雖然話就話一年四季都會打邊爐，但而家入秋後涼涼地打就仲啱feel。有連鎖店最近首次推出一人鍋，而且仲要有二人同行優惠，人均44蚊就打到次邊爐喇，好抵。

呢個一人火鍋套餐，包括有一款湯底、一款主食、三款配料同一個麵食，仲有多杯嘢飲，原價68蚊SET，加廿蚊就可以有多SET，計落即係每人$44就食到個鍋，不過呢個優惠只係去到11月19號，同埋只限旺角分店咋。

湯底選擇有3款，包括赤蝦味噌湯、墨汁海皇湯同鮮甜椰子雞湯。三款各有特色，赤蝦濃味而椰子清甜。赤蝦嗰個仲係用咗波士頓龍蝦頭同海蝦、加香葉、自製味噌膏去煲，煲完再加些少白蘭地落去添。而墨汁嗰個望落黑麻麻，但食落都幾清，有淡淡墨魚香。

主食方面，就係蟲草花農場滑雞同加拿大雪花肥牛二揀一，兩款浸落赤蝦味個湯度都幾夾。

配料選擇都有十幾款，要揀三款出嚟都唔容易。海鮮控揀晒三款都係海鮮就唔使煩，藍青口、帆立貝同海蝦，配墨汁湯底幾推介，因為會令佢哋嘅鮮味更突出。

至於日韓系仔女，就可以揀韓國魚肉腐皮、韓國流心年糕同栗子味甜薯。另外仲有玉子豆腐、魷魚、蟹籽丸、淮山竹輪春卷、吸濕魚肚等索湯之選。

唔使怕唔飽喎，最尾淥返個 稻庭烏冬或者韓國粉絲之類就ok啦~ 想平平地打到個邊爐絕對不是夢啊。

新森林焗之專門店
旺角店地址：旺角通菜街1M-1T號華發大廈地舖
其他分店地址 按此

文、相、片：Kar