放咗工想Chill返晚，最近有個新選擇啦。中環碼頭新開一間居酒屋，畀大家可以望住維港海景食即燒串燒、鰻魚飯等等。加上有多款日本酒，包括即斟Suntory生啤、清酒，等大家坐船前停低抖半個鐘飲番杯！
 

CHI Tachinomi開喺中環7號碼頭，即係往尖沙咀方向嘅碼頭地下，舖仔細細所以採用立食形式，不過知大家未必想企咁耐所以都有高凳嘅。選擇唔算好多但勝在心思搭救，例如供應香港比較少見嘅土手燒，引入唔同牌子嘅燒酌梳打、威士忌等等。
 

土手燒（牛根煮）（$38）

土手燒大家未必聽過，其實係日本大阪名物之一。小店老闆喺大阪試過之後想將佢帶嚟香港，就專登去到日本學師，再喺香港研究食譜，用美國Prime級牛筋，以日本味噌、味醂、清酒等熬煮至軟腍入味，味噌香氣濃郁，好啱配白飯！
 

鰻魚飯（$55/細，$90/大）

胃口唔大嘅建議食細碗就夠，蒲燒鰻魚夠厚肉又夠香，而且口感結實無細骨。醬汁味道偏甜，略嫌醬汁唔係太夠撈飯，不過見主角鰻魚肉分量十足，而且白飯係用100%日本越光米，補返數啦。
 

串燒（日本雞皮串、日本雞髀肉、美國一口牛肉粒）（$28/串）

餐廳用特製串燒機，用機器轉動串燒保證均勻受熱之餘，又可以用高溫鎖住食材水分。雞皮脆身香口，雞髀肉彈牙，一口牛亦的確Keep到肉汁。三款串燒調味簡單，突出食材原味為主，鹹鹹地最啱送酒呀！
 

 

Suntory生啤（$38）

舖仔細細但特別配備Suntory生啤機，即席斟出新鮮生啤同綿密嘅泡沫，令啤酒飲落更加甘醇濃厚，入口帶苦而餘韻甘甜。
 

純米吟釀（$38/杯）、純米大吟釀（$65/杯）

小店每日供應嘅清酒同威士忌都有可能唔同，採訪當日嘅係杜之藏翠水純米吟釀，同獺祭三割九分純米大吟釀。前者嘅釀酒廠以傳統手工釀造著名，口感清爽雅緻適合配串燒；後者係唔少人心中嘅清酒入門之選，酒質高雅帶花果香相當易入口。
 

CHI Tachinomi
地址：中環7號碼頭地下A號舖

文：Cathy
相、片: Tom Li