北越菜 北正宗
Photos by happyduckling & 紋身兔越南菜係成日都食到，但正宗嘅越南菜，仲要係北越嘅，就少喇啩。咁北越同我哋平時食開嘅越南菜又有咩唔同？
最大嘅唔同就係金邊粉同埋佢嘅湯底。平時我哋食開嘅金邊粉都係比較幼身嘅，但原來北越嗰啲呢係粗身啲，而且仲會用油炸鬼浸湯嚟食，係特別嘅。喺呢間餐廳就可以試到呢種特色喇，佢哋嘅金邊粉全人手製作，煙煙韌韌咁，再用蝦、蟹呢啲海鮮去熬個湯底，咁當然會有埋金不換、青檸同辣椒啦，不過咁多種料夾埋碗湯又唔會好重口味，甚至比平時食開嘅淡口。再將條油炸鬼浸一浸，鬆軟入味。
以色列菜 Shalom Grill
Photos by choyeejoey講真，好多人可能呢一生人都唔會有機會去以色列旅行，而香港有嘅正宗以色列菜餐廳，一隻手都可能數得晒。呢間餐廳，亦係少有會招待非猶太教嘅以色列餐廳。不過佢哋亦都跟從猶太人嘅「安息日」傳統，逢星期五晚到星期六都唔開嘅。
烤餅係以色列當地嘅傳統食物，不過由於猶太教對食物處理嘅準則規定，肉同奶類食物係唔可以一齊煮或者一齊食，所以呢度嘅烤餅係齋麵粉整嘅，冇蛋、冇奶，但就會有其他醬料畀你揀嚟一齊食，例如有橄欖呀、紅菜頭呀、芝麻醬呀、茄醬同薯仔醬咁，清清地但都幾香口。喺肉、奶唔能夠一齊煮／食嘅情況之下，龍蝦湯亦都唔能夠好似西式嘅煮法咁加埋啲忌廉，連咖啡都係冇奶嘅，不過就堅係好濃嘅咖啡味。
比利時菜 Belgica
Photos by 明鑽 & bububaybay比利時菜嚟講，香港都有幾間嘅，而呢間小店就喺西環嗰頭。講起比利時，大家一定會首先諗起朱古力同埋窩夫，但其實比利時仲盛產好多青口㗎。
所以嚟到呢間餐廳，最好就係試下青口啦，散嗌又得，叫埋個set加薯條同啤酒又得。呢度煮法係白汁煮青口，用個大煲裝住一隻隻嘅青口，雖然唔係話好大粒，但就好鮮甜，點埋啲香草忌廉汁嚟食就更加食到停唔到喇。飲得酒嘅朋友當然啤啤佢啦，比利時嘅麥啤都幾唔錯，麥味幾重，另外有隻蜜糖啤酒，甜甜der應該幾啱囡囡飲。
俄羅斯/烏克蘭菜 東歐餐廳
Photos by stellashea & tastyren睇個名都知係食東歐菜啦，呢度就主打俄羅斯同烏克蘭菜嘅，啲廚師仲係由呢兩個國家請過嚟㗎。俄羅斯出名魚子醬是常識吧，呢度有個醃三文魚．魚子醬沙律，魚子醬係三文魚籽嗰隻，橙紅色，晶瑩剔透，黏度較高，食落有少少鹹，不過夾埋沙律菜一齊食就啱啱好中和返。另一道招牌菜係芝士焗牛脷盅，呢個盅出色在係用個酥皮蓋住，打開個酥皮蓋，就係香滑嘅半融芝士汁溝忌廉汁，浸住都幾多粒嘅一口牛脷粒，好腍，亦都好重芝士味，份量都幾多但提一提返呢個其實係starter㗎咋。
呢間餐廳另一個特色係，佢仲有個冰窖畀食客可以拎住杯Vodka或者Whisky呢啲烈酒入去，感受喺「冰天雪地」飲烈酒嘅「爽」！
巴西菜 Braza Churrascaria Brazilian Steakhouse
Photos by chikpihehe & tracytong1呢間食巴西菜嘅餐廳，係半自助餐咁嘅形式。喺出面吧枱會有各式嘅沙律、芝士同火腿等小食任拎，而主食嘅燒肉就係由侍應一串串咁拎住，喺餐廳度行嚟行去，你睇啱邊串，就會埋嚟即場切畀你，切幾多都得，最緊要你食得晒唔好嘥。燒肉選擇有羊架、西冷、雞槌、雞心、雞翼、豬肋骨、大蝦同香腸等等，全部都烤得啱啱好，好有肉汁。望住一串串嘅燒肉喺你隔籬團團轉，真係忍唔到㗎喂！
文：Kar
隨時接收最新資訊
讚好OpenRice專頁！
Keyword
北越菜
以色列菜
比利時菜
俄羅斯菜
巴西菜
Copied to Clipboard