近年麻辣火鍋店越開越多，最新呢間嚟自台北，係台灣川式麻辣火鍋創始之一。香港店沿用台灣創辦人嘅秘方，用多款藥材同香料熬製，打邊爐之前記得飲返碗試下個原味先。配料更有香港限定，唔少賣相都啱哂「相機食先」！
 

夫妻鴛鴦鍋-麻辣鍋及酸菜白肉鍋（$188）

旺角新開夫妻沸片即係喺台北1985年創立夫妻肺片嘅首間海外分店，改名「沸」片係取「沸騰」之意，簡單啲嚟講即係更加好意頭啦。特色夫妻鍋即係台式麻辣鍋，湯底用紅棗、草果、白豆蔻等多款中藥同香料熬製，當中嘅秘製鴨血同豆腐絕對係亮點，皆因吸收哂湯底精華！
 

雖然用咗多款香料同辣椒，但湯底味道香辣而唔嗆喉，花椒嘅麻亦唔會太誇張，係有深度嘅麻辣風味。所以店家都建議大家喺滾起之後，先飲一小碗麻辣湯底試下個原味。而酸菜白肉鍋嘅酸味適中，可以一解肉類嘅油膩感。
 

暖男鍋-人參藥膳鍋（$198）

另外仲有美人鍋、暖男鍋、閨蜜鍋等，個名夠哂得意。其實美人鍋即係養顏花膠鍋，而暖男鍋就係人參藥膳鍋。
 

繁花似錦（$138）

知道喺香港大家都係「相機食先」，店家特別推出香港獨家嘅繁花似錦蔬菜盤，有齊唔同新鮮蔬菜同菇類，再堆砌到一大盤，建議至少有四個人一齊食先叫呀。
 

海鮮拼盤（$288）

而海鮮拼盤一樣大堆頭，有鮑魚、青口、蝦、墨魚仔、扇貝、沙白同斑片。
 

豚肉花（$118）

安格斯肥牛片（$198）

牛舌（$128）

食肉獸同樣有唔少選擇，賣相最靚嘅要數到呢碟豚肉花，將豬頸肉片砌到好似朵玫瑰花咁，油脂分布均勻口感爽滑。而牛肉就有日本A3雪花和牛、手切牛小排、安格斯肥牛片、牛舌、一口牛等。
 

 

夫妻肺片（$128）

店家唔少小食亦有特色，例如呢碟夫妻肺片其實唔係牛肺，而係牛雜呀。包括牛舌、牛肚、牛筋，香辣入味。
 

老油條（$48）

台灣人會特別點老油條配麻辣火鍋，秘訣係用長筷子夾住老油條喺鍋底浸10秒，咁就保證吸收哂湯底味道但又唔油膩！
 

餐廳用平板電腦落單，相當方便。
 

黃金魚皮（$78）

原隻龍蝦（$168）

團團丸丸（$118）

夫妻沸片
地址：旺角彌敦道639號雅蘭中心地庫B102號舖

文、相、片：Cathy