各位以後想喺旺角「搵食」嘅話，又多一個新選擇啦！呢間新商場嘅Food Court合咗共六間特色食肆，由札幌味噌拉麵、清邁咖喱湯麵，食到多汁牛肉漢堡，甚至一盅兩件都得！
 

旺角煮場位於T.O.P地庫，遲啲旺角港鐵站B4出口啟用之後，落一層就直接去到，幾熱或者落雨都唔洗驚。而且匯聚咗六間外國及本地餐廳，同朋友可以一站式試哂唔同地方風味。 
 

首次抵港餐廳

北海道人氣味噌拉麵　味の時計台

味噌牛油粟米拉麵（$87）

最受觸目嘅，就要數到呢間1986年創立，嚟自日本北海道嘅拉麵店，喺日本全國有約60間分店，而旺角係香港首店！受歡迎嘅原因係選用優質食材，好似湯底用咗蔬菜、豬骨同雞骨煮成，而且從橫濱工廠直送到港。味噌就喺北海道製造，當地空氣同水質都非常好，質素自然亦有保證。
 

特濃蝦湯醬油拉麵（$95）

蝦湯嘅精華蝦油就用北海道蝦原隻磨成粉，集蝦殼同蝦肉嘅精華於一身，濃香十足。而叉燒就先鹵過再燒，逼出豬腩肉嘅油香。拉麵亦係用日本雞蛋同麵粉，喺香港製造保持新鮮。餐廳社長志釜利行先生表示有意喺香港開更多分店，大家不妨密切留意。
 

清邁地道咖喱金麵　Khaosoi House

清邁咖喱牛肉湯麵（$58）

嚟自泰國嘅Khaosoi House亦係首次進駐香港，必食推介係邁咖喱牛肉湯麵，雞蛋麵由小麥製作，再炸成金黃色嘅金麵，賣相先加分。咖喱湯底就用牛肉、椰奶同香料煮成，香辣惹味。另外仲有椰汁青咖喱飯、泰式海南雞、泰式炒金邊粉、泰式青木瓜沙律等提供。
 

 
人氣餐廳推介

美式Juicy炸雞　Popeyes

2件炸雞餐（$48）

之前要入到機場禁區先食到，而家終於喺旺角都食到大力水手炸雞啦！品牌嚟自美國路易斯安那州，1972年創立至今已經有超過1,800間分店。招牌炸雞皮脆肉嫩，而且保持到肉汁，就算唔係食肉獸都會滿意。
 

名廚主理輕食　Cornerstone Cafe

安格斯牛肉漢堡配薯條（$68）

叉燒夾包（$38）

由名廚Mr. Harlan Goldstein主理，供應全日早餐、漢堡、三文治等輕食。首推安格斯牛肉漢堡，漢堡扒肉汁夠多之餘亦啖啖牛肉香。另一推介係中西合璧嘅叉燒夾包，用卡真醬調味嘅叉燒係亮點呀。
 

本地星級代表

米芝蓮推介叉燒飯　鴻師傅

叉燒皇煎蛋飯（$58）

由阿鴻小吃嘅黎偉鴻師父創辦，阿鴻小吃北角總店連續五年得到米芝蓮一星肯定，品質當然有保證。第一次試嘅話當然要先食曾經創下日賣300碗記錄嘅叉燒皇煎蛋飯啦。
 

懷舊港式點心　蓮香

古法馬拉糕（$18）

鮮蝦餃（$30）

品牌喺香港已經有超過80年歷史，嚟到旺角Food Court一樣供應招牌點心，好似蝦餃、蓮蓉包、馬拉糕、芋頭糕等等。另外亦有小菜客飯同蒸飯選擇。

旺角煮場
旺角彌敦道700號T.O.P地庫

文、相、片：Cathy