喺上環文武廟附近，最近新開一間以北歐做主題嘅cafe，由起命、裝潢到食物款式都融入北歐特色。店命Hjem係挪威文「家」嘅意思，寓意嚟到可以放低日常忙碌嘅步調，好似返到屋企咁輕鬆自在。

暗黃嘅燈光、簡潔中帶少少復古味道嘅木系及皮製傢具、抽象風格嘅畫作，加起嚟營造出歐式小店嘅感覺。

三文治Smørrebrød嘅麵包充滿果仁。

Chef’s Mustard-marinated Baltic Herring（$128）

食物方面主打北歐式外餡三文治Smørrebrød，佢嘅特點係將沙律同小菜組成餡料放喺包面上。Chef’s Mustard-marinated Baltic Herring特別選用本身已調味、由瑞士原裝入口嘅芥末波羅鯡魚，務求盡力呈現當地口味畀大家。芥末醬辣中帶甜，魚肉厚身，滑嫩唔會腥。配埋煮到軟腍嘅薯仔同有機雞蛋，以少量鹽、黑椒同秘製醬料調味已經夠提味，如果唧埋檸檬汁，芥末嘅味道會更濃郁。

Slow-roasted Pork Belly（$118）

為咗配合香港人口味，Slow-roasted Pork Belly就加入煎到金黃色嘅五花腩！搽上自家調配芥末醬嘅包上，仲有煮熟咗嘅紅椰菜同洋蔥，而生嘅紅椰菜置頂，令你一啖包含爽、腍嘅口感，解油膩又有蔬菜嘅甜味。不過芥末醬幾「攻鼻」，怕辣嘅朋友要有心理準備。

Mushroom（$108）

想食清啲可以試下Mushroom，用鹽水烚白蘑菇再真空包起，入味後切碎再加去法式酸奶油，鹹味幾突出又有咬口。加上面頭嘅生白蘑菇片灑上牛肝菌粉同黑椒，令香氣更突出。

Smørrebrød全日都有供應，朝早可以加配咖啡（$15-35）；平日午餐可以加配湯或小食（$30-60）。其中嘅炸粗薯條非常大盤，外脆內軟炸得啱啱好。

Giant Cinnamon & Cardamom Bun（$98）

甜點可以試吓呢個特大嘅Giant Cinnamon & Cardamom Bun，直徑近6吋，同朋開心share或外賣返屋企慢慢搣都得。自家配方製作，加入大量肉桂粉，每啖都好香甜。

前：Honey Milk Golden Latte（$45/熱)，後：Cinnamon BunEspresso Martini（$98）

如果你偏好肉桂，可以試埋呢兩杯灑上肉桂粉嘅特色飲品。Honey Milk Golden Latte加入黃薑調色，入口甜中帶微辛，畀人暖胃嘅感覺。Cinnamon BunEspresso Martini質感偏薄身，但酒精濃度算明顯，亦帶嚟清爽感覺；加上面頭嘅肉桂粉，令味道先甘後甜。

Hjem Cafe
地址：中環荷里活道159-163號金荷大廈地下2號舖

文、相：Cathy.Ｃ