聖誕節當然要開懷大食！呢間出名食Cheesecake嘅美國菜餐廳，菜式選擇超過200款，想過一個「芝」味聖誕，咁就要睇開飯仔嘅介紹喇。由沙律、主菜到甜品蛋糕都有應節推介㗎。
The Cheesecake Factory今年聖誕特別揀咗12道啱哂聖誕節一班人一齊開心Share嘅菜式，逐一介紹之前再次溫馨提示一下大家：呢度菜式分量較大，記得食得哂先好嗌呀。
羽衣甘藍藜麥沙律
先嚟一碟羽衣甘藍藜麥沙律，綠色嘅羽衣甘藍葉加上巴馬臣芝士、紅燈籠椒同藜麥等點綴之後，有啲似棵聖誕樹呀！而且呢棵食得嘅聖誕樹撈埋檸檬油醋汁之後，更加開胃健康。
芝士通心粉
芝士控覺得唔夠喉？咁不如直接嚟一份芝士通心粉！用四款以上嘅芝士配搭坑紋通心粉，焗之前再加上麵包糠增加口感，絕對係畫龍點睛位。
炸芝士通心粉球漢堡
而炸芝士通心粉球漢堡就將芝士通心粉捏成球油炸，再加喺牛肉漢堡裡面，最後淋上車打芝士醬，再配生菜、蕃茄等配料同香脆薯條，滿足感滿分。
番茄肉丸意大利麵
番茄肉丸意大利麵係唔少大朋友同小朋友嘅最愛，呢度嘅自家製肉丸會加入意式肉腸同巴馬臣芝士，口感居然有啲似獅子球！配製番茄醬同羅勒，唔會太Heavy。
芝樂坊馳名美式肉餅
香草三文魚拼檸檬蒜香大蝦配以薯蓉
唔好以為配菜就無乜特別，呢度嘅薯蓉滋味程度幾乎搶過主角風頭！皆因大概每兩個鐘頭就會新鮮製作，確保味道新鮮，所以食落特別軟綿幼滑。無論搭肉香十足嘅招牌肉餅，定係Light啲嘅海鮮都一樣咁夾。
更多【飲食潮流】： |
雞肉及美式鬆餅
布里歐早餐三文治
嚟到美國餐廳不妨試下經典美國菜，美式Buttermilk鬆餅加肉汁係唔少美國人嘅Comfort Food，而呢度就配搭香煎雞胸肉、蘑菇、蔬菜同濃郁肉汁。而布里歐早餐三文治就用Brioche麵包夾炒蛋、煙肉、火腿、烤番茄、熱熔車打芝士同蛋黃醬，陪你過一個豐富嘅聖誕節。
紅絲絨芝士蛋糕
相信大家嚟到呢間餐廳，最期待嘅就係最後嘅蛋糕時間！聖誕推介當然不得不提到紅絲絨，佢地嘅紅絲絨芝士蛋糕就係以紅絲絨蛋糕同經典芝士蛋糕層層相間，外面再加忌廉芝士糖霜同白朱古力。食落比想象中輕盈，因為佢地嘅芝士蛋糕比較軟身，加上鬆軟濕潤嘅紅絲絨蛋糕甜而不膩。而外面嘅忌廉芝士糖霜亦甜度適中，而且仲增加咗一啲chewy嘅口感𠻹。
紅蘿蔔蛋糕
克雷格瘋狂紅蘿蔔芝士蛋糕
而代表聖誕節嘅香料肉桂，就可以喺呢兩款紅蘿蔔蛋糕蛋糕裡面可以搵到。紅蘿蔔蛋糕嘅肉桂香氣濃郁，口感豐富。而克雷格瘋狂紅蘿蔔芝士蛋糕就混入芝士蛋糕，唔單止可以一次過滿足食紅蘿蔔蛋糕同Cheesecake兩個願望，亦增加咗蛋糕嘅香味同口感層次。
漆黑蛋糕
琳達特濃朱古力蛋糕
想Sweet啲嘅話，就要試下呢度嘅朱古力蛋糕啦。漆黑蛋糕即係濃郁朱古力蛋糕，香醇朱古力加埋朱古力碎同杏仁，朱古力Fans一定滿意。而琳達特濃朱古力蛋糕就係一層層嘅朱古力蛋糕同特濃朱古力糖霜，甜度較高所以自問係無甜不歡嘅甜魔先好點呀。
最後提提大家，餐廳每逢星期日都有早午餐供應。而且星期一至五，11:00-12:00同15:00-17:00呢兩個時段都接受訂位！唔介意食個Early Lunch或者Early Dinner嘅話不妨Book定枱先啦。
The Cheesecake Factory 芝樂坊餐廳
尖沙咀廣東道25號海港城港威商場地下G102號舖
文、相、片：Cathy