平時gathering飯局諗食咩都已經好頭痕，遇著生日飯局就更加頭痕！通常你問主角想食問，佢都會答你冇所謂。但冇所謂之中，生日飯總不能夠求其，環境氣氛、食物質素、生日驚喜等，通通都係考慮因素。就等開飯仔畀啲建議你哋參考下，中、西、日、café都介紹過，輪都輪到韓國菜啦！
驚喜韓燒 Mr. Korea BBQ
如果你朋友鍾意食韓燒，呢間就啱晒。五花腩、護心肉、特級牛肋骨肉等等，肉味香濃，燒完加啲辣醬同蒜片再包埋生菜咁食，又幾fresh。一班人一齊燒下燒下、傾下傾下，仲可以夾埋送個生日驚喜畀主角。有心嘅話，可以預早買定個蛋糕上去，再講聲畀侍應聽，到出蛋糕嗰陣，背景音樂都會跟住起首生日歌，仲要係韓文版添！夠晒特別。不過係爭緊一個靚仔oppa囉科科。
蒜味韓式西餐 Mad for garlic
圖：韓國菜都唔係淨係得韓燒嘅，生日飯可以試下啲特別少少嘅菜式，等壽星仔女印象深刻啲呀。呢間以蒜頭嚟做主打嘅韓式西餐廳就夠晒特別喇，由前菜到甜品通通都有蒜。平時要食蒜蓉包嘅，嚟到更加要食，啲蒜係勁量級呀，鹹香帶辣，插埋蠟燭扮生日包都仲得。
主菜就可以嗌招牌肉眼扒配蒜頭山，鐵板上，蒜味香，和牛油脂分佈平均，入口即溶。最後嚟多個甜品，自家製雲呢嗱雪糕配糖漬蒜頭及雜莓醬，就算加咗蒜都食得出甜味，出面食唔到呀。
韓式海鮮九重塔 九重鮮
圖：韓國菜都有海鮮九重塔㗎，呢間韓式海鮮蒸氣火鍋專門店有好多唔同嘅新鮮海鮮食材揀，就連原隻沙巴肉蟹都有。鍾意食海鮮嘅主角實好開心，一層一層嘅海鮮都選清蒸嘅方法，咁先食到佢最原始嘅鮮味。蟹夠鮮甜、象拔蚌爽口、仲有龍躉皮脆肉嫩……可以因應飯局嘅人數去嗌唔同嘅套餐，唔同嘅層數，唔使怕多得滯食唔晒，而最底嗰層嘅粥底，豬手好牛肉好，都一樣盡吸上面咁多層嘅海鮮精華，超甜啊。
【生日飯局】： |
地道韓國風味 石牆道韓國餐廳
圖：呢間韓國餐廳以食地道韓國風味為主，醬油蟹梗係唔少得。肉質鮮嫩，連埋秘製醬油，係香口嘅，而且蟹膏都有唔少呀，配埋紫菜飯食，好開胃。而夏天就最好食埋水冷麵，涼浸浸係爽嘅，麵質又彈牙喎。
又假如，你個壽星friend子係唔怕生牛肉嘅，記得叫一碟鮮牛肉過佢，全生㗎真係。全碟紅噹噹，好意頭呀科科。你又唔使怕佢好腥喎，反而係好鮮，仲可以配埋梨絲一齊食。
韓式素食 The Joomak
圖：今次介紹嘅呢幾間韓國菜，雖然冇之前嗰幾類餐廳咁多生日驚喜搞，但勝在咩款都有，總有一間啱你個韓系朋友。最後就介紹間韓式素食餐廳啦，早啲訂位仲可以揀坐窗邊，有得睇維港海景，靚啊。
紫薯同芝士聽講係好多人嘅飛佛，溝埋一齊嚟變咗紫薯素芝士薯條又點睇？薯條係炸得幾脆嘅，素芝士醬略甜，但如果怕熱氣嘅可以叫紫薯素芝士粟米。食韓國嘢冇炸雞又好似爭緊少少咁，呢度有甜辣素炸雞呀。初頭食落都真係甜甜地，但愈食啲辣味就愈滲出嚟啊。
文：Kar
