開業只有個幾月嘅呢間元朗小店，迅速成為區內人氣新熱點，全因舖頭嘅招牌勁吸引，而且價錢非常親民，就係花！膠！

即刻睇下店子招牌菜──花膠蠔汁撈麵($48)，有4塊花膠、5件花菇、兩條菜心以及用嚟撈麵嘅麵湯，非常闊綽。粉麵則可選粗麵、幼麵。

嚴選來自冰島嘅鱈魚花膠，經浸發再煮成後，花膠口感好軟腍，而且膠質極重，食完嘴唇有種骨膠原感覺。花菇亦非小貨色，而係菇味較為香濃嘅原木花菇，食落彈牙又爽滑，好正！麵湯亦好有心機去做，用超過20斤豬骨、3隻老雞，加埋金華火腿去熬湯，湯味濃郁。

另有花膠湯麵，一樣有花膠、冬菇及菜心，粉麵可選粗麵、幼麵、米粉及河粉，價錢為$38。

不想跟粉麵嘅話，可試下花膠雞絲魚翅。湯底係用鯊魚骨、雞骨、火腿等配料熬成湯底，質地有啲濃稠。入面有一大塊花膠、冬菇及素翅，一樣好足料，價錢為$38。

同撈麵食嘅花膠有啲唔同，呢款花膠係鱸魚造，質地較為挺身，口感亦爽口啲，但一樣咁有骨膠原感。另有上湯雞絲魚翅($28)。

至於甜品，有以北海道3.6牛奶、花膠、紅棗、薑而煮成嘅花膠紅棗燉鮮奶($55)，花膠食落好軟腍，而且奶味香濃，感覺好滋補。

舖頭好重視客人食得健康，所有菜式均不加味精之外，老闆更購入糖度計，定時檢測菜式嘅甜度，甜度需達指定標準先會出菜，好專業，亦好貼心。

另有幾款小食，有（左前）秘製辣醬拌皮蛋，將辣椒切碎並炒香，然後加入秘製醬汁，味道辛辣；（左後）涼拌甜酸木耳，以頂級雲耳「貓耳朵」入饌，味道酸酸辣辣，好吸汁。還有用白醋醃漬嘅（右）傳統醃製酸辣蘿蔔，幾fresh幾醒胃。小食價錢均為$15/碟。

除咗花膠食物及小食，店子亦供應熱飲及汽水，推介呢3款熱飲，分別係：玫瑰紅棗薑茶、雪梨柚子花茶及山楂雪梨茶，價錢為$22/杯。花茶杯以鑲刻設計，好靚！

舖頭仲設有花膠、冬菇等乾貨，畀鍾意食嘅客人買走添，新年優惠價為北極鱈魚花膠 $368/包、花菇$78/包！

店內座位不多，只有廿零個座位，但尚算寬敞。開放式廚房、木系餐桌椅，加上掛喺牆上嘅木餐牌，都幾有古代客棧嘅感覺。

老闆Berry及Hilary主意多多，已經計劃推出以深海野生海參做主打嘅一系列食品，包括聽到都覺得驚奇嘅海參糖水！而且更籌備緊衝出元朗，喺荃灣、屯門、上水、沙田等地區插旗添，各位要留意下！

漁民麵館
地址：元朗擊壤路9號金寶大廈4號地舖

文：Joy