上環街頭有間新開嘅泰式菜館，裝潢復古，主打泰北名菜同埋多道咖喱小食等，原來係灣仔人氣船麵店泰麵嘅姊妹店嚟，不過兩間餐廳則各有招牌特色。

招牌菜泰北咖喱雞/牛金麵起源泰國北部清邁，湯底係每日以自家製嘅新鮮咖喱醬同鮮椰漿，加埋成12款香料所調製，椰香味同咖喱味同樣香濃。麵條由泰國直送，蛋麵煙煙韌韌，掛湯力強，索晒稠身嘅湯底，啖啖都係香辣嘅咖喱味！面頭仲有幾條炸過嘅香脆金麵，層次豐富。

另一道推介嘅咖喱菜式係泰式黃咖哩雞，就連伴碟嘅薯仔都零舍香口。不過識食一定係搭埋鮮製泰式飛餅咁食！飛餅由人手搓製，再用特地由泰國訂造返嚟嘅大型圓鍋具煎到外脆內軟，點住咖喱食都食到陣陣牛油香。

飛餅唔一定得鹹食，甜食一樣得！泰式香蕉煎餅當然係經典組合，但配椰皇腰果則更有驚喜！面層淋上甜甜der煉奶，夾起會發現煎餅中間仲夾有大大片椰肉，甜，都甜得有幾種層次呢。

泰式檳榔葉包用料豐富，一啖食晒花生碎粒、薑絲、柚子、蝦肉等，酸酸辣辣又感覺清新。

 香辣虎蝦串燒

 泰式火車炒飯配和牛

餐廳亦提供各種酒精飲品，其中啲cocktails都好有泰式風情，好似Chalong Colada咁，插住把遮仔同菠蘿喺杯邊，好似去咗陽光與海灘咁，以rum、椰子忌廉等混製而成，飲落滿滿椰香；至於超厚泡沫嘅Jasmine Lemon Drop中間仲有個花蕾，由vodka搭配茉莉、檸檬，小清新！

泰館
地址：上環上環蘇杭街23號地下

文、相、片：Kar