港鐵堅尼地城站通車即將兩年，方便咗唔少為食友嚟呢邊「搵食」。唔好以為港島區餐廳就比較離地，反而其實呢邊嘅特色食店唔單止選擇多，而且定價其實都幾貼地！由日式鰻魚飯到港式清湯腩，平民蛋撻到精緻蛋糕都任你揀。
馳名隱世清湯腩 順景食店
隱藏喺熟食中心嘅呢間粉麵店睇落無乜特別，但其實佢地嘅清湯腩喺唔少食家嘅心目中絕對唔會輸畀其他名店！中午嚟可以簡單嗌碗清湯腩跟麵或飯，不過最好都係搵多幾個朋友，夜晚嚟嗌個清湯蘿蔔牛腩煲。一煲有齊牛腩、爽腩、肥腩同筋腩，牛肉味濃，加上有用Gas爐保溫，個湯越煲越香可以打埋邊爐！
精緻紫薯綠茶蛋糕 詩餅坊
食厭咗連鎖集團，又擔心負擔唔起酒店餅房嘅出品？其實香港仲有價錢合理又用心嘅小店，例如呢間水準一直都保持得唔錯嘅蛋糕店。最出名嘅綠茶紅豆蛋糕賣相優雅，外面係一跳條綠茶蛋白脆條，入面嘅蛋糕係無得輸嘅綠茶紅豆配搭。另一名物紫薯蛋糕嘅紫薯蓉軟滑香濃，入面嘅蛋糕同忌廉軟綿又唔會過於甜膩。
Burger Lover必試小店 罌粟花
圖：CKCK612
除咗快餐店之外，其實漢堡包仲有好多種可能，例如呢間小店就用好有港式風味嘅菠蘿包夾炸蟹餅！招牌自家制蟹餅漢堡用菠蘿包代替普通麵包，夾住沙拉醬、太陽蛋、番茄、同啖啖蟹肉碎嘅炸蟹餅，蛋汁令漢堡食落一啲都唔乾。香濃流心芝士蝦丸同海膽櫻花蝦天使麵都係足料又好味嘅推介。
吸睛日式流心Pancake 點子
圖：amy0802
喺Facebook同Instagram上面，綠茶、流心同甜品應該都算係比較吸睛嘅關鍵字，呢度嘅出品就有齊哂以上特點！宇治綠茶日式流心厚鬆餅配豆腐雪糕嘅流心效果相當唔錯，鬆餅入口鬆軟有茶香，同輕怡嘅豆腐雪糕非常夾。不過有食家稍嫌綠茶香味唔夠濃郁，而且偶然要等好耐先有。
對住海景嘆炸魚烤雞 Fish & Chick
圖：BMBMF
買唔起海景樓，都唔代表唔可以望海景Relax下嘅。香港專賣英式Fish & Chips嘅餐廳唔多，呢間就係其中一間較為出名嘅。炸魚嘅皮薄脆而唔油膩，魚肉新鮮又嫩口，如果塊魚肉再大塊啲就更完美喇，粗薯條亦夠外脆內軟。烤雞有陣陣香草同雞油香味，皮薄肉嫩又多汁，配清甜粟米粒就啱哂。
懷舊平民茶餐廳 祥香茶餐廳
圖：T.LAU914
老實講，呢間茶餐廳嘅名物蛋撻同茶走，算唔上係香港數一數二咁出色。但或者每一區都需要一間街坊茶餐廳，而堅尼地城嘅老字號代表，就絕對要數到呢一間。蛋撻係牛油皮，入口酥化富牛油香，雞蛋香甜。茶走嘅茶味比普通茶餐廳濃少少，所以同煉奶特別夾。唔夠飽嘅話可以食多個菠蘿油，不過大家要撞下手神，因為撞到啱啱出爐熱辣辣嘅話會好食好多！
堅尼地城版深夜食堂 萬家廚房
溫馨提示一句，呢間店雖然下晝都會開，但只限後面超市部分，想食飯嘅話請等到五點後！專做晚市同宵夜時段嘅居酒屋，加上老闆相當隨意，令人回想起日劇《深夜食堂》。不過呢度最出名嘅係鰻魚飯，大大條京都鰻魚燒過後更顯肥美，醬汁香甜啱哂撈飯，而且連飯都係越光米，米香特濃。
開飯編輯推介：
3. 10月份好評餐廳十強
熱門文章推介：
1. 一齊滾起佢！季選任食火鍋
3. 油麻地特色美食地圖
隨時接收最新資訊
讚好OpenRice專頁！
