提供露天座位嘅餐廳，通常都畀到人一種chill chill der、悠閒der感覺，就好似九龍站附近呢間新開嘅法式餐館一樣，最啱去同朋友飲返兩杯，放鬆一下。餐廳提供多款佐酒美食，cocktails仲充滿特色，甚至有杯係加入和牛油脂製作呢！

一系列嘅串式小食送啤酒就最夾，烤鮮魷、粟米、辣椒呢個配搭既新鮮又惹味，烤雞腿配煙燻果仁沙嗲醬就夠香口，兩者都有微微辣味，好開胃。

如果想飲餐酒嘅話，叫返碟Wine Platter就啱晒。一個platter包晒有意式肉腸、豬肉開心果肉凍、芝士及法國長麵包，好豐富。啲肉腸仲係自家製嘅添，而肉凍則將豬肉同開心果混埋一齊，以低溫烘烤後再將佢哋凝固。

至於牛扒，當然係一眾牛魔王嘅焦點啦。餐廳提供來自澳洲多個放牧農場、唔同部位嘅牛扒，例如有昆士蘭Westholme嘅和牛腹肉、O’conner嘅西冷牛扒、Rangers Valley腹肉牛扒等。其中，Rangers Valley牧場嘅牛，更係將安格斯黑牛同和牛混配，以穀物飼養，所以食落嘅有安格斯嘅濃郁肉香，亦有和牛嘅油脂香。

 乾式熟成過嘅鴨胸，肉質鮮嫩

另外餐廳亦有多款自家製精選蛋糕，無論香濃嘅朱古力撻、清新嘅檸檬撻，定係綿滑嘅芝士蛋糕都有得揀。

要chill嘅話點少得杯cocktails？呢度嘅cocktails全部都好有特色，特別推介自家創作嘅Beef it。以波本威士忌作基調，再加入煙燻威士忌、經燒製嘅蜂蜜糖漿同苦酒，最後放上一片自家製和牛肉乾。聞到陣陣smoky香味，飲落一啲都唔哽之餘，仲好似多咗層香味？原來係預先將牛和油脂同波本威士忌混埋咗一齊先呀。

而French Breakfast Martini則混合注入牛角包嘅vodka、士多啤梨果醬、蛋白同新鮮檸檬，甜甜地都幾啱女仔飲。

 Mocktail都有多款選擇

District 8
地址：尖沙咀柯士甸道西1號圓方R樓R009號舖

文、相、片：Kar