唔少人去Cafe都係想放鬆下嚟個Coffee Break，灣仔呢間新店就啱晒喇。咖啡師可以按你嘅心情推介唔同飲品，室內設計仲特別引入日光，感覺特別Chill。咖啡店更特別同多間香港品牌合作，希望大家一齊支持香港本土食材！
 

Bow Coffee位於灣仔皇后大道東，由香港首間虛擬保險公司Bowtie開設，餐廳以象征Live嘅粉紅色同Breathe嘅藍綠色為主，畀大家一個喺商業區嘅喘息空間。同時亦希望可以成為灣仔嘅共聚空間，唔單止會有社區書角同社區信箱，仲計劃之後會同附近嘅NGO或者餐廳合作，增進社區之間嘅交流。
 

醒味（$48）

以餐廳概念Live & Breathe為名嘅呢杯咖啡特飲相當醒神，以酸甜嘅西柚配搭梳打水，而House Blend Espresso另上，畀大家可以按自己口味同需要自己加落去。House Blend咖啡糅合埃塞俄比亞同洪都拉斯豆，喺香港烘焙，花果香同堅果香平衡，加埋西柚一齊飲就更突出堅果香，有少少黑朱古力嘅香氣。整體味道層次豐富，加上氣泡口感好Refreshing！
 

煙硝紅茶（$45）

同本地新式茶店瑜茶舍合作，特別揀咗幾款唔同種類、坊間又較為少見嘅茶款。好似紅茶就飲得多，呢款以松木煙燻嘅正山小種紅茶就未必試過！飲落松煙香氣非常濃郁，口感圓潤厚實，回甘悠長。
 

抹茶牛奶（$48）

想飲低咖啡因飲品，除咗Decaf咖啡之外亦有抹茶牛奶、焙茶牛奶等選擇。呢杯抹茶牛奶顏色翠綠，加上可愛拉花記得要相機飲先。味道既有抹茶嘅甘味亦有牛奶嘅香甜，味道平衡而且口感幼滑無粉粒，係有水準嘅抹茶牛奶。
 

 

花生醬香蕉酸種麵包多士（$38）

咖啡店亦有供應輕食，特別揀利用天然酵母製作嘅酸種麵包，無添加而且升糖指數較低。麵包烤至香脆再加上花生醬同香蕉片，食落先有濃郁花生香，再有香蕉嘅甜味，無論味道同口感層次都好豐富！
 

煙三文魚貝果（$65）

貝果就選用T.H.E Deli Blendit嘅手工貝果，外韌內軟有咬口。加埋香口嘅煙三文魚、微酸嘅Cream Cheese、清爽嘅沙律菜，配搭起嚟味道唔錯，當Light Lunch或者早餐都好啱。
 

Bow Coffee
地址：灣仔皇后大道東58-64號帝后商業中心地下

文、相：Cathy