夏日果香！6-7月下午茶之選

夏天、為大地帶來水果！最近唔少餐廳都以色彩繽紛又香甜多汁嘅水果作為下午茶主題，留喺室內吹住冷氣打卡，精緻嘅茶點又可以幫大家掃走悶熱心情。有聯乘Tea Set更附上贈品，一次過滿足晒三個願望啊。

盛夏繽紛水果三重奏下午茶　GREEN

尖東呢間酒店推出嘅下午茶可以話分量十足，以前菜、自選主菜同三層甜點架逢上夏日水果三重奏。先以法式龍蝦芒果沙律同法式龍蝦湯喚醒味蕾，而主菜選擇有牛、鴨及海鮮等。重頭戲甜品更有以水果造型亮相嘅薄荷青蘋果忌廉芝士慕絲、檸檬忌廉青檸乳酪慕絲等。

供應時間：2022年6月20日起至另行通知，下午3時至6時
價錢：$398/位，$698/兩位

閃爍夏日下午茶　I-O-N Café Bar

位於中環街市嘅茶啡酒館就推出加入大量夏日水果嘅閃爍夏日下午茶，茶點包括鵝肝醬馬卡龍配無花果醬、風乾火腿多士配菠蘿莎莎醬、士多啤梨拿破崙、芒果菠蘿椰子奶凍等。亮點之一係飲品可以揀氣泡咖啡果皮茶，味道酸酸甜甜咁有啲似羅望子幾過癮。

供應時間：即日起至2022年8月31日，下午3時至6時
價錢：$498/兩位

粉紅夏沫下午茶　KITCHEN

喜愛蜜桃嘅朋友可以留意，呢間酒店同英國品牌The London Essence Co.聯乘，以果漾飲料系列為靈感，除咗會有白桃茉莉梳打水製作嘅特飲，更以蜜桃同其他水果創作多款茶點。例如香桃伯爵茶凍、百香果戚風蛋糕、西柚青檸果撻，同加冕雞肉三文治配香桃芒果酸辣醬。

供應時間：即日起至2022年8月31日，下午3時至5時
價錢：星期一至五$618/兩位；星期六、日及公眾假期$798/兩位

夏日清香三層下午茶　Southside Bistro

經過翻新，數碼港呢間酒店嘅餐廳最近重新開業，更同法國護髮品牌Leonor Greyl聯乘，推出清新輕怡主題嘅下午茶，用多款花果設計甜品，包括芒果紅桑子慕絲蛋糕、玫瑰朱古力千層蛋糕等。鹹點亦以藜麥、青檸等入饌。惠顧下午茶更會贈送天然護髮體驗套裝*！

供應時間：即日起至2022年7月31日，下午3時至5時
價錢：$568/兩位
*每位客人可免費獲贈Leonor Greyl天然護髮體驗套裝一份，數量有限，送完即止

健膚之約下午茶　視佳廊

想搵間睇到靚景嘅，可以留意尖東呢間位於酒店18樓，可以飽覽維港海景嘅餐廳。佢哋嚟緊會同日本護膚品牌ALBION聯乘，以品牌皇牌健康化妝水為靈感，加上多款日本食材，推出健膚之約下午茶。精選茶點包括日本柚子芝士蛋糕、宇治抹茶馬卡龍、玉子燒三文治、吉列廣島炸蠔等。更會獲贈禮品換領咭*，食完Tea再扮靚！

供應時間：2022年7月8日至8月31日 (星期三至日) ，下午2時半至6時
價錢：$338/位，$676/兩位
*惠顧雙人下午茶即可獲贈ALBION禮品換領咭乙張，可憑咭親臨ALBION美容護膚專櫃免費換領「健康化妝水透亮美肌套裝」一份及與好友一同體驗「日式尊貴手部護理服務」一次

蝶舞翩翩主題下午茶　 Uptop Bistro and Bar

呢個下午茶則以蝴蝶作為主題，配搭唔同食材創作出一系列精緻茶點，例如脆炸蝴蝶蝦配芒果莎莎、蝶豆花啫喱、法式蝴蝶酥等，更喺懷舊中式零食龍鬚糖中加入花生同椰絲作為餡料，再加上蝴蝶形嘅朱古力，賣相夢幻，食落香酥鬆綿、入口即化。飲品更可以加錢升級至享用蝶豆花柑橘梳打、粉紅蜜桃果茶等特飲。

供應時間：2022年6月20日起至另行通知，下午3時至5時
價錢：星期一至五$408/兩位；星期六、日及公眾假期$448/兩位

文：Cathy.H