌，但依然每年都會推出新口味月餅嘅奇華，今年嘅新味係松子蜂蜜奶皇月，花蜜香甜，奶皇幼滑，仲混入埋粒粒松子仁，有夠口感。另一款清甜口味係蛋黃椰絲蓮子月。如果想要新鮮焗製，熱辣辣嘅現烤奶皇月，就要去到位於灣仔嘅旗艦店啦。現烤嘅餅皮會更加鬆化，檸檬奶皇月更加係嗰度嘅限定添。搭多句，佢哋同海洋公園合作嘅熊貓月餅，包裝好cute~
便便奶皇 聖安娜
冇呀，見呢個月餅幾得意，成嚿便便咁，小朋友同大細路見到應該都會好興奮，科科。
人手製奶黃月 鴻福堂
呢盒奶皇月餅，每件都係人手製作㗎，幾有誠意。皮薄酥鬆，奶黃味香。
黃金比例酥皮奶黃月 四季文昌
同樣係奶黃月餅，呢間嘅賣點係用文昌雞蛋加特選牛油同淡忌廉整嘅鬆化酥皮，同用黃金比例秘製嘅奶黃餡。皮薄餡多，食落唔會太膩。加上禮盒設計簡潔又有特色，送禮啱哂。
手造酥皮奶黃月 唐人館
佢哋嘅酥皮奶黃月係人手製作㗎，選用法國鮮牛油，所以好重牛油香味，餅皮鬆化。禮盒裝仲附送一個紙燈籠，內藏LED燈，有種簡潔美。
榴槤月餅 滿福樓
榴槤控注意！呢款月餅採用馬來西亞D24榴槤製作，未食就已經聞到濃郁嘅味道，外面係牛油皮，中間嘅榴槤餡好幼滑。不過，呢款月餅限量供應，得200盒，手快有手慢冇。
公平貿易月餅 細味公平
食月餅之餘亦都可以做善事㗎。品牌選用公平貿易嘅有機原蔗糖同蜂蜜，再結合本地社區力量，由葵青區婦女以人手製成月餅，好有意義。招牌鳳凰月選用新鮮鳳梨，內餡由人手慢製兩小時而成，入口鹹香並帶絲絲清甜。
卡通抹茶奶皇 山下菓子
佢哋最鍾意就係同各個卡通人物合作，月餅都唔例外。Little Twin Stars就係其中兩個主角啦~ Kiki同Lala個嘜頭印咗喺月餅面，就算幾捨得都要切開佢哋嚟食，輕輕叮熱嚟食會有流心效果啊。口味包括有酥皮奶黃流心、抹茶奶黃流心、酥皮奶黃朱古力流心等。
雪糕系
Line Friends雪糕月餅 Häagen-Dazs
品牌今年推出網店限定嘅LINE FRIENDS 雪糕月餅，好鬼靚仔呀！Line粉要尖叫啦！白朱古力脆皮外層包住三款唔同口味嘅雪糕，例如抹茶、雲呢嗱等，仲有大大個公仔嘜頭。嗚呀，唔捨得切開佢！哈根大師另外仲有幾個雪糕月餅系列。藝術系嘅朋友仔，你聽過梵高吧？以《星夜》為靈感嘅設計係幾有氣質，內餡則係士多啤梨雪糕配全新嘅荔枝紅桑子玫瑰流心，酸甜清新。至於紅色嗰盒就係配藍莓菠蘿流心。
冰皮系
可愛貓貓冰皮 DK Cuppa Tea x Lia’s Bakery
貓奴實會鍾意呢款喵星人造型嘅冰皮啦，超kawaii！兩款流心餡分別係芒果味同玫瑰味，全部都係人手製作，係有心思嘅。
花生醬冰皮 聖安娜
花生醬粉絲最近應該好開心，不停有唔少花生醬冰品出現。最新嘅係連冰皮月餅都有花生醬味啦。細細粒一啖食晒，花生香氣喺口中散發。至於上年都出過嘅阿華田冰皮，今年就加埋脆珠效果，增強口感。
文：Kar、Crystal
相：Kar、Cathy