佐敦炮台街一帶通常都係茶記同火鍋店，最近就開咗間藍白色主調Cafe，仲要有兩層樓高可以坐低慢慢嘆。食物由有酒店西餐經驗嘅廚師主理，用料考究同時定價親民，好似即叫即做嘅鮮果雪糕窩夫都係$55！咖啡就用上本地烘焙嘅得獎咖啡豆，有水準。
 

Pastime嘅意思係消遣，而餐廳嘅中文名就叫聚點，原來係老闆覺得呢區比較少畀年輕人Gathering嘅餐廳，就希望呢間Cafe可以提供一個大啲嘅空間畀大家見面或者放鬆下。二樓會按需要開放，座位隔離就有可以睇到街景嘅玻璃窗，好啱嚟嘆杯咖啡睇下書所以又叫Reading Zone。
 

非一般炸雞（$68）

有幾非一般？原來係廚師特別將雞翼同雞槌炸兩次，腌好先炸至七分熟，鎖住肉汁然後包上一層鹹蛋黃牛油再炸至全熟。咁樣雞肉唔單止食落更嫩滑多汁，外面亦更易上色。炸皮本身都夠香脆，再加埋鹹蛋黃嘅鹹香同沙沙口感，惹味又唔油膩。
 

蜂蜜焦糖多士（$30）

用厚身方包加上牛油焗成多士粒粒，再加上楓糖漿。材料簡單，所以好味嘅秘訣在於即叫即焗，將牛油嘅香氣發揮至最大！多士外脆內軟，加上用焦糖煮過嘅蘋果片，甜度啱啱好。
 

龍蝦金華海鮮湯意粉（$168）

主食同樣出色，龍蝦根據時令選擇澳洲或者美國龍蝦，肉質彈牙爽甜。而用茶壺上枱嘅海鮮湯就用咗蝦、龍蝦頭、金華火腿熬製而成，非常鮮甜濃郁！所以建議大家可以唔加湯先試原味，再按喜好逐少加入海鮮湯。
 

 

鮮果雪糕窩夫（$55）

其中一位廚師曾經喺五星級酒店掌廚，呢份鮮果雪糕窩夫當中窩夫嘅蛋漿比例就有參考到酒店嘅食譜。同樣係即叫即做，窩夫焗出嚟口感外脆內鬆，濕潤度適中。配搭多款時令水果同雪糕好滿足！溫馨提示大家影相最好快啲，雪糕會融之餘窩夫都會變軟啊。
 

拿鐵（$40）

咖啡選用本地咖啡烘培品牌ZUCO Coffee Roasters出品，除咗冷萃咖啡會用時令單品豆之外，其他咖啡、包括呢杯拿鐵都用咗佢哋贏得2020 Australian International Coffee Awards金牌嘅ZOOM Espresso Blend，係中烘焙嘅洪都拉斯、埃塞俄比亞、巴西拼配豆，帶朱古力香甜，後韻係藍莓嘅酸感，味道平衡。
 

青檸空間（$45）

咖啡以外亦有花茶、梳打等，仲有三杯賣相別緻嘅Mocktail，好似呢杯青檸空間就以蝶豆花配搭青檸。藍色嘅蝶豆花茶加青檸就會變成紫色，漸層賣相吸引。飲落味道酸酸甜甜，加上氣泡口感相當清爽解渴。
 

Pastime
地址：佐敦炮台街29-31號地舖

文、相：Cathy.H