你無睇錯，平日喺酒樓、大排檔食一個枝竹羊腩煲都要百零蚊，呢間餐廳可以做到$58，仲要任食？價錢雖然抵，但羊腩煲質素係點先？即刻睇睇開飯仔有無中伏！

一上枱就見到大大個羊腩煲，羊腩基本上都熟晒嘅，不過用gas爐再翻熱，唔使點等就食得！入面有羊腩、冬菇、枝竹、蘿蔔、娃娃菜、馬蹄、薑及筍。

羊腩來自紐西蘭，脂肪不太多，肉韌但軟腍，仲食到帶點微脆嘅羊軟骨添，堅！而且羊羶味濃，嗜羊之人肯定鍾意。

冬菇比想像中厚身，而且煲得好腍。而枝竹都幾脆口，夾埋羊腩係絕配，無得輸，略嫌分量太少！

蘿蔔就幾大嚿，而且好吸羊腩煲湯汁，好正。珍珠馬蹄細細粒，一樣幾入味。

追加嘅分量都幾多，而且餐廳會加水，以免羊腩煲越滾越鹹。

每位客人會跟一小碟腐乳，味道帶點酒香。

嫌單食羊腩煲好寡？加$30可追加生菜、娃娃菜及蟹粉臘味糯米飯！另外，飲品係額外收費，紙包飲品$6/包、汽水$9/罐。

試後感：

其實羊腩煲味道嚟講不算伏，反而係柯打時店員無預先講聲，原來所謂嘅羊腩煲放題只能追加冬菇同羊腩，其他羊腩煲內嘅食物係無！得！追！加！其他配料要散叫，好似枝竹$30/份，生菜$25/份，如果你追加咗，咁計番個價錢就唔太抵食喇！最後開飯仔與友人追加咗4次飽肚離場，唔知你哋又食到幾多呢？

$58羊腩煲放題
優惠日期及時間：即日起至11月30日5pm-3am
價錢：$58/位，每位再加醬油費$10，及另設加一
限時：每位75分鐘
注：星期五至日、公眾假期及其前夕另收附加費$20/位；只接受現金付款；優惠須以電話預訂

上海新大眾大閘蟹專門店
地址：黃大仙飛鳳街46號地舖

文：Joy