召喚芝士控！有大型超巿呢期舉行緊「手工芝士及特色冷盤巡禮」，一次過集合晒唔同國家嘅傳統芝士、火腿、腌製肉類同醇酒產品，仲有幾款現場即製嘅芝士小食添呀！

首推嘅梗係彩色芝士多士啦（只限時代廣場及海港城分店），輕輕拉一拉絲就拉到成條彩虹出嚟，又靚又邪惡，呃like一流！彩虹色點嚟？原來係嚟自荷蘭Landana牛奶芝士。呢款芝士，以傳統方法手手製，用100%天然純荷蘭牛奶製成，再加入唔同顏色嘅羅勒醬同香辣參巴醬等令到佢變成彩虹色。至於個多士，除咗有齊呢4色芝士之外，仲前前後後夾多咗成6大塊Mozzarella Cheese落去添呀！今次真係… 豁！豁出去！食咗先算喇！

芝士燒海燒（只限時代廣場分店）一向都係吸like系嘅小食，今次燒嘅日本帶子同虎蝦，仲會配埋車打芝士、parmesan、傑克芝士等總共5種芝士一齊燒，係「芝」味嘅，但香濃得嚟又唔會搶咗海鮮本身嘅鮮味。

仲有幾款法式薄餅（只限時代廣場分店）包括三式芝士、火腿芝士，同西班牙辣肉腸藍徽芝士，全部都係即叫即製，睇住師傅亳不吝嗇咁係咁放啲芝士上塊薄餅度，係幾治癒嘅。

除咗即製小食，現場都有唔少手工芝士發售，買返去自製三文治之類都得。其中，有隻加拿大 Salt Spring Island手工芝士勁吸睛，芝士面頭又有花花又有檸檬咁~ 5款口味：羅勒、花瓣、白松露、檸檬同蒜香味，都係用新鮮山羊奶製嘅。負責人仲話外國人好鍾意將呢個杯仔咁嘅芝士，當布甸咁就咁直接嗶嚟食！又幾得意喎，試下先~

另外，芝士以外，仲有火腿同酒等等。呢份西班牙黑毛豬火腿體驗拼盤（只限時代廣場分店）就可以試到晒3款唔同部位、唔同韌度嘅火腿，香得嚟唔太鹹，就咁空口食都OK呀。

酒鬼最關心嘅梗係有咩酒。比利時手工啤酒、西班牙玫瑰雞尾酒等等都有，但數到最特別嘅，應該係本地手工啤門神為咗今次巡禮而釀造嘅「煙燻火腿味啤酒」喇，真係用咗Leoni意大利烤豬肉捲PGI去釀，微甜嘅麥味中滲有火腿味，配芝士食唔錯。

詳情
City’super
期間限定：即日 至3月4日

文、相：Kar