又到食大閘蟹嘅季節啦！尖沙咀呢間日本大阪米芝蓮二星嘅壽司名店，最近推出季節限定嘅大閘蟹主題Omakase，店主兼總廚 Chef Hiroki自從試過大閘蟹後，就對佢嘅鮮甜甘香一試難忘，所以決定將香港人熟悉嘅食材融入壽司中。

香港限定大閘蟹料理

大閘蟹膏軍艦

可以望住大廚們即場拆蟹，大閘蟹膏入口即化，濃香蟹膏配埋Chef Hiroki 親自調較嘅日本醋飯，味道好和諧！

大閘蟹北海道毛蟹黑魚子飯

有北海道毛蟹、大閘蟹粉、白海膽同法國亞基坦鱘魚子，食落去有陣陣黑魚子嘅鹹香同海膽嘅鮮甜，配埋陳年花雕玫瑰露陳年黃酒所做成嘅啫喱，散發淡淡酒香。

十四代清酒醉大閘蟹膏

用「十四代」清酒浸過再蒸熟嘅大閘蟹，再拆出蟹膏。「十四代」清酒嚟自日本山形縣，係日本而家最火紅、最貴、最難買嘅清酒，味道甜中帶微酸，食蟹膏嘅時候都感覺到陣陣酒香，無咁易漏。

黃金大閘蟹大福(上)、蟹肉蟹膏長野松茸(下)

大福煙煙韌韌，餡料係用鹹蛋黃、大閘蟹蟹肉同蟹膏製成，味道一啲違和感都無。蟹肉蟹膏長野松茸用長野縣松茸配大閘蟹嘅蟹肉蟹膏，有松茸獨特香氣，又有蟹嘅鮮味。

蟹肉濃湯配蟹肉黑魚子威化

蟹肉濃湯以魚湯同大閘蟹肉蟹膏製成，蟹味重得嚟唔會過鹹，伴菜蟹肉黑魚子威化，總廚建議一啖威化一啖湯咁食就完美啦！

蟹油薑雪葩

用日本子薑製成嘅雪葩，再淋上大閘蟹油，食落好重薑味，再配埋香濃嘅蟹油，估唔到又幾夾！

除咗大閘蟹料理，餐廳同時保留咗大阪店總店嘅經典菜式，秋刀日本松茸壽司，魚香味好重，入口即融，有埋淡淡松茸香味。

鰤魚壽司用北海道野生鰤魚，先用炭火輕輕燒燒表面，除咗魚油香外，仲有少少炭火嘅味道。拖羅蔥花鐵火卷選用蘇格蘭野生吞拿魚，雖然唔係入口即融果種，但反而鮮味好突出！

總廚為咗保證食物質素，menu係根據當日食材嘅新鮮度而決定，所以每日都會有唔同。想食的話記得先打去訂位啊！

壽司芳

地址: 尖沙咀金馬倫道8號The Otto酒店1樓

文、相、片：Yanica