前五星級酒店餅廚掌舵銅鑼灣開店創千層酥皮系列

麵包界近年競爭激烈，銅鑼灣最近又有新成員加入，由前五星級酒店首席麵包師傅主理，製作出一系列歐陸風格嘅麵包甜酥。當中有開心果千層酥皮撻、千層酥皮吐司、蜂巢狀牛角包等等，睇見都流晒口水啊～

殿堂級前五星級酒店餅廚掌舵

呢間歐陸風麵包店裝潢吸睛，型格漆黑階磚牆配紅白拱形簷篷，好似瞬間穿梭到歐洲嘅餅店咁。餅店新開業未到一個月，已經有唔少捧場客，負責人馬來西亞籍總廚Mohd. Iqwan Shah同Wester主廚坐擁超過20年製作包餅經驗，更曾任職文華東方酒店同麗晶酒店嘅餅廚，所以出品水準有保證。店舖更特別聘用特殊人士，趕上麵包潮流同時關懷弱勢社群。

餅店有2位前五星級餅廚坐鎮，每日凌晨1點開工，做足13個鐘先收爐

麵包櫃擺放琳瑯滿目嘅餅麵包款式，當中有鹹有甜、有歐式包款、亦有相對港式口味嘅選擇，甚至連原個蛋糕同咖啡特飲都有，種類相當豐富。餅店嘅首席麵包師傅Mohd. Iqwan Shah擅長製作歐式麵包，單係酥皮款式已經有好多款，開飯仔到訪店舖時，發現大部分客人均聚集喺酥皮櫃前，紛紛入手千層酥皮撻同牛角包，絕對係舖頭嘅皇牌。

酥皮系列種類豐富，有千層撻、酥皮吐司、牛角包以及丹麥酥

日做13小時自家製人氣酥皮千層系列

雖然酥皮千層撻喺多間麵包店頻頻出現，不過家家戶戶製作酥皮嘅方法同用料都略有分別，而呢度主要供應原味焦糖同當紅嘅開心果口味，同時亦係最花時間製作嘅出品，由餅底到蛋漿要花上3日先完成。酥皮麵糰用上法國牛油、法國忌廉以及自家培植嘅酸種製成，拌勻材料、打成麵糰後，需冷藏發酵以保持鬆軟濕潤，再反覆摺疊、輾平麵糰，最後先可以喺模具上塑型。花花狀嘅千層蛋撻足足有54層酥皮，層層分明帶微焦感，鬆脆酥皮同Q嫩蛋心完美融合，口感好豐富！

千層撻同立方千層酥均用相同酥皮麵糰製作，摺疊後足足有54層

雙重開心果酥皮千層撻（$22/件）

除咗酥皮千層撻，仲有新鮮出爐、排排企約8cm高嘅立方千層酥盒，拎上手都幾有分量㗎。同樣以酥皮麵糰為基底，切開會湧出流心果醬，畫面好療癒～開心果味表面塗上日本同自家出品嘅開心果醬，再灑上開心果仁碎，搭配香脆酥皮麵包同流心果醬，四重層次盡收口腔內，獨食一定好滿足！另有士多啤梨口味，鋪上果醬同士多啤梨果肉，酸酸甜甜夠醒胃。

立方千層酥盒系列（$35/個）