想留喺香港但又有遠離煩囂嘅感覺？啟德郵輪碼頭最近就開咗間環境超加分嘅餐廳，樓底五米高、以藤蔓玻璃屋為設計靈感，仲有旋轉樓梯同霓虹燈牆畀大家打卡！餐廳日間係Cafe，供應精品咖啡、小食、意粉等；夜晚就搖身一變成主打歐陸菜嘅私房菜館，由曾任職於多間酒店、經驗豐富嘅行政總廚主理。
 

The Old Hangar位於啟德郵輪碼頭B區2樓，再上一層就係佔地23,000平方米嘅空中花園，睇日落一流！餐廳亦有落地大玻璃窗，採光度高好啱影相。日間由coffeeflow主理，而夜晚嘅私房菜就必需預約，大廚可按要求設計菜式，亦可以包場作為私人派對、證婚場地、週年晚會等唔同用途。
 

Suntory啤酒 + 秘製明太子雞翼（套餐價$88）

遠離煩囂Chill返下唔少人都會想飲兩杯，所以餐廳最近推出呢個啤酒加小食嘅套餐。冰涼嘅Suntory啤酒味道清爽。去骨雞中翼裡面釀咗唔少明太子，啖啖鹹辣惹味。最抵讃係雞皮薄身香脆唔油膩，原來大廚特別將雞翼先炸熟再用高溫焗走多餘油分，食落罪惡感都少啲。
 

煙鴨胸水蜜桃有機沙律（$98）

大大份沙律非常足料又色彩繽紛，鴨胸肉嫩富鹹香，同香甜多汁嘅水蜜桃一齊食好夾。有機菜以胡麻醬調味，特別在當中加入杏脯乾，咬到嘅時候有陣獨特嘅甜味，清爽得嚟又唔寡。
 

辣味鮮蝦茄汁意粉（$128）

自家調配嘅茄汁味道酸酸辣辣好醒胃，食得出蕃茄酸味自然，同時辣度適中唔嗆喉。意粉夠掛汁，蝦肉亦已經先去殼，蝦香濃郁、肉質爽脆。
 

 

Mocha（$42/熱，$48/凍）

咖啡同coffeeflow一樣選用本地烘焙咖啡豆，呢杯Mocha入口先有咖啡嘅微酸同香醇，中段係朱古力嘅甜味，餘韻苦甜交織，口感厚滑。
 

柚子蜜（$48）

夜晚嘅私房菜以歐陸菜為主，不過如果有需要嘅話亦可以請廚師們按需要或喜好設計、甚至創作Fusion嘅菜單！皆因餐廳行政總廚Peter Wong有超過40年經驗，曾任職於半島酒店、澳門漁人碼頭等，經驗豐富。而總廚Cyrus Lee亦有超過10年酒店餐飲經驗，尤其擅長於私房菜。
 

The Old Hangar
地址：九龍灣承豐道33號啟德郵輪碼頭B區2樓N205號舖

文、相：Cathy.H