九龍灣一向都多餐廳，唔想成日大魚大肉咁Heavy，食碗熱辣辣嘅湯麵就啱啦！最近開咗間新麵食專門店，提供亞洲各國嘅麵食，中、港、泰同韓式都有，淨係湯底都有5款選擇，分別用大量心機時間煮成，仲有10款麵底比你揀！係咪無唸過食碗麵都可以咁多款呢？

骨膠原湯底係餐廳招牌，骨膠原牛美番茄湯麵($88)用咗30斤牛骨熬煮兩日後加埋新鮮蕃茄一齊煮，好多膠質，熬咗兩日嘅牛骨湯湯底呈奶白色兼杰身，再加蕃茄調成，啱哂女士們食！蕃茄味香濃，配合埋牛骨湯味道更加有層次，牛尾炆到好淋，用筷子篤一篤開就食到。

暹邏海鮮冬蔭哈湯麵 ($88)，大廚先炒香蝦頭蝦殼，再以大火熬製2小時製成濃香蝦湯底，特別加入蜆去提味，再加入煮冬蔭必備的食材，湯底微酸，特別開胃！海鮮方面有青口、蝦同魷魚，好足料！建議揀拉麵等較吸味嘅麵底。

鍾意食喇沙一定要點椰香掛湯海鮮喇沙 ($88)，喇沙湯底主要以喇沙葉、蝦米、辣椒、椰漿、南薑、香茅等製作，煮得得別濃稠，建議要配金邊粉食，寧舍掛湯！

中式代表就有麻麻辣辣擔擔麵 ($58)，沿用本地著名川菜館秘方，用頂級芝麻醬代替花生醬，食落香而不膩。麵底選用一般擔擔麵，湯底唔算太辣，一般人都可以食到～

而香港近期好流行嘅花膠麵呢度都有，養顏花膠秘撈 ($88)，花膠浸過夜後以秘製嘅鮑魚冬菇醬汁慢火燜煮4小時，好軟腍同入味，但就略嫌細舊咗少少。

咁多款麵食唔知點揀，點個港麵派對 ($108)，專為貪心嘅食客而設！一個套餐有3碗迷利麵食＋3碗小食，包括暹邏海鮮冬蔭哈湯麵、麻麻辣辣擔擔麵同韓式棉花冰雜菜冷麵，小食有口水雞、黑醋雲耳同萵筍海蜇，兩個人share 食又得～

另外只要選擇湯麵(擔擔麵除外)，就可以免費轉換麵底，足足有10款選擇，特別啲嘅有掛麵、菠菜或蕃茄蘆薈麵同燕麥麵比你揀！而且餐廳門口專設一幅壁畫牆，去食麵之餘可以順便打埋個卡！

港麵子Nooodies

地址：九龍灣偉業街33號德福廣場一期1樓F1號舖

文、相、片：Yanica