全城抗炎！將屋企變Cafe 網購咖啡包/冷泡茶/甜點推介

疫情之下，大家都多咗時間留喺屋企，但偶然咖啡癮起，或者掛住去Cafe Relax下嘅感覺點算好？其實只要花啲心機，就可以將屋企變成Cafe！香港有唔少咖啡同茶嘅品牌可以網上訂購，唔需要專業工具都可以沖到杯優質咖啡或者冷泡茶。再配埋件蛋糕，安坐家中都可以享受下午茶。

咖啡掛耳包推介

本地新咖啡包品牌 CAYU Coffee Company

香港新創立嘅咖啡品牌，目標係簡化大家喺屋企沖咖啡嘅步驟，鑽研後就推出三款掛耳式咖啡包！分別係按唔同心情品味唔同產地風味嘅The Mood系列，將甜點嘅氣息糅合到咖啡當中嘅The Sweets系列，同喺蘇格蘭用威士忌酒桶陳存一段時間以吸取精華嘅The Whisky系列。

訂購方法：透過Facebook及Instagram私訊，或到指定網店訂購

驚喜咖啡包寄上門 Brew Note Coffee Roaster

佢哋唔單止係北角一間自家烘焙咖啡館，亦有將烘焙嘅咖啡放上網畀大家訂。掛耳包有House Blend及多款嚟自唔同產地嘅單品豆。想特別啲可以揀Coffee Travel Boxset，由咖啡師隨意配搭，可以一盒試到唔同風味嘅咖啡豆！

訂購方法：網上預訂 - https://restcoffeetea.com/

台灣到港咖啡香 Artista Perfetto

品牌從台灣回流到銅鑼灣開店，咖啡就依然堅持喺台灣烘焙，將當地嘅咖啡文化同感覺帶嚟香港。掛耳包House Blend一樣有兩款選擇，01係中淺烘，花香、莓果茶感較重嘅Fruity；02係中度烘焙，帶朱古力、堅果味嘅Nutty。不時亦有單品豆掛耳包。

訂購方法：網上預訂 - https://artistaperfetto.com/

冷泡茶推介

多款口味冷泡茶 Tea Express Bar by Jrink

夏日炎炎最啱飲冷泡茶，茶包只要用常溫水放喺雪櫃浸泡八個鐘就飲得，超方便！加上冷泡方式所釋放嘅咖啡因同單寧酸都比較低，飲落亦更清爽更甘甜呀。呢個品牌從多個國家嚴選原材料，配搭成唔同風味嘅茶包，好似桂花烏龍、茉莉鐵觀音、玫瑰紅茶等，總有一款啱心水。

訂購方法：網上預訂 - https://bit.ly/32uVbqj

新出冷泡桃灼烏龍上林茶舍

上環呢間手沖日本茶吧亦新出兩款冷泡茶包，桃灼烏龍帶天然嘅蜜桃果味同清新花香，桃灼紅茶同樣有果香但增添一層糯米香更獨特！兩款茶包嘅建議冷泡法係兩個茶包加500mL水，放喺雪櫃2-3個鐘就完成喇。

甜點推介

新出茶香卷蛋小念頭

旺角呢間主打茶香蛋糕嘅甜品Cafe有開網店，熱賣嘅鐵觀音芝士蛋糕、焙茶雙層芝士蛋糕都有得訂。最近仲新出兩款口味嘅卷蛋：伯爵茶香橙卷蛋，同朱古力鐵觀音卷蛋，前者嘅伯爵茶忌廉配搭香橙醬感覺清爽，後者有朱古力淋面同鐵觀音茶凍口感豐富。

訂購方法：網上預訂 - https://littleideacafe.com/

新鮮製作蛋糕+純素甜點 JOMO

呢間喺西營盤同將軍澳都有分店嘅Cafe亦可以喺網上預訂佢哋新鮮製作嘅手工甜品，原個蛋糕推介黑芝麻戚風蛋糕，用台灣黑芝麻製作，口感輕盈甜而不膩！另外亦有今年大熱嘅巴斯克焦香芝士蛋糕。而純素甜點就有檸檬撻、咕咕霍夫等選擇。

訂購方法：最少3天前網上預訂 - https://www.jomocnc.com/shop

夢幻無麩質蛋糕 Infiniti C

呢間咖啡店嘅蛋糕亦好受歡迎，唔少人會特別去試佢哋嘅Signature Earl Grey Cream Cake，淺藍色嘅輕盈忌廉下面係茶香濃郁嘅伯爵茶蛋糕，本身係無麩質，如果係食純素嘅朋友亦可以另外訂購純素版！另外亦有其他純素、甚至適合生酮飲食嘅蛋糕，照顧唔同需要。

文：Cathy
圖：官方網站截圖