呢個夏日有「台風」襲港！最新台灣過江龍係呢間以一杯黑糖波霸鮮奶喺網上洗版，每次開新分店都大排長龍，最高紀錄為三個鐘嘅飲品店。而銅鑼灣係首間海外分店，到底有咩特別？睇開飯仔介紹啦！
 

波霸厚鮮奶（$30） 

嚟自台中嘅老虎堂唔單止開到台北，6月2號香港銅鑼灣店亦開始試業！號稱全台黑糖虎紋創始店，嚟到當然要飲招牌波霸厚鮮奶啦，注意返黑糖波霸同黑糖珍珠系列都係固定冰量同甜度唷。而且點凍飲先有黑糖虎紋，溫或者熱飲黑糖融哂就無花紋喇。
 

搖勻之後飲用 

而飲嘅時候要注意，係有指定步驟㗎：先把握時間，趁黑糖虎紋最靚既時候影相打卡。之後搖15至20下，令熱嘅手煮黑糖同冰凍鮮奶融合。店家表示最好喺半小時之內飲完，因為波霸遇冷會變硬。不過開飯仔自己就覺得半小時之後亦未至於太硬，因為一開始波霸係偏軟身嘅。
 

（左）黑糖波霸、（右）黑糖珍珠 

佢地特別嘅地方在於用黑糖代替坊間常用既果糖，而香港店除咗鮮奶之外，其他原材料都同台灣店一樣：每日喺店裡面用炒製台灣黑糖細火悶熬。好處係香味會更醇厚濃郁，黑糖亦比果糖健康。每一粒咬落都有甜而不膩嘅黑糖香，而波霸比珍珠大，適合鍾意有咬口既朋友，因為珍珠細細粒，唔洗點咬都可以就咁吞吖嘛。

無論係黑糖波霸定黑糖珍珠，都可以選擇要唔要奶霜（即係奶蓋），亦可以選擇配醇紅茶或者醇綠茶。不過台灣黑糖始終都係同鮮奶最夾。而如果想有多啲唔同口感嘅話，可以點虎虎生風厚鮮奶（$30），會有齊奶霜、黑糖波霸同黑糖珍珠，富奶香而且有兩種口感！
 

紅茶厚拿鐵（$24）

除咗黑糖波霸之外，係台灣賣得最好嘅係紅茶厚拿鐵同綠茶厚拿鐵，兩款都有奶霜，飲落口感都幾柔滑。不過略嫌偏甜，建議大家如果想試嘅話可以點低糖甚至係無糖。
 

醇綠茶（$19） 

醇茶系列同樣建議大家點無糖更清爽，飲落有綠茶清香，不過回甘不足，整體不過不失。建議大家第一次嚟都係先試招牌黑糖系列。
 

幫大家問埋品牌負責人，佢地表示有意係香港再開其他分店，請大家密切留意！而揀香港作為首間海外分店據點，都係因為香港同台灣飲食文化相近，而且亦多香港遊客鍾意老虎堂。銅鑼灣店6月2號上午11:00開始試業，所有飲品售完即止。
 

老虎堂
銅鑼灣渣甸街36號地下3號舖

文、相、片：Cathy