而家去唔到旅行，好多朋友都會想念台灣的味道！荃灣最近就新開咗一間台灣菜小店，由一對情侶開設，餐廳個名夠晒浪漫，你妳代表他與她。食物方面主打新式台灣菜，包括手作芋泥吐司、珍珠吐司等等，負責人話希望將佢哋去台灣旅行時食到嘅美食帶嚟香港畀大家。裝修以紫色及木色為主，溫馨又舒服。

你妳珍珠魯肉飯($36)

珍珠同魯肉嘅搭配你有無想像過？將珍珠放入魯肉飯，白色珍珠用台灣醬油及油蔥酥炆煮，味道鹹香帶微甜，加埋肉鬆味道更香～而珍珠魯肉比起一般魯肉飯又更有口感，味道比想像中和諧。

濃厚奶茶珍珠吐司($45)

講到台灣菜，又點少得近年好興嘅手作吐司。濃厚奶茶珍珠吐司以自家手作芋泥作基底再加入奶茶，奶茶味同芋香都恰到好處，加上煙韌嘅糖漿珍珠，有種飲緊珍奶嘅感覺！

芋見紫薯吐司($45)

芋泥加紫薯，淺紫色搭配深紫色，絕對係相機食先之選！而且兩者味道真係幾夾，鍾意芋泥同紫薯嘅朋友不可錯過～

芋泥肉鬆吐司($40)

至於唔好甜嘅開飯仔囡們都有選擇～可以試吓呢個招牌鹹食芋泥肉鬆吐司。

台南米糕波波球($35)

去過台南食米糕，都知通常份量都較大，而呢度就將台南米糕整成波波球嘅形狀，方便入口；味道就跟返傳統，加入蝦米、冬菇及台灣醬油。

雞捲甜不辣配乾拌麵($78)

想食啲香口嘢，呢度都有鹽酥雞、花枝丸、雞捲及甜不辣等+魯肉飯及乾拌麵嘅配搭，雞捲及甜不辣都炸得香脆，而乾拌麵加上魯肉醬汁，每一啖都食到魯肉嘅香味。

高雄紅茶牛奶珍珠($35)

好多人都台式飲品嘅印象都係甜，而呢度嘅紅茶牛奶珍珠反而茶味及奶味較突出，而且加入決明子，味道又幾特別。

你妳

地址: 荃灣運通街6號運通洋樓地下K號舖

文、相、片: Yanica