好多人都鍾意食辣，愈辣愈刺激，愈辣愈開心，所以講究麻辣嘅川菜往往成為嗜辣者嘅選擇。中環有間開咗冇耐嘅餐廳，主打傳統川菜，未必碟碟都紅卜卜，但就道道都有返咁上下麻辣鮮香，尋求刺激者可以去會一會。

 水煮牛

水煮系列一向都大受歡迎，呢道水煮牛更選用嫩滑嘅安格斯牛肉製作，夠晒誠意。上湯以花椒、辣椒、自製香料醬同高湯煮成，滿缸紅呀真係。牛肉以熱湯輕輕燙熟，保持鮮嫩口感，啖啖肉香中滲透住強烈嘅麻辣香，愈食愈辣，撈飯一流。

老壇酸菜魚

川菜點可以冇酸菜魚？以新鮮鱸魚製作，師傅仲好貼心咁幫手起咗啲肉添，湯底亦有加入魚骨、泡薑、泡椒、花椒粒等熬製。另外仲有啲薯粉、豆卜等索湯力強嘅配料喺入面，魚肉係幾滑身嘅，可以揀辣度嘅，小辣就係好微微辣，輕輕就過咗，想要刺激感嘅朋友仔可以揀中辣或大辣。不過略嫌少咗啲啲酸菜，唔多夠酸啊。

 麻辣燒賣

麻辣燒賣係幾過癮嘅，有支花椒汁插咗喺度，可以自己唧。食嗰陣初頭好似冇乜feel，原來啲麻辣係慢慢先衝出嚟。

 青花椒酸菜魚配刀削麵

Lunch亦有多款選擇，要養生嘅可以揀藥膳湯底，但要辣嘅當然都係揀返酸菜系列啦。全部都可以自選兩款配菜。青花椒酸菜魚配刀削麵都幾多人揀，星斑魚片口感較為厚實，微辣，喉嚨輕輕嗆一嗆。

 冷泡茶

食咗咁多辣嘢，要解辣最好就係飲冷泡茶，餐廳自家製作嘅，最值得欣賞係冇乜加糖，冰爽清涼，幾款口味包括有蜜桃烏龍 、 蜜香鳳皇單 叢、茉莉花茶同桂花烏龍。

點.魚
地址: 中環威靈頓街73號地舖

文、相、片：Kar