繼立食壽司之後，香港又有另一間立食店，今次竟然係立食燒肉專門店！舖頭位於旺角，全店可以容納18人，吧枱上面放有迷你燒爐，一至兩人用一個。日本其實都有唔少立食燒肉店，快靚正而且一人燒都唔會老尷。平時食燒肉都需時一兩個鐘，咪企到好攰？所以餐廳主打日本和牛，燒烤時間比海鮮快，平均用餐時間可能30至45分鐘左右。
唔好以為食和牛一定好貴，呢度可以一片片咁柯打，最平係$12/片起！和牛主要來自日本九州鹿兒島地區，以A4及A5為主，而且部位好齊全，由最普遍嘅西冷肉眼，胸腹肉亦有分上中下前後五款，單係牛都有17款，價錢最貴都係＄35/片。
A5肉眼 $35/片、A4西冷 $28/片
負責人Charles稱，和牛其實有好多部位都好食，而且有唔同肉味及質感，於是一次過入貨，師傅再細分成唔同部位供應俾客人。佢自己最鍾意食脂肪較少但肉味濃嘅肩胛位同油香重嘅前胸位。
（左起）前胸部 $22/片、肩胛 $20/片、中胸腹 $12/片
後腿肌 $15/片
因為內臟唔可以入口，牛類只有牛舌、牛肚同牛胸爽唔係來自日本，但都係同著名肉檔攞本地新鮮貨，所以係限量發售。平時打邊爐可能見過又名牛胸油嘅牛胸爽，燒耐少少等燒走油脂，食落好甘香。
牛舌、牛胸爽 $20/2片
決定唔到食咩可以叫定食，$98有5片A4級和牛，款式就視乎當日有咩靚貨由師傅發辦。採訪當日係上、中、下、前同後胸腹肉，可以比較到同一部位但唔同位置有咩分別。師傅話中胸腹油花比較均勻，而前後就帶半肥瘦，上下就偏向多油份。
（右起）中、後、前、下、上胸腹肉
所有和牛完全無調味，靚肉當然唔使整色整水，不過加少少鹽可以吊出鮮味。所有店舖供應五款唔同口味嘅日本鹽，亦有三款燒肉醬汁。鍾意重口味可以試吓辣度由1萬至20萬嘅辣椒粉，自家製辣醬仲高達100萬，食唔到唔好亂試。
地址：旺角白布街2-24號藝興大廈8號舖
文、相、片：Perrins
