去台灣夜市有咩係必食？鹽酥雞一定係其一，不過而家唔使去台灣都有得食啦！呢間於台中發跡嘅巷口炸雞專門店正式進駐天水圍，店舖由台灣直營，於香港人比較熟悉嘅逢甲夜市都有分店，95%材料由台灣直送，保證食得返台灣夜市味道！店舖聽日(2月1日)正式開幕。
巷口炸雞專門店由台灣直營，圖中為香港負責人陳浩輝(左)、兩位台灣負責人傅碧洪(中)及吳定昌(右)。
店舖主打三款口味炸雞，亦有炸魷魚、甜不辣及地瓜球等一共十七款小食，平時鍾意食香口嘢嘅朋友就啱晒。被問到點解會選擇喺香港開業，老闆就話因為香港人同台灣人口味相似，所以就選擇香港為海外首間分店喇！
原味炸雞(小$26/大$39)
老闆話喺台灣好多炸雞都是用乾粉裹雞肉後拎去炸，而且有比較多都係翻炸，所以都會好乾。而呢度嘅炸雞就係由生炸到熟，食落去特別皮脆肉多汁，而且一啲都唔油膩啊。最驚喜係開飯仔就算放涼咗一陣食都咁出色！
塔香炸雞(小$29/大$42)
通常地道的鹽酥雞係將雞炸好後再加九層塔落去爆香，只會喺外層有香味，而呢度會喺醃製過程就加入九層塔，由內至外都有濃郁九層塔香氣，比起原味更清爽甘甜。
涮嘴甜不辣($23)
甜不辣係台灣傳統小食之一，炸過嘅甜不辣寧舍煙韌，加埋惹味嘅椒鹽粉，配酒一流啊！另外連同原味炸雞一齊買的話，$50就食齊兩款～
椒鹽杏鮑菇($23)
唔想食肉的話可以試試呢個喺各大台灣夜市都好受歡迎嘅椒鹽杏鮑菇，外皮香脆，菇味都夠晒香濃。
巷口蔥仔餅($23/4件)
蔥仔餅呈圓形狀，好多時候識蔥餅都會有埋肉，而呢個就淨係純蔥，所以蔥嘅香氣特別明顯。
醬燒豆輪酥($23)
豆輪酥口感有啲似豆皮，全部都係手工製，食落去特別香口，會塗一層蒜蓉醬喺面再加椒鹽粉，一樣咁惹味～
地址: 天水圍天華路30號T Town South 地下SG21號舖
文: Yanica
相、片: Tom Li
