經過五個月豪裝，灣仔君悅酒店嘅自助餐餐廳茶園再次重開，整個裝修、風格都華麗變身，亦增加咗幾款buffet迷必like嘅食物！點先為之最抵食？有咩buffet必食位？快睇茶園自助餐6大回本位！

#1　豪食6款生蠔

裝修前未有生蠔，為咗我哋呢班「蠔」友，一係就唔加，一加加夠6款生蠔畀你試，有美國、法國、新西蘭、澳洲及愛爾蘭！「蠔」友們可試勻各國生蠔，搵出自己最愛口味，正！採訪當晚，生蠔區經常排晒隊，廚師們亦不斷即場拆蠔去refill。

呢款來自新西蘭嘅Kaipara Organic V6，蠔肉大粒，海水味不太濃，但蠔鮮味會咀嚼後慢慢滲出嚟，同平時食開嘅法國蠔、澳洲蠔都幾唔同！

如果鍾意海水味濃嘅生蠔，可揀法國嘅La Jolie Mauger或者愛爾蘭嘅Kelly oyster。

#2　掃勻海鮮菜式+即切肉扒

除咗生蠔，凍海鮮仲有虎蝦、帶子、翡翠螺，蝦肉、帶子肉都幾厚身，而且都算refill得快，密密食就抵番晒！

有(左)焗芝士帶子、(右)炸龍脷柳。

又有(左)挪威煙三文魚、(右)醋醃沙甸魚。

另外，即切肉扒亦非常受食客歡迎，呢度有即切牛扒、烤豬肩扒、羊架等，旁邊仲有啲薯仔、蔬菜等配料選擇，諗起都想再食添！

五成熟嘅即切牛扒，口感嫩滑又多汁。

烤豬肩扒烤焗得好軟腍。

#3　自選龍蝦煮法

每位客人會跟送半年美國波士頓龍蝦，有白灼、烤焗、芝士焗3款煮法，由客人自選。龍蝦肉好彈牙，開飯仔推介烤焗煮法！

#4　即叫即整！櫻花燒、火燒法式crepe

甜品方面，餐廳新增3個即煮station，有柚子朱古力梳乎厘、櫻花燒、法式crepe。當中最特別嘅係呢個櫻花形狀嘅銅鑼燒，好eye-catching。

櫻花燒外層烘焗得宜，仲有少少燶邊，入面就有蘋果餡，好清新！

另有法式crepe廚房，廚師先製成法式crepe，再放入香橙焦糖醬同煮，加埋少少酒嚟個火燒法式crepe，令法式crepe充滿酒香。另外法式crepe亦可跟雪糕架！

#5　All-homemade！十幾款雪糕、雪糕蛋糕

自助餐一大賣點，就係自家製雪糕，所以不加防腐劑！採訪當晚見到有10款雪糕，有野莓雪葩、特濃咖啡脆脆雪糕、士多啤梨芝士蛋糕雪糕、芒果椰子雪糕、法式黑朱古力雪糕、馬達加斯加雲尼拿籽雪糕、菠蘿熱情果雪葩、香橙雪葩等等，好多款都好想食呀！必試士多啤梨芝士蛋糕雪糕、野莓雪葩！注意注意注意，拎完番位唔好掛住影相呀，雪糕好快融架！

除此之外，餐廳仲供應5款雪糕蛋糕，好少自助餐餐廳可食到雪糕蛋糕，因為雪糕蛋糕製作時間都幾多，呢度有得食之餘，仲有成4、5款咁多，梗係要食個夠啦！採訪當晚有薄荷朱古力、意大利泡沫咖啡甜酒海綿拖肥、阿拉斯加、日式抹茶及美式朱古力綿花糖夾餅5款口味。

#6　自家香檳、自家茶！

餐廳與法國酒廠合作，推出自家品牌香檳，口感好light，配埋生蠔食啱晒！不過自助餐唔包香檳，想飲嘅話可另加 $280 任飲香檳～

另外，餐廳引入Tealeaves品牌茶葉，Tealeaves亦特別為餐廳調配咗bespoke blend茶，以檸檬、柑橘、迷迭香、羅勒等等，茶味好清新。

其他食物：

有7-8款蔬菜、4-5款小食，配以7款醬汁任你揀！而火腿都有3款，如西班牙橡果黑毛豬豬肉腸。

餐廳亦設幾款熱盤，有扒虎蝦蕃茄水瓜柳沙沙、法式紅酒燉雞、意大利煙肉芝士釀豬柳配啤酒汁、法式燒鴨等。

左邊係法式蒜蓉香草紙包焗黑鱈魚，魚肉好嫩滑，而且被香草紙包住去焗，令鱈魚好入味。右邊係焗鵝肝多士，好厚身，油脂感重。

湯水方面，餐廳有(左)龍蝦湯及(右)普羅旺斯蜆肉湯。

自助晚餐
供應時間：6:30pm-10pm
價錢：成人$728/位、小童$364/位，6歲以下小童免費

Tiffin
地址：灣仔港灣道1號君悅酒店閣樓

文：Joy