楓林小館可以話喺好多沙田友嘅共同回憶，呢間粵菜酒家喺大圍經營咗超過60年，以燒乳鴿、椒鹽蝦等多道招牌菜而聞名。2016年宣佈結業時，好多人都表示唔捨得。不過各位粉絲最期待嘅畫面終於又再出現喇！佢哋重開返喇！雖然重開地址搬離咗沙田，去到港島灣仔，但係4大招牌名菜不變，繼續有得食！

新店同樣叫返「楓林小館」，開喺銅鑼灣同灣仔中間嘅位置，由舊老闆彭先生同酒店業朋友合作經營，廚房亦有老師傅坐鎮。無論門口裝修、MENU都同舊店大致相似，佢哋喺堅持回憶中嘅味道之餘，亦力求創新，加入多款粵式點心、川式前菜等。

 右邊舊圖：P.J.

粉絲最掛住嘅四大招牌菜：紅燒乳鴿、椒鹽蝦、荔芋香酥鴨、蝦子柚皮全部喺齊度。紅燒乳鴿而家賣$78隻，感覺比以前嘅大隻少少。師傅特地選用中山石岐，約18至20日大嘅乳鴿。先以花椒、八角、香草等製成滷水膽，浸泡乳鴿30分鐘，再以麥芽糖、浙醋同酒為乳鴿上色，同吊起風乾2個鐘，到客人落單時先再逐隻逐隻吊炸。所以每隻乳鴿嘅火喉控制得啱啱好，塊皮好香，內裡嘅肉依然嫩滑而且多肉汁，仲滲有陣陣滷水香。當然，一塊塊五顏六色嘅蝦片亦係佢哋嘅signature啦。

 右邊舊圖：Gourmet KC

椒鹽蝦選材亦嚴謹，用嘅係新鮮游水海中蝦。師傅對油溫特別講究，爆香咗淮鹽同蒜蓉之後再用猛火生煎，並加入紹興花雕酒，有助吊出蝦嘅鮮味。沾滿蒜香嘅蝦殼相當惹味，好容易令人不顧儀態，忍唔住要吮埋佢。同舊時嘅比較，可以話有過之而無不及，擺碟仲靚咗添。

 右邊舊圖：Alex888

荔芋香酥鴨炸得好酥脆，鴨肉香酥而芋頭又香又粉，點埋配醬食，一啖就同時食到脆、香、甜、酥、蓉等多種味道同口感，不過食多幾件就好易飽，人多啲些牙食就啱數啲。講返用料，師傅只用八月十五後嘅芋頭，會粉啲㗎。鴨肉醃過後再用秘製鹵水香料煲熟，拆骨起肉，用芋蓉包住再炸，都幾多功夫下。

 右邊舊圖：IMChrisCheung

而坊間已經好少地方有得食嘅蝦子柚皮，則比以前厚身咗好多，而且完全冇苦味，入口軟腍，同埋香濃蝦籽鮮味。原來係因為師傅先用鯪魚、瑤柱、蝦米、蝦籽煎香熬成湯，燜煮三個鐘後再用原湯打芡，喺柚皮上篤幾個窿仔先撒上蝦籽，令到蝦籽分佈更平均，可以滲埋入去，啖啖鮮香。

除此之外，以前嘅功夫菜仲升左lvl添，例如豉汁煎封釀豆腐，就由鯪魚肉升lvl咗做蝦膠，轉埋用石板上枱，更耐熱亦更爽口；苦瓜炆龍躉頭腩，就由斑塊變成新鮮沙巴龍躉，魚肉質感更滑更厚。老店重開，整體食物質素暫時都可以話係能夠保持返舊店原有嘅水準。

另外，舖頭亦新增咗一啲粵式點心同前菜，同樣都係注重手工技巧同選材。最特別要數係思雅小青瓜，呢道菜充份表現出師傅嘅刀功。每條青瓜都呈螺旋形，再配以蒜頭、辣椒醬、鎮江醋等調味，香辣爽口，後勁凌厲。

 蝦餃皇

楓林小館
地址：銅鑼灣謝菲道379 - 389號特麗樓1樓及地下5號鋪
備註：現為試業階段，1月11日正式營業

文：Kar
相、片：Tom Li