天氣轉涼，飲返碗熱嘅咖哩湯就最啱！無錯，呢間嚟自日本北海道嘅名店主打可以飲嘅湯咖哩，揉合東南亞同日本咖哩風格，香濃暖胃又健康，仲可以自選辣度。除咗招牌雞髀野菜同豚軟骨野菜之外，仲有香港限定嘅豚肉野菌芝士口味，半融芝士加埋香濃咖哩湯，雙重滋味！
 

GARAKU Soup Curry嚟自北海道札幌，首間香港分店座落尖沙咀，供應多款湯咖哩。佢地湯咖哩嘅特色係用21種日本、印度、印度等地唔同香料，加上雞骨、牛骨、豬骨、蔬菜同水果熬製，味道香辣。而且唔加麵粉，配飯食或者就咁飲但得。
 

香港店用嘅咖哩、香料、蔬菜等都從日本運到，特別係蔬菜唔少都從北海道運過嚟，希望大家食到同日本一樣嘅味道。而咖哩可以自選辣度，由1到40。唔好以為佢係一般偏甜嘅日式咖喱，建議大家可以從3-4級開始試起。北海道氣溫較低，所以佢地通常會食額外加入辣椒醬嘅第6級。
 

雞脾野菜湯咖哩（$138）

人氣No.1口味，主角雞髀先用秘方醃製，放入高壓煲炮製，最後用火槍燒出雞油香，加上咖喱湯裡面有炒過嘅香料，加上自家製香料油同辣粉，香氣誘人。配料有西蘭花、薯仔、椰菜、紅蘿蔔、甜椒、蓮藕、水菜、黑木耳、鵪鶉蛋同麵包粒，豐富之餘亦增添更多營養同纖維。
 

蔬菜多但唔會覺得寡，因為細心處理過，例如西蘭花、薯仔炸過更香口，椰菜同咖喱湯一齊煮至入味，水菜生食保留爽口口感。主食可以選擇配白飯或者麵包，米同麵粉都係嚟自北海道，推介大家可以試麵包，因為麵包烘熱後有淡淡牛油香，而且口感柔軟，索晒咖哩湯精華嚟食最好味。
 

焙煎豚軟骨野菜湯咖哩（$148）

人氣No.2係豬軟骨，北海道豬軟骨燉煮十幾個鐘，上枱前再用火槍燒炙表面，逼出香氣。豬軟骨非常軟腍，瘦肉鬆化而脂肪更加係入口即溶！加上口感豐富嘅蔬菜，撈飯食真係話咁易食完一大碗。
 

 

豚肉雜菌湯咖喱配三種特色芝士醬（$148）

特別為香港店設計嘅口味，用北海道豚肉片搭配舞茸等雜菌，再加上用Parmesan、Cheddar、Mozzarella三種芝士調配嘅特色炙燒芝士醬！豚肉口感軟嫩，雜菌香味濃郁，而芝士醬柔軟又有芝士香，唔單止可以減低辣勁，仲令咖喱湯食落更惹味。
 

自家秘製炸雞（$88）

小食暫時只有一款，炸雞即叫即炸，雞肉先用秘方醃製入味，就算一邊食咖喱一邊食炸雞，炸雞香味都唔會被咖喱香蓋過。而且炸漿夠薄又香脆，雞肉鮮嫩。
 

GARAKU Soup Curry
地址：尖沙咀梳士巴利道18號Victoria Dockside K11 Musea 4樓401A號舖

文、相、片：Cathy