九龍城又有好西食啦，呢區最近就開咗間新嘅日本餐廳，樓高五層，中間有三層係比食客用餐，另外兩層就係VIP房，一間餐廳就有齊壽司、鐵板燒、 爐端燒同和式料理食，仲有五大名廚坐陣，選擇多到你唔知點揀！

三和叙佔地五層，地下、一樓同二樓就各自有個主題，分別係爐端燒、鐵板燒同壽司，不過如果你坐爐端燒果層，想食壽司都可以照叫。每層樓底都有三米高，食客可以喺舒服嘅環境下食到正宗嘅日本料理。

地下果層係爐端燒，主廚周海興有三十幾年日本料理經驗，佢話爐端燒最重要嘅係選材同火候，特意揀咗三款唔同特性嘅備長炭，一款火力持久、一款炭香味重、另一款就可以令火力平均。

日本黑豚肉蘆筍卷($80)，蘆筍食落好爽口，辣辣地好惹味。牛舌串($90)配埋芥末籽同蒜蓉一齊食，開胃之餘又唔會搶咗牛味。鹽燒冬菇($30)掌握得啱啱好，燒完仲好多汁。

一樓係鐵板燒同和食，鐵板鰻魚選用九州鰻魚，而且Size 嚴格控制喺300g，燒嘅時候先燒皮果邊，咁樣先做到皮脆效果。另外用咗唔要嘅鰻魚骨、煮酒、味醂、豉油同糖熬四個鐘煮成鰻魚汁。

鹽焗鱈場蟹將蟹放上鹽到焗，鹽嘅鹹香味會慢慢滲入蟹到，食落鮮甜又多汁。黃金炒飯加咗大量蛋汁落去一齊炒，蛋味香得嚟粒粒分明，嚟自日本高山嘅飛驒牛熟成程度啱啱好，入口好軟腍～

日本料理又點少得壽司同刺身，寒鰤刺身質感較有咬口，赤鯥經過火灸，魚油香重，大拖羅壽司就入口即溶。

三文魚籽預先用豉油、味醂同酒調味，食落一啲腥味都無。蔥吞拿魚腩卷加咗紫蘇葉，食落有淡淡紫蘇嘅香氣。

另外仲有兩層係VIP 房，一層就有大型餐桌，另外一層就設有梳化同酒吧，同朋友聚會或者開Party 就最啱啦！

三和叙

地址：九龍城福佬村道46號 

電話：2321 0867

文：Yanica

相、片：Tom Li